ନିର୍ବାଚନୀ କାର୍ଯ୍ୟରେ ଯାଇଥିବା ୨ଟି ବୋଲେରୋ ଗାଡି ଫେରିନି, ଚିନ୍ତାରେ ଗାଡି ମାଲିକ
ନିର୍ବାଚନୀ କାର୍ଯ୍ୟରେ ଯାଇଥିବା ୨ଟି ବୋଲେରୋ ଗାଡି ଫେରିନି, ଚିନ୍ତାରେ ଗାଡି ମାଲିକ
admin
3756
କନ୍ଧମାଳ : ଭୋଟ ଗ୍ରହଣ ପାଇଁ ପୁଲିଂ ପାର୍ଟିକୁ ନେଇ ଯାଇଥିବା ୨ଟି ବୋଲେରୋ ଗାଡି ଭୋଟ ଗ୍ରହଣ ଶେଷ ହେବାର ୪ ଦିନ ବିତି ଯାଇଥିଲେ ବି ଫେରିପାରିନି । ମାଓବାଦୀମାନେ ରାସ୍ତାରେ ଗଛ କାଟି ପକାଇବାସହିତ ଲ୍ୟାଣ୍ଡମାଇନ ବିଛାଇଥିବାରୁ ପୋଲିସ ମଧ୍ୟ ସେଠାକୁ ଯାଉନାହିଁ ଫଳରେ ଭୟରେ ପୁଲିଂ ପାର୍ଟିର କର୍ମଚାରୀମାନେ ଗାଡି ଛାଡି ଚାଲି ଚାଲି ଫେରି ଆସିଥିଲେ । ଗାଡି ଫେରି ପାରୁନଥିବାରୁ ଗାଡିମାଲିକ ଏବେ ଚିନ୍ତାରେ ରହିଛନ୍ତି ।
ଫିରିଙ୍ଗିଆ ବ୍ଲକ ଗୋଛାପଡା ଥାନା ଅନ୍ତର୍ଗତ ବାହାରଲା ଠାରେ ହୋଇଥିବା ବୁଥକୁ ୨ଟି ବୋଲେରୋ ଗାଡିରେ ପୁଲିଙ୍ଗ କର୍ମଚାରୀମାନେ ଗତ ୧୭ ତାରିଖରେ ଯାଇଥିଲେ । ଯିବାବେଳେ ସେମାନେ ସେଠାରେ କୌଣସି ଅସୁବିଧା ବିନା ପହଂଚି ଯାଇଥିଲେ । ତେବେ ସେମାନେ ପହଂଚିବାର ୪ ଘଂଟା ପରେ ସେହି ବୁଥକୁ ଚେକିଂ କରିବାକୁ ଯାଉଥିବା ସେକ୍ଟର ଟିମର ଗାଡି ଉପରେ ଆକ୍ରମଣ କରିଥିଲେ ମାଓବାଦୀ । ସେମାନେ ପ୍ରଥମେ ଲ୍ୟାଣ୍ଡମାଇନ ବିସ୍ଫୋରଣ କରିବାପରେ ସେଥିରେ ବିଫଳ ହେବାରୁ ଗାଡି ଉପରକୁ ଆଖିବୁଜା ଗୁଳି ଚାଳନା କରିଥିଲେ । ଫଳରେ ଗାଡିରେ ବସିଥିବା ମହିଳା ଜିଆରଏସ ସଂଯୁକ୍ତା ଦିଗାଲଙ୍କ ମୃତ୍ୟୁ ହୋଇଥିଲା । ଏହା ପରେ ସେହି ରାସ୍ତାରେ ବଡ ବଡ ଗଛ କାଟି ପକାଇ ରାସ୍ତା ଅବରୋଧ କରିଥିଲେ ମାଓବାଦୀ । ଭୋଟ ଗ୍ରହଣ ପରେ ମାଓବାଦୀଙ୍କ ଭୟରେ ସମସ୍ତ ପୁଲିଂ କର୍ମଚାରୀ ଗାଡିରେ ନଆସି ଏସଓଜି ଯୱାନଙ୍କ କଡା ସୁରକ୍ଷାରେ ଚାଲି ଚାଲି ଫେରିଥିଲେ । ଗାଡି ଦୁଇଟି ବାରାହଲାରେ ସେହିପରି ଆଜି ପର୍ଯ୍ୟନ୍ତ ପଡି ରହିଛି । ଆସିବା ରାସ୍ତାରେ ଗଛକଟା ଯାଇ ଅବୋରଧ କରାଯାଇଥିବା ସହ ଲ୍ୟାଣ୍ଡମାଇନ ବିସ୍ଫୋରଣରେ ଏକ କଲଭର୍ଟ ଭାଙ୍ଗି ଯାଇ ଥିବାରୁ ଗାଡି ଦୁଇଟି ଆସିପାରୁନାହିଁ । ଗାଡି ମାଲିକ ଅମରଜିତ ପଣ୍ଡା ନିର୍ବାଚନ ଦାୟିତ୍ୱରେ ଥିବା ଉପଜିଲ୍ଲାପାଳଙ୍କୁ ଗାଡି ଦୁଇଟି ଫେରାଇ ଆଣିବାର ବ୍ୟବସ୍ଥା କରିବାକୁ ଅନୁରୋଧ କରିଥିଲେ । ଦୁଇ ଦିନ ଭିତରେ ଗାଡି ଫେରାଇ ଆଣିବାର ବ୍ୟବସ୍ଥା କରିବେ ବୋଲି ଉପଜିଲ୍ଲାପାଳ ଗାଡି ମାଲିକଙ୍କୁ ପ୍ରତିଶ୍ରୁତି ଦେଇଥିଲେ । ହେଲେ ୪ ଦିନ ପରେ ମଧ୍ୟ ଗାଡି ଫେରାଇ ଆଣିବାର କୌଣସି ବ୍ୟବସ୍ଥା ପ୍ରଶାସନ କରୁନାହିଁ ବୋଲି ଶ୍ରୀ ପଣ୍ଡା ଅଭିଯୋଗ କରିଛନ୍ତି । ଗାଡି ମାଲିକଙ୍କ ଅଭିଯୋଗ ସମ୍ପର୍କରେ ଉପଜିଲ୍ଲାପାଳ ସୂଚାରୁ ବଳଙ୍କ ସହ ଯୋଗାଯୋଗ କରିବାରେ ସେ ପୋଲିସ ସହାୟତାରେ ଗାଡି ଦୁଇଟି ଫେରାଇ ଆଣିବା ପାଇଁ ଚେଷ୍ଟା କରିବେ ବୋଲି କହିଛନ୍ତି ।
