ଚାକିରି ନାମରେ ଠକେଇ, ଜଣେ ଗିରଫ
ଚାକିରି ନାମରେ ଠକେଇ, ଜଣେ ଗିରଫ
admin
2639
ପୁରୁଣା ଭୁବନେଶ୍ୱର: ବିଦେଶରେ ଚାକିରି କରାଇଦେବା ବାହାନାରେ କିଛି ଯୁବକଙ୍କଠାରୁ ୧୦ ଲକ୍ଷରୁ ଅଧିକ ଟଙ୍କା ଚଳୁ କରି ଦେଇଥିବା ଅଭିଯୋଗରେ ଏୟାରଫିଲଡ ଥାନା ଜଣେ ଯୁବକଙ୍କୁ ଗିରଫ କରିଛି । ଅଭିଯୁକ୍ତ ହେଲା, ଜଟଣୀ ଗଜପତି ନଗର ମହମ୍ମଦ ଅନସାରୀ (୪୨) । ସେ ଏୟାର ଫିଲ୍ଡ ଥାନା ଅଧୀନ ସୁନ୍ଦରପଦା ନିକଟ ସୃଷ୍ଟି ପ୍ଲାଜା ବ୍ଲକ ୨୦୩ ରେ ରହୁଛି । ଜାମିନ ନାମୁଞ୍ଜର ହେବା ପରେ ତାକୁ ଝାରପଡ଼ା ଜେଲ ପଠାଇ ଦିଆଯାଇଛି । ପୁଲିସ ସୂତ୍ରରୁ ମିଳିଥିବା ସୂଚନା ଅନୁସାରେ ଅନସାରି ସୁନ୍ଦରପଦା ମାରୁତି ମଣ୍ଡପ ନିକଟରେ ଇସରତ ମ୍ୟାନେଜମେଣ୍ଟ ଏଣ୍ଡ ସର୍ଭିସ ପ୍ରାଇଭେଟ ଲିମିଟେଡ ନାମକ ସଂସ୍ଥା ଜରିଆରେ ଲୋକଙ୍କୁ ବିଦେଶରେ ଚାକିରି କରାଇଦେବ ବୋଲି କହି ଠକି ଚାଲିଥିଲା । ସିଙ୍ଗାପୁର, ଜର୍ମାନୀ, ଦୁବାଇ ନାଇଜେରିଆ ଭଳି ବିଦେଶରେ ଉଚ୍ଚ ଦରମାରେ ଚାକିରି କରାଇ ଦେବାକୁ କହି ଯୁବକମାନଙ୍କୁ ପ୍ରଲୋଭିତ କରୁଥିଲା । ତେବେ ବିଦେଶୀ କମ୍ପାନୀରେ ନାମ ପଞ୍ଜୀକରଣ, ପାସପୋର୍ଟ ଭିସା ଆଦି ବିଭିନ୍ନ ବାହାନା କରି ପ୍ରଥମେ ସେ ଯୁବକମାନଙ୍କଠାରୁ ଅର୍ଥ ସଂଗ୍ରହ କରୁଥିଲା । ଏସବୁ ବାବଦରେ ସେ ଜଣପିଛା ଲକ୍ଷାଧିକ ଟଙ୍କା ଆଦାୟ କରୁଥିଲା । ତେବେ ଶେଷ ଅଭିଯୋଗ ଅନୁସାରେ ପାଖାପାଖି ୧୦ ଲକ୍ଷ ଟଙ୍କା ଠକି ନେଇଥିଲା । ବାରମ୍ବାର ଧାଇଁବା ପରେ ହତାଶ ହୋଇ ଜଗତସିଂହପୁର ତିର୍ତ୍ତୋଲ ଅଞ୍ଚଳର ସମରେନ୍ଦୁ ରାଉତ ଏ ବାବଦରେ ଏୟାର ଫିଲ୍ଡ ଥାନାରେ ଅଭିଯୋଗ ହୋଇଥିଲା । ଥାନାରେ ଅଭିଯୋଗ ହେବା ଜାଣିବା ପରେ ଅନସାରି ଫୋନ ଅଫ କରି ଫେରାର ହୋଇଯାଇଥିଲା । କିନ୍ତୁ ଥାନା ଅଧିକାରୀ ଫୋନ ଟ୍ରାକ କରି ଅନସାରିକୁ ଠାବ କରିବା ସହ ଗିରଫ କରିଥିଲେ ।
