‘ମୋ ସରକାର'କୁ କର୍ମଚାରୀଙ୍କ ଦକ୍ଷତା ସହ ଯୋଡ଼ିଲେ
‘ମୋ ସରକାର'କୁ କର୍ମଚାରୀଙ୍କ ଦକ୍ଷତା ସହ ଯୋଡ଼ିଲେ
admin
3877
ଭୁବନେଶ୍ୱର : ରାଜ୍ୟ ସରକାରଙ୍କ "ମୋ ସରକାର' କାର୍ଯ୍ୟକ୍ରମରେ ଭଲ ପ୍ରଦର୍ଶନ କରୁଥିବା କର୍ମଚାରୀଙ୍କୁ ସେମାନଙ୍କ ବାର୍ଷିକ ଦକ୍ଷତା ପ୍ରଦର୍ଶନ ମୂଲ୍ୟାୟନ ରିପୋର୍ଟ (ପିଏଆର୍)ରେ ୫% ୱେଟେଜ୍ ମିଳିବ । କେବଳ ଯେଉଁ ବିଭାଗରେ "ମୋ ସରକାର' କାର୍ଯ୍ୟକ୍ରମ ଲାଗୁ ହୋଇଛି ସେହି ବିଭାଗର କର୍ମଚାରୀମାନଙ୍କୁ ଏହା ପ୍ରଦାନ କରାଯିବ ।
ସାଧାରଣ ପ୍ରଶାସନ ବିଭାଗର ସ୍ୱତନ୍ତ୍ର ସଚିବ ଆଜି ସମସ୍ତ ବିଭାଗୀୟ ସଚିବ, ବିଭାଗୀୟ ମୁଖ୍ୟ, ଆରଡିସି ଓ ଜିଲ୍ଲାପାଳଙ୍କୁ ଚିଠି ଲେଖି ଏ ସମ୍ପର୍କରେ ବିସ୍ତୃତ ସୂଚନା ଦେଇଛନ୍ତି । ରାଜ୍ୟ ସରକାର କର୍ମଚାରୀଙ୍କ ବାର୍ଷିକ ପିଏଆରରେ "ଫାଇଭ-ଟି' ନିମନ୍ତେ ୨୦% ୱେଟେଜ୍ ବ୍ୟବସ୍ଥା କରିଥିବା ନେଇ ପୂର୍ବରୁ ଘୋଷଣା କରିଥିଲେ । ଏହି କ୍ରମରେ ଫାଇଭ-ଟି ଚାର୍ଟରକୁ ସଠିକ୍ ଭାବେ ଲାଗୁ କରିବା ପାଇଁ ୧୦%, ସରକାରରେ ଫାଇଭ-ଟି ଚାର୍ଟର ଲାଗୁ ପାଇଁ ୫% ଓ ମୋ ସରକାର ପାଇଁ ୫% ୱେଟେଜ୍ ମିଳିବ ।
ସେହିପରି ସର୍ବଭାରତୀୟ ସେବା ଅଫିସରଙ୍କୁ ବାର୍ଷିକ ପିଏଆରରେ ମିଳିବାକୁ ଥିବା ମୋଟ ୧୦ମାର୍କ ମଧ୍ୟରୁ "ଫାଇଭ-ଟି' ଓ "ମୋ ସରକାର'ର ପ୍ରଦର୍ଶନ ଆଧାରରେ ୨ ମାର୍କ ମିଳିବ । ବିଭାଗରେ ଫାଇଭ-ଟି ଲାଗୁ ପାଇଁ ୧ ମାର୍କ, ସରକାରରେ ଫାଇଭ-ଟି ପାଇଁ ୦.୫ ମାର୍କ ଓ ମୋ ସରକାର ପାଇଁ ୦.୫ ମାର୍କ ମିଳିବ ବୋଲି ସାଧାରଣ ପ୍ରଶାସନ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି ।
