ମୋତେ ହତ୍ୟା ପାଇଁ ବିଜେପି ଷଡ଼ଯନ୍ତ୍ର କରିଛି: ମମତା
ମୋତେ ହତ୍ୟା ପାଇଁ ବିଜେପି ଷଡ଼ଯନ୍ତ୍ର କରିଛି: ମମତା
admin
4954
କୋଲକାତା: ପଶ୍ଚିମବଙ୍ଗ ନିର୍ବାଚନ ରଣାଙ୍ଗନରେ ପୁଣି ତୃଣମୂଳ ସୁପି୍ରମୋ ମମତା ବାନାର୍ଜୀ ଏବଂ ବିଜେପିର ହେଭିୱେଟ ନେତାଙ୍କ ମଧ୍ୟରେ ଆକ୍ରମଣ ପ୍ରତିଆକ୍ରମଣ ହୋଇଛି । ରାଜ୍ୟର ବିଭିନ୍ନ ସ୍ଥାନରେ ନିର୍ବାଚନୀ ସଭା କରିଛନ୍ତି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ, କେନ୍ଦ୍ର ରକ୍ଷାମନ୍ତ୍ରୀ ରାଜନାଥ ସିଂହ, ବିଜେପି ସଭାପତି ଜେ.ପି ନଡ୍ଡା ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ସମାନ୍ତରାଳ ଭାବେ ମୁଖ୍ୟମନ୍ତ୍ରୀ ମମତା ବାନାର୍ଜୀ ବାଙ୍କୁରାରେ ଆୟୋଜିତ ଏକ ସଭାକୁ ହ୍ୱିଲ ଚେୟାରରେ ବସି ସମ୍ବୋଧିତ କରିଥିଲେ । ସେ ସିଧାସଳଖ ଅମିତ ଶାହଙ୍କ ବିରୋଧରେ ବିଷୋଦଗାର କରି କହିଥିଲେ, ମୋତେ ହତ୍ୟା କରିବାକୁ ବିଜେପି ଷଡଯନ୍ତ୍ର କରିଛି । ଶାହଙ୍କ ସଭାରେ ହାତଗଣତି ଲୋକଙ୍କ ଉପସ୍ଥିତି ନେଇ ସେ ହତାଶ ହୋଇପଡ଼ୁଛନ୍ତି । ଦେଶ କଥା ନ ବୁଝି ପଶ୍ଚିମବଙ୍ଗରେ ଆସନ ଜମାଇଛନ୍ତି । ତୃଣମୂଳ ନେତାଙ୍କ ବିରୋଧରେ ଷଡଯନ୍ତ୍ର କରିବା ସହ ହତୋତ୍ସାହିତ କରୁଛନ୍ତି । ନନ୍ଦିଗ୍ରାମରେ ଆହତ ହେବା ଘଟଣାକୁ ନେଇ ମମତା କହିଲେ, ସେମାନେ କଣ ଚାହୁଁଛନ୍ତି? ମୋତେ ହତ୍ୟା କରିବାକୁ? ମୋତେ ହତ୍ୟା କଲେ ସେମାନେ ନିର୍ବାଚନ ଜିତିବେ? ଅସମ୍ଭବ । ଭୋଟ ପ୍ୟାନେଲ କାର୍ଯ୍ୟଶୈଳୀରେ ଯଦି ବିଜେପି ହସ୍ତକ୍ଷେପ କରେ ତେବେ ନିର୍ବାଚନ କମିସନଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ମମତା ଧମକ ଦେଇଛନ୍ତି ।
