ରାଜ୍ୟପାଳଙ୍କ ପାଇଁ ଖୋଲିଲାନି ବିଧାନସଭା ଗେଟ୍
ରାଜ୍ୟପାଳଙ୍କ ପାଇଁ ଖୋଲିଲାନି ବିଧାନସଭା ଗେଟ୍
admin
2664
ଭୁବନେଶ୍ୱର : ସାମ୍ବିଧାନିକ ଭାବେ ରାଜ୍ୟପାଳ ହେଉଛନ୍ତି ସରକାରଙ୍କ ମୁଖ୍ୟ । ରାଜ୍ୟପାଳଙ୍କ ଆଜ୍ଞାପ୍ରାପ୍ତି ହେବା ପରେ ହିଁ ବିଧାନସଭା ଅଧିବେଶନ ଡକାଯାଇଥାଏ । ପ୍ରତି ଆଇନ ବା ବିଧିପ୍ରଣୟନରେ ବି ରାଜ୍ୟପାଳଙ୍କ ମଂଜୁରୀ ଏକାନ୍ତ ଅପରିହାର୍ଯ୍ୟ । ତେବେ ପଶ୍ଚିମବଙ୍ଗର ଏକ ଘଟଣା କିନ୍ତୁ ସାରା ଦେଶରେ ଚର୍ଚ୍ଚା ସୃଷ୍ଟି କରିଛି । ରାଜ୍ୟପାଳଙ୍କ ପାଇଁ ଭିଭିଆଇପି ଗେଟ ନଖୋଲିବାକୁ ନେଇ ସ୍ୱାଭାବିକ ଭାବେ ଉଦବେଗ ପ୍ରକାଶ ପାଇଛି ।
ମିଳିଥିବା ସୂଚନା ଅନୁଯାୟୀ, ପଶ୍ଚିମବଙ୍ଗର ରାଜ୍ୟପାଳ ଜଗଦୀପ ଢଙ୍କର ଆଜି ପଶ୍ଚିମବଙ୍ଗ ବିଧାନସଭାକୁ ଯାଇଥିଲେ । ବିଧାନସଭାର ବାଚସ୍ପତି ମଧ୍ୟାହ୍ନଭୋଜନ ପାଇଁ ତାଙ୍କୁ ନିମନ୍ତ୍ରଣ କରିଥିଲେ । କିନ୍ତୁ ପରେ ପରେ ଏହି ବୈଠକ ବାତିଲ ହୋଇଯାଇଥିଲା । ତଥାପିବି ରାଜ୍ୟପାଳ ବିଧାନସଭା ଅଭିମୁଖେ ଯାଇଥିଲେ । ତେବେ ତାଙ୍କ ପାଇଁ ଉଦ୍ଧିଷ୍ଟ ଗେଟଟି ବନ୍ଦ ରହିଥିଲା । ସେ କିଛି ସମୟ ଧରି ସେଠାରେ ଅଟକି ରହିଥିଲେବି ଫାଟକ ଖୋଲିନଥିଲା । ଫଳରେ ସେ ଅନ୍ୟବାଟ ଦେଇ ବିଧାନସଭା ଭିତରକୁ ଯିବା ପାଇଁ ବାଧ୍ୟ ହୋଇଥିଲେ । ଯାହାକୁ ନେଇ ରାଜ୍ୟପାଳ ଶ୍ରୀ ଢଙ୍କର କ୍ଷୋଭ ପ୍ରକାଶ କରିଛନ୍ତି । ଏହା ଗଣତନ୍ତ୍ର ପାଇଁ ଅପମାନ ବୋଲି ସେ କହିଛନ୍ତି ।
ଅନ୍ୟ ଏକ ସୂଚନା ଅନୁଯାୟୀ, ପଶ୍ଚିମବଙ୍ଗର ବିଧାନସଭା ଦୁଇଦିନ ପାଇଁ ମୁଲତବୀ ରହିଛି । ରାଜ୍ୟପାଳ କେତେକ ଗୁରୁତ୍ୱପୂର୍ଣ୍ଣ ବିଲକୁ ଅନୁମୋଦନ ଦେଇନଥିବାରୁ ବିଧାନସଭାକୁ ମୁଲତବୀ ରଖିଛନ୍ତି ବିମାନ ବାନାର୍ଜୀ ।
