ବିଶ୍ୱ ଅର୍ଥନୀତିର ହବ ହେବ ସମ୍ବଲପୁର: ଧର୍ମେନ୍ଦ୍ର
ବିଶ୍ୱ ଅର୍ଥନୀତିର ହବ ହେବ ସମ୍ବଲପୁର: ଧର୍ମେନ୍ଦ୍ର
admin
3562
ଭୁବନେଶ୍ୱର: ସମ୍ବଲପୁର ଆଗକୁ ବିଶ୍ୱର୍ ଅର୍ଥନୀତିର ହବ ହେବାକୁ ଯାଉଛି । ଶନିବାର ସମ୍ବଲପୁରରେ ଆଇଆଇଏମର ନିଜସ୍ୱ କ୍ୟାମ୍ପସର ଶିଳାନ୍ୟାସ ଅବସରରେ ନିଜର ଅଭିଭାଷଣ ରଖି ଏହା କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଏହାଛଡ଼ା ସେ କହିଛନ୍ତି ଯେ, ୫ ବର୍ଷ ତଳେ ସମ୍ବଲପୁରରେ ଆଇଆଇଏମ ପ୍ରତିଷ୍ଠା ହୋଇଥିଲା । ସ୍ୱର୍ଗତ ଅର୍ଥମନ୍ତ୍ରୀ ଅରୁଣ ଜେଟଲୀ ଏନେଇ ବ୍ୟୟବରାଦ କରିଥିଲେ । ସମ୍ବଲପୁରର ସୁଯୋଗ୍ୟ ସନ୍ତାନଙ୍କ ପାଇଁ ଏହା ସମ୍ଭବ ହୋଇଛି । ମୋଦୀଙ୍କ ପ୍ରମୁଖ ସଚିବ ପ୍ରମୋଦ ମିଶ୍ରଙ୍କ ବ୍ୟକ୍ତିଗତ ଉଦ୍ୟମରୁ ହୋଇଛି । ସମ୍ବଲପୁର ଆଗକୁ ବିଶ୍ୱ ଅର୍ଥନୀତିର ହବ ହେବାକୁ ଯାଉଛି । ଓଡ଼ିଶା କି ଭାରତ ନୁହେଁ ଏହା ବିଶ୍ୱର ଇକନୋମିକ ହବ ହେବ ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି ।
ପ୍ରକାଶ ଯେ, ସମ୍ବଲପୁରରେ ଆଜି ଆଇଆଇଏମର ନିଜସ୍ୱ କ୍ୟାମ୍ପସର ଶିଳାନ୍ୟାସ ଅନୁଷ୍ଠିତ ହୋଇଯାଇଛି । ଭର୍ଚୁଆଲ ମୋଡରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଏହାର ଶିଳାନ୍ୟାସ କରାଯାଇଛି । ରାଜ୍ୟପାଳ ଗଣେଶୀ ଲାଲ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ ମୋଡରେ ଏହି ଉତ୍ସବରେ ଯୋଗଦେଇଥିଲେ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ରମେଶ ପୋଖରିଆଲ ମଧ୍ୟ ଯୋଗଦେଇଥିଲେ । ସଭାସ୍ଥଳରେ କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀ ଉପସ୍ଥିତ ଥିଲେ । ସ୍ଥାନୀୟ ସାଂସଦ ଓ ବିଧାୟକ ମଧ୍ୟ ଉତ୍ସବରେ ସାମିଲ ଥିଲେ ।
ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜ ଅଭିଭାଷଣ ରଖି ଆଇଆଇଏମ ପ୍ରତିଷ୍ଠା ନେଇ କେନ୍ଦ୍ର ସରକାରଙ୍କୁ ଧନ୍ୟବାଦ ଦେଇଥିଲେ । ଏଥିସହ କହିଥିଲେ ଯେ, ପୂର୍ବ ଭାରତରେ ଓଡ଼ିଶା ଏକ ଶିକ୍ଷାର ହେବ ହେବାକୁ ଯାଉଛି । ଓଡ଼ିଶାର ଶିକ୍ଷାର ହବ କରିବା ପାଇଁ ପଦକ୍ଷେପ ନିଆଯାଇଛି । ଓଡ଼ିଶାରେ ଅଧିକରୁ ଅଧିକ କେନ୍ଦ୍ରୀୟ ଅନୁଷ୍ଠାନ ପାଇଁ ମୁଖ୍ୟମନ୍ତ୍ରୀ ଅପିଲ ମଧ୍ୟ କରିଥିଲେ ।
