ୱେବ ସିରିଜ ‘ତାଣ୍ଡବ’କୁ ଲାଗିଛି ଝଟକା

Jan 28, 2021 - 09:40 Updated: Jan 28, 2021 - 09:40

4155

ନୂଆଦିଲ୍ଲୀ: ୱେବ ସିରିଜ ‘ତାଣ୍ଡବ’କୁ ଲାଗିଛି ଝଟକା । କଳାକାର ଓ ନିର୍ମାତାଙ୍କୁ ବୁଧବାର ସୁପ୍ରିମ କୋର୍ଟରୁ ଆଶ୍ୱସ୍ତି ମିଳିପାରିନାହିଁ । ସୁପ୍ରିମ କୋର୍ଟ ‘ତାଣ୍ଡବ’ ଅଭିନେତା ଜିସାନ ଅୟୁବଙ୍କ ସମେତ ନିର୍ମାତାଙ୍କ ଗିରଫ ଉପରେ ରୋକ ଲଗାଇବା ପାଇଁ ମନା କରିଦେଇଛନ୍ତି । ସୈଫ ଅଲ୍ଲୀ ଖାନ୍ଙ୍କ ଦ୍ୱାରା ପ୍ରସ୍ତୁତ ୱେବ ସିରିଜ ତାଣ୍ଡବ ଉପରେ ବିବାଦ ଥମିବାର ନା ଧରୁନି । ପ୍ରାୟ ୬ଟି ରାଜ୍ୟରେ ଏହି ୱେବ ସିରିଜ ବିରୋଧରେ ଧାର୍ମିକ ଭାବନା ଓ ଜାତିଆଣ ଶଦ୍ଧ ପ୍ରୟୋଗ କରାଯାଇଥିବାରୁ ଏତଲା ଦିଆଯାଇଛି । ୱେବସିରିଜ ‘ତାଣ୍ଡବ’ର ନିର୍ମାତା ଏବଂ ଅଭିନେତା ଜିସାନ ଅୟୁବଙ୍କ ଆବେଦନପତ୍ର ଉପରେ ବୁଧବାର ସୁପ୍ରିମ କୋର୍ଟ ଶୁଣାଣି କରିଛନ୍ତି । ଏହି ମାମଲାରେ ଶୁଣାଣି କରି ସୁପ୍ରିମ କୋର୍ଟ ସିନେମା କଳାକାରଙ୍କ ବିରୋଧରେ ହୋଇଥିବା ଏତଲା ଉପରେ ରୋକ ଲାଗିପାରିବ ନାହିଁ ବୋଲି କହିଛନ୍ତି । ଅପରପକ୍ଷରେ ସେମାନଙ୍କୁ ଅନ୍ତରୀଣ ଜାମିନ ଦେବା ପାଇଁ ମନା କରିଦେଇଛନ୍ତି । ସୁପ୍ରିମକୋର୍ଟରେ ‘ତାଣ୍ଡବ’ର ନିର୍ମାତା ଏବଂ କଳାକାରଙ୍କ ତରଫରୁ ଆବେଦନପତ୍ର ଦାଖଲ କରାଯାଇଥିଲା । ଯେଉଁଥିରେ ସେମାନଙ୍କ ବିରୋଧରେ କରାଯାଇଥିବା ଏତଲା ଉପରେ ରୋକ ଲଗାଯିବା ସହ ଅନ୍ତରୀଣ ଜାମିନ ପାଇଁ ଆବେଦନ କରାଯାଇଥିଲା । ଜଷ୍ଟିସ୍ ଅଶୋକ ଭୂଷଣଙ୍କ ଖଣ୍ଡପୀଠରେ ଏହି ମାମଲାର ଶୁଣାଣି ହୋଇଥିବାବେଳେ ‘ତାଣ୍ଡବ’ ଟିମକୁ ନିରାଶ ହେବାକୁ ପଡିଛି । ଅପରପକ୍ଷରେ ଆବେଦନକାରୀଙ୍କୁ ହାଇକୋର୍ଟରେ ଆବେଦନ କରିବା ପାଇଁ ସୁପ୍ରିମକୋର୍ଟ ନିଦେ୍ର୍ଧଶ ଦେଇଛନ୍ତି । ଆବେଦନକାରୀଙ୍କ ତରଫରୁ ବରିଷ୍ଠ ଓକିଲ ଫଲି ଏସ୍ ନରିମନ, ମୁକୁଲ ରୋହତଗୀ ଏବଂ ସିଦ୍ଧାର୍ଥ ଲୁଥରା ମାମଲା ପରିଚାଳନା କରିଥିଲେ ।