ବାଜିଲା ବିଗୁଲ, ଅପ୍ରେଲ ୧୧ରୁ ମେ’୧୯ ଭୋଟ, ୨୩ରେ ଫଳ
ବାଜିଲା ବିଗୁଲ, ଅପ୍ରେଲ ୧୧ରୁ ମେ’୧୯ ଭୋଟ, ୨୩ରେ ଫଳ
admin
2062
ନୂଆଦିଲ୍ଲୀ : ନିର୍ବାଚନ କମିଶନ ଭୋଟ ବିଗୁଲ ଫୁଙ୍କିଛନ୍ତି । ଅପ୍ରେଲ୧୧ରୁ ନିର୍ବାଚନ ଆରମ୍ଭ ହୋଇ ମେ’୧୯ରେ ଶେଷ ହେବ । ମେ’ ୨୩ରେ ଭୋଟ ଫଳାଫଳ ପ୍ରକାଶ ପାଇବ । ସାରା ଦେଶରେ ୭ ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହେବ । ଓଡ଼ିଶାରେ ୪ ପର୍ଯ୍ୟାୟରେ ନିର୍ବାଚନ ହେବ । ଅପ୍ରେଲ ୧୧, ୧୮, ୨୩ ଓ ୨୯ରେ ଓଡ଼ିଶାରେ ନିର୍ବାଚନ ଅନୁଷ୍ଠିତ ହେବ । ମୁଖ୍ୟ ନିର୍ବାଚନ କମିଶନର ସୁନୀଲ ଆରୋରା ଏହି ଘୋଷଣା କରିଛନ୍ତି । ପ୍ରଥମ ପର୍ଯ୍ୟାୟ : ଅପ୍ରେଲ ୧୧, ଦ୍ୱିତୀୟ ପର୍ଯ୍ୟାୟ : ଅପ୍ରେଲ ୧୮, ତୃତୀୟ ପର୍ଯ୍ୟାୟ : ଅପ୍ରେଲ ୨୩, ଚତୁର୍ଥ ପର୍ଯ୍ୟାୟ : ଅପ୍ରେଲ ୨୯, ପଂଚମ ପର୍ଯ୍ୟାୟ : ମେ’ ୬
ଷଷ୍ଠ ପର୍ଯ୍ୟାୟ : ମେ’ ୧୨ ଓ ସପ୍ତମ ପର୍ଯ୍ୟାୟ ଭୋଟ ମେ’ ୧୯ରେ ହେବ ।
ନିର୍ବାଚନୀ ତାରିଖ ଘୋଷଣା ସହ ଆଜିଠାରୁ ଆଚରଣବିଧି ଲାଗୁ କରାଯାଇଛି । ଆଚରଣ ବିଧି ଉଲ୍ଲଂଘନ କଲେ କଠୋର କାର୍ଯ୍ୟାନୁଷ୍ଠାନ ପାଇଁ ନିର୍ବାଚନ କମିଶନ ଚେତାଇ ଦେଇଛନ୍ତି । ଲୋକସଭା ନିର୍ବାଚନ ସହ ଆନ୍ଧ୍ରପ୍ରଦେଶ, ଓଡ଼ିଶା, ସିକିମ ଓ ଅରୁଣାଚଳ ପ୍ରଦେଶ ବିଧାନସଭା ନିର୍ବାଚନ ଅନୁଷ୍ଠିତ ହେବ ।
ସାରା ଭାରତରେ ଭୋଟ ଗ୍ରହଣ ପାଇଁ ୧୦ ଲକ୍ଷ ପୋଲିଂ ଷ୍ଟେସନ କରାଯାଇଛି । ଓଡ଼ିଶାରେ ୩୭୬୦୬ ବୁଥ ରହିଛି । ସବୁ ପୁଲିଂ ବୁଥରେ ଭିଭିପାଟ ମେସିନ ଲାଗିବ । ଭାରତର ପ୍ରାୟ ୯୦ କୋଟି ଭୋଟର ୨୦୧୯ରେ ଦେଶରେ ଭାଗ୍ୟ ନିର୍ଦ୍ଧାରଣ କରିବେ । ତନ୍ମଧ୍ୟରୁ ପୁରୁଷ ଭୋଟରଙ୍କ ସଂଖ୍ୟା ୪୬.୫ କୋଟି ହୋଇଥିବାବେଳେ ମହିଳା ଭୋଟରଙ୍କ ସଂଖ୍ୟା ୪୩.୨ କୋଟି ରହିଛି । ଇଭିଏମରେ ପ୍ରତ୍ୟେକ ପ୍ରାର୍ଥୀଙ୍କ ଫଟୋ ସ୍ଥାନୀତ କରାଯିବ । ମୁକ୍ତ ଓ ଅବାଧ ନିର୍ବାଚନ ପରିଚାଳନା ଆମର ଲକ୍ଷ୍ୟ ବୋଲି ନିର୍ବାଚନ କମିଶନ କହିଛନ୍ତି । ନିର୍ବାଚନୀ ଖର୍ଚ୍ଚ ନେଇ ଆୟକର ବିଭାଗ ସହ ମଧ୍ୟ କମିଶନ ଆଲୋଚନା କରିଛନ୍ତି । ନିର୍ବାଚନ ପ୍ରକ୍ରିୟାର ଭିଡିଓ ରେକଡର଼୍ିଂର ମଧ୍ୟ ବ୍ୟବସ୍ଥା କରାଯାଇଛି । ସୋସିଆଲ ମିଡିଆରେ ଦଳ ଓ ପ୍ରାର୍ଥୀମାନେ ସବିଶେଷ ସୂଚନା ଦେବାକୁ ମଧ୍ୟ କୁହାଯାଇଛି । ଅପରାଧିକ ପୃଷ୍ଠଭୂମି ଥିବା ନେତାମାନେ ୩ ଥର ଏସଂକ୍ରାନ୍ତରେ ଘୋଷଣା କରିବେ । ଗଣମାଧ୍ୟମ ଗଠନ ମୂଳକ ରିପୋର୍ଟ ପ୍ରକାଶ କରିବା ପାଇଁ ନିର୍ବାଚନ କମିଶନ ଶ୍ରୀ ଆରୋରା ଆହ୍ୱାନ ଦେଇଛନ୍ତି ।
