ବିଜେପିର ମାସ୍କଟ ହୁଅନ୍ତୁ ନାହିଁଁ କ୍ୟାପଟେନ
ବିଜେପିର ମାସ୍କଟ ହୁଅନ୍ତୁ ନାହିଁଁ କ୍ୟାପଟେନ
admin
4654
ନୂଆଦିଲ୍ଲୀ: ଏଯାଏ କ୍ୟାପଟେନ ଅମରିନ୍ଦର ସିଂ ଲଗାତାର କଂଗ୍ରେସ ଉପରେ ଆକ୍ରମଣ କରି ଚାଲିଥିବାବେଳେ ଏବେ କଂଗ୍ରେସ ବି ପାଲଟା ଆକ୍ରମଣ ଆରମ୍ଭ କରିଛି । ତେଜିଛି ବାକ ଯୁଦ୍ଧ । କଂଗ୍ରେସ ପକ୍ଷରୁ ପ୍ରଭାରୀ ହରିଶ ରାୱତ ଆଜି ସାମ୍ବାଦିକ ସମ୍ମିଳନୀ ଡାକି କ୍ୟାପଟେନଙ୍କ ଉପରେ ବର୍ଷିଛନ୍ତି । କହିଛନ୍ତି, କ୍ୟାପଟେନ ଜଣେ ଧର୍ମନିରପେକ୍ଷ ନେତା ଭାବେ ପରିଚିତ । ହେଲେ ସେ କେମିତି ସାଂପ୍ରଦାୟିକ ଦଳ ବିଜେପି ସହ ସମ୍ପର୍କ ରଖୁଛନ୍ତି? ସେ ବିଜେପିକୁ ସହଯୋଗ କରିବା ଉଚିତ ନୁହେଁ । କ୍ୟାପଟେନ ବିଜେପି ପାଇଁ ମାସ୍କଟ ହୁଅନ୍ତୁ ନାହିଁ ବୋଲି ରାୱତ କହିଛନ୍ତି ।
ହରିଣ ରାୱତ କହିଛନ୍ତି, ପଞ୍ଜାବ ନିର୍ବାଚନ ପୂର୍ବରୁ କଂଗ୍ରେସ ଯାହା ପ୍ରତିଶ୍ରୁତି ଦେଇ କ୍ଷମତାକୁ ଆସିଥିଲା, କ୍ୟାପଟେନ ତାହାକୁ ଠିକ୍ ଭାବେ ପାଳନ କରିପାରିଲେନି । ଡ୍ରଗ୍ସ ପ୍ରସଙ୍ଗରେ ଠିକ୍ ଭାବେ କାର୍ଯ୍ୟାନୁଷ୍ଠାନ ନେଲେନି । ଏ ନେଇ ହାଇକମାଣ୍ଡ ତାଙ୍କୁ ବାରମ୍ବାର ଚେତାଇ ଥିଲେ । ମାତ୍ର କ୍ୟାପଟେନ ନିଜ ମର୍ଜିରେ ଶାସନ ଚଳାଇଥିଲେ । କାହା ପରାମର୍ଶକୁ ସେ ଗ୍ରହଣ କରୁନଥିଲେ । ସେ ତାଙ୍କ ଫାର୍ମ ହାଉସରୁ ହିଁ ସରକାର ଓ ପାର୍ଟି ଚଳାଇବାକୁ ଚାହୁଁଥିଲେଊ । ବିଧାୟକ ଓ ମନ୍ତ୍ରୀମାନଙ୍କ ମତକୁ ବି ଗୁରୁତ୍ୱ ଦେଉନଥିଲେ । ବିଧାୟକ ଦଳ ବୈଠକ ନେଇ ତାଙ୍କୁ ଖବର ଦିଆଯାଇଥିଲା । ମାତ୍ର ସେ ଖବର ପାଇବା ପରେ ବି ଥରୁଟିଏ ଫୋନ କରି କଥା ହେଲେନି । ବିଧାୟକଙ୍କ ମତ ଅନୁଯାୟୀ ଆମକୁ ବିଧାୟକ ଦଳ ବୈଠକ କରିବାକୁ ପଡ଼ିଲା । ଅମରିନ୍ଦର ଭୁଲିଯାଉଛନ୍ତି, କଂଗ୍ରେସ ଦଳ ତାଙ୍କୁ ସାଢେ଼ ୯ ବର୍ଷ ମୁଖ୍ୟମନ୍ତ୍ରୀ ପଦବୀ ଦେଇଛି । ୩ ଥର ପିସିସି ସଭାପତି ହୋଇଛନ୍ତି ସେ । କଂଗ୍ରେସରେ ଥାଇ ବି ସେ ଅକାଳି ଦଳର ବାଦଲ ପରିବାର ସହ ଭିତିର ବୁଝାମଣା କରିଥିବା ନେଇ ରାଜ୍ୟରେ ସବୁଠି ଚର୍ଚ୍ଚା । ଏପରିକି ଦଳିତ ବିଧାୟକ ଭାବେ ଚରଣଜିତ ସିଂ ଚନ୍ନି ମୁଖ୍ୟମନ୍ତ୍ରୀ ହେବା ପରେ ବି କ୍ୟାପଟେନ ତାଙ୍କୁ ଆଶୀର୍ବାଦ ଦେବାକୁ ସମୟ ଦେଲେନି । କଂଗ୍ରେସ କେବେ ବି କ୍ୟାପଟେନ ଅଣଦେଖା କରିନି । ତାଙ୍କୁ ଦଳ ସବୁବେଳେ ସମ୍ମାନ ଦେଇଛି । କେବଳ ଲୋକଙ୍କ ସହାନୁଭୂତି ସାଉଁଟିବା ପାଇଁ ସେ ଅପାମନିତ ହୋଇଥିବା ନେଇ ମିଛ ବାହାନା କରୁଥିବା ରାୱତ କହିଛନ୍ତି ।
