ଟ୍ରାଫିକ ଉଲ୍ଲଂଘନକାରୀଙ୍କୁ ଜଗିବେ ଜନତା, ଆପ୍ରେ ଅପ୍ଲୋଡ଼ କରିବେ ଫଟୋ ଓ ଭିଡିଓ
ଟ୍ରାଫିକ ଉଲ୍ଲଂଘନକାରୀଙ୍କୁ ଜଗିବେ ଜନତା, ଆପ୍ରେ ଅପ୍ଲୋଡ଼ କରିବେ ଫଟୋ ଓ ଭିଡିଓ
admin
3638
ଭୁବନେଶ୍ୱର : ନୂଆ ପରିବହନ ଆଇନ ଲାଗୁ ହେବା ପରେ ଏହାକୁ କଡ଼ାକଡ଼ି ଭାବେ କାର୍ଯ୍ୟକାରୀ କରିବାକୁ ଅଣ୍ଟା ଭିଡିଛନ୍ତି ସରକାର । ଏଥିପାଇଁ ପରିବହନ ବିଭାଗ ଲୋକଙ୍କ ସହଯୋଗ କାମନା କରିଛି । ଜନସାଧାରଣଙ୍କ ସହଯୋଗରେ ଟ୍ରାଫିକ ଉଲ୍ଲଂଘନକାରୀଙ୍କୁ ଦଣ୍ଡିତ କରିବାକୁ ପରିବହନ ବିଭାଗ ‘ସଡକ ସୁରକ୍ଷା ସିଟିଜେନ ରିପୋର୍ଟର’ ବ୍ୟବସ୍ଥା ନେଇ ସରକାରଙ୍କୁ ପ୍ରସ୍ତାବ ଦେଇଛି । ଏ ବ୍ୟବସ୍ଥାରେ ରାସ୍ତାଘାଟ ଏବଂ ସହରର ଗଳିକନ୍ଦିରେ ଯେଉଁମାନେ ଟ୍ରାଫିକ ନିୟମ ଭଙ୍ଗ କରୁଥିବେ ସାଧାରଣ ଲୋକେ ନିଜ ଫୋନରେ ଫଟୋ କିମ୍ବା ଭିଡିଓ ଉତ୍ତୋଳନ କରି ଏକ ନିର୍ଦ୍ଦିଷ୍ଟ ଆପ୍ରେ ଅପଲୋଡ଼ କରିବେ । ଏହାକୁ ଅନୁଧ୍ୟାନ କରି ପୁଲିସ ଓ ପରିବହନ ବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରିବେ । ତେବେ ଏ ପ୍ରସ୍ତାବ ଏଯାଏଁ ଅନୁମୋଦନ ପାଇନାହିଁ ।
କେନ୍ଦ୍ର ସରକାର ନୂଆ ପରିବହନ ନୀତି ଆଣିବା ପରେ ରାଜ୍ୟରେ କାଗଜପତ୍ର ପାଇଁ ୩ ମାସ ଲେଖାଏଁ ଦୁଇ ଥର ମହଲତ ମିଳିଛି । ମାତ୍ର ମଦ୍ୟପାନ କରି ଡ୍ରାଇଭି, ଦ୍ରୁତ ବେଗରେ ଡ୍ରାଇଭିଂ କିମ୍ବା ଟ୍ରାଫିକ ନିୟମ ଉଲ୍ଲଂଘନକାରୀଙ୍କୁ ଦଣ୍ଡବିଧାନ କରାଯାଉଛି । ଜନସଂଖ୍ୟା ଅନୁଯାୟୀ ପୁଲିସ କିମ୍ବା ପରିବହନ କର୍ମଚାରୀ ନଥିବାରୁ ନିୟମ ଉଲ୍ଲଂଘନକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପରିବହନ ବିଭାଗ ଲୋକଙ୍କ ସହଯୋଗ ଲୋଡ଼ିବ । ସାଧାରଣ ଲୋକ ନିଜ ଆଣ୍ଡ୍ରଏଡ ଫୋନରେ ନିୟମ ଭାଙ୍ଗୁଥିବା ଗାଡ଼ି ଓ ଚାଳକଙ୍କ ଫଟୋ କିମ୍ବା ଭିଡିଓ ଉଠାଇ ଆପ୍କୁ ପଠାଇବେ । ତେବେ କାଳେ ଏ ଆପର ଦୁରୁପଯୋଗ ହେବ, ଏ ଆଶଙ୍କାରେ ଏହାକୁ ଭଲରେ ଅନୁଧ୍ୟାନ ଓ ତର୍ଜମା କରିବାକୁ ଏନଆଇସି ଓ ଓକାକକୁ ନିର୍ଦ୍ଦେଶ ଦିଆଯାଇଛି । ଏ ଦୁଇ ସଂସ୍ଥା ଆପ ବ୍ୟବହାର ସମ୍ପର୍କରେ ଚୂଡାନ୍ତ ରିପୋର୍ଟ ଦେବା ପରେ ସରକାର ପଦକ୍ଷେପ ନେବେ ବୋଲି ସୂଚନା ମିଳିଛି ।
