ରସାୟନ ଶାସ୍ତ୍ରରେ ୨ ଜଣଙ୍କୁ ନୋବେଲ
ରସାୟନ ଶାସ୍ତ୍ରରେ ୨ ଜଣଙ୍କୁ ନୋବେଲ
admin
5938
ନୂଆଦିଲ୍ଲୀ: ଏକ ଅଭିନବ ଆନୁବଂଶିକ କଇଞ୍ଚିର ବିକାଶ ବା ଗୁଣସୂତ୍ରର ଆନୁବଂଶିକ ସମ୍ପାଦନ ପ୍ରକି୍ରୟା ଆବିଷ୍କାର ପାଇଁ ଚଳିତ ବର୍ଷ ଦୁଇ ଜଣଙ୍କୁ ରସାୟନ ଶାସ୍ତ୍ରରେ ସମ୍ମାନଜନକ ନୋବେଲ ପୁରସ୍କାର ପ୍ରଦାନ ନିମନ୍ତେ ମନୋନୀତ କରାଯାଇଛି । ସେମାନେ ହେଲେ ଫରାସୀ ବୈଜ୍ଞାନିକ ଇମାନୁଏଲ କାର୍ପେଣ୍ଟିଅର ଓ ଆମେରିକୀୟ ଗବେଷକ ଜେନିଫର ଏ ଡୌଡନା । ସେମାନଙ୍କ ନୂତନ ପଦ୍ଧତି ସାହାଯ୍ୟରେ ମନୁଷ୍ୟର ଆନୁବଂଶିକ ଉପାଦାନକୁ ସମ୍ପାଦନ କରାଯାଇ ଭବିଷ୍ୟତରେ ବଂଶଗତ ରୋଗର ନିରାକରଣ କରାଯାଇପାରିବ ବୋଲି ଆଶା କରାଯାଉଛି ।
ସ୍ୱେଡେନର ଷ୍ଟକହୋମଠାରେ ରୟାଲ ସ୍ୱେଦିଶ ଏକାଡେମୀ ଅଫ ସାଇନ୍ସେସ ଦ୍ୱାରା ଏହି ବିଶିଷ୍ଟ ରସାୟନବିତ ଦ୍ୱୟଙ୍କ ନାମ ଘୋଷଣା କରିବା ଅବସରରେ ନୋବେଲ କମିଟି (ରସାୟନଶାସ୍ତ୍ର) ମୁଖ୍ୟ କ୍ଲାଇସ ଗୁପ୍ତା ଫସନ କହିଛନ୍ତି ଯେ ଏହି ଆନୁବଂଶିକ ସରଞ୍ଜାମରେ ବିପୁଳ ଶକ୍ତି ରହିଛି ଯାହା ଆମ ସମସ୍ତଙ୍କୁ ପ୍ରଭାବିତ କରୁଛି । ଏହି ଆବିଷ୍କାର କେବଳ ମୌଳିକ ବିଜ୍ଞାନରେ ବୈପ୍ଲବିକ ପରିବର୍ତ୍ତନ ଆଣିନାହିଁ, ଏହା ଦ୍ୱାରା ଅଭିନବ ଭେଷଜ ଚିକିତ୍ସା ମଧ୍ୟ ସମ୍ଭବ ବୋଲି ସେ ଆଶାବାଦୀ ଥିବା କହିଛନ୍ତି । ତେବେ ଏହି ଜ୍ଞାନକୌଶଳର ବିପୁଳ ଶକ୍ତି ସମାହାର ଯୋଗୁଁ ଆମକୁ ସତର୍କତାର ସହିତ ଏହାର ଉପଯୋଗ କରିବାକୁ ପଡ଼ିବ ବୋଲି ସେ ସତର୍କ କରାଇ ଦେଇଛନ୍ତି ।
