ଟଙ୍କା ଦେଇ ଲୋକ ଠୁଳ କରୁଛନ୍ତି
ଟଙ୍କା ଦେଇ ଲୋକ ଠୁଳ କରୁଛନ୍ତି
admin
2676
ନୂଆଦିଲ୍ଲୀ: ଜାତୀୟ ନିରାପତ୍ତା ପରାମର୍ଶଦାତା ଅଜିତ ଡୋଭାଲ ଦକ୍ଷିଣ କାଶ୍ମୀରର ସୋପିଆନ ଅଞ୍ଚଳରେ ଲୋକଙ୍କ ସହ ଆଲୋଚନା କରିବା ଏବଂ ସେମାନଙ୍କ ସହିତ ଭୋଜନ କରିବାକୁ ନେଇ କଂଗ୍ରେସ ନେତା ଗୁଲାମନବୀ ଆଜାଦ ବିବାଦୀୟ ବୟାନ ଦେଇଛନ୍ତି । ପଇସା ଦେଇ କାହାକୁ ବି ନିଜ ପଟକୁ ଆଣି ହେବ ବୋଲି ଗୁଲମନବୀ ଆଜି ଗଣମାଧ୍ୟମକୁ କହିବା ପରେ ଏହାକୁ ନେଇ ତୀବ୍ର ବିବାଦ ସୃଷ୍ଟି ହୋଇଛି । ଏନଏସଏ ଡୋଭାଲ ଏବେ କାଶ୍ମୀରବାସୀଙ୍କୁ ଆଇନ ଶୃଙ୍ଖଳା ସ୍ଥିତି ନେଇ ଆଶ୍ୱସ୍ତ କରୁଥିବା ବେଳେ କଂଗ୍ରେସ ନେତାମାନେ ବିଭାଜନକାରୀ ବୟାନ ଦେଇ ମାମଲାକୁ ବିଗାଡ଼ୁଛନ୍ତି ବୋଲି ବିଭିନ୍ନ ମହଲରେ ମତ ଦେଇଛନ୍ତି । ଏହା ସହିତ ଗୁଲାମନବୀଙ୍କ ଏହି ବୟାନ ଭାରତ ବିରୋଧୀ ହୋଇଥିବାରୁ ଏହାକୁ ପାକିସ୍ଥାନ ଏକ ଅସ୍ତ୍ର ଭଳି ବ୍ୟବହାର କରିବ ବୋଲି ବିଜେପି ନେତା ଶାହନୱାଜ ହୁସେନ କହିଛନ୍ତି । ଗୁଲାମନବୀଙ୍କ ବିବାଦୀୟ ବୟାନ ପାଇଁ ଆଜି କଂଗ୍ରେସ ସୋସିଆଲ ମିଡିଆରେ କଡ଼ା ସମାଲୋଚନାର ଶିକାର ହୋଇଛି । ଧାରା ୩୭୦ କୁ ନେଇ ଦଳ ଭିତରେ ତୀବ୍ର କନ୍ଦଳ ବଢ଼ି ଚାଲିଥିବା ବେଳେ ଗୁଲାମନବୀ ନିଆଁରେ ଘିଅ ଢ଼ାଳିବା କାମ କରିଛନ୍ତି ବୋଲି ଅନେକ ନେତା ମତ ଦେଇଛନ୍ତି ।
