ଖରା ଦିନେ କେମିତି ରହିବେ ଫିଟ
ଖରା ଦିନେ କେମିତି ରହିବେ ଫିଟ
admin
4575
ଅତ୍ୟଧିକ ଖରାରେ ସର୍ବଦା ସ୍ବାସ୍ଥ୍ୟଗତ ସମସ୍ୟା ଦେଖା ଦେଇଥାଏ। ଏହାସହ ଯେକୌଣସି ରୋଗ ହେଲେ ଖରା ଦିନେ ଅନେକ ଅସୁସ୍ଥତା ଅନୁଭବ ହୋଇଥାଏ। ତେବେ ଏହି ସବୁ ସମସ୍ୟାରୁ ସଚେତନ ହେବା ଉଚିତ।
ଖରା ଦିନିଆ ସ୍ବାସ୍ଥ୍ୟ ସମସ୍ୟା :
ଅଂଶୁଘାତ :
ଅତ୍ୟଧିକ ଖରା ଓ ଗରମ ଯୋଗୁଁ ବ୍ୟକ୍ତିଙ୍କୁ ଅଂଶୁଘାତର ଶିକାର ହେବାକୁ ପଡିଥାଏ। ଏହାର ପ୍ରଭାବରେ ମୁଣ୍ଡ ବୁଲାଇବା ସହ ବାନ୍ତି ହେବା, ଜ୍ବର ଆସିବା ଲକ୍ଷଣ ଦେଖା ଯାଇଥାଏ। ସେଥିପାଇଁ ଖରାରେ ବାହାରିବା ବେଳେ ମୁଣ୍ଡକୁ ଘୋଡାଇ ବାହାରନ୍ତୁ। ଖରା ଦିନେ ବିଶେଷ କରି ଅଧିକ ପାଣି ପିଇବା ସହ ନିଜ ସହ ଲେମ୍ବୁ ପାଣି ଓ ଦହି ପାଣି ନେଇ ଯାଆନ୍ତୁ।
ଜଳୀୟ ଅଂଶ କମିଯିବା :
ଶରୀରରେ ଜଳୀୟ ଅଂଶର ଅଭାବ ହେଲେ ବଦହଜମୀ ସମସ୍ୟା ଦେଖା ଯାଇଥାଏ। ବଦହଜମୀ ହେବା ଦ୍ବାରା ମୁଣ୍ଡ ବୁଲାଇବା, କ୍ଲାନ୍ତପଣ, ମୁଣ୍ଡ ବ୍ୟଥା ପରି ସମସ୍ୟା ସୃଷ୍ଟି ହୋଇଥାଏ। ତେଣୁ ଦିନକୁ ଅତି କମରେ ୮ରୁ ୧୦ ଗ୍ଲାସ୍ ପାଣି ପିଅନ୍ତୁ। ଏହାସହ ଫଳରସ, ଲସି ଓ ଘୋଳ ଦହି ପିଇପାରିବେ।
ଫୁଡ୍ ପଏଜନିଂ :
ଖରା ଦିନେ ଖାଦ୍ୟ ଶୀଘ୍ର ବାସି ହୋଇଯାଏ। ବାସୀ ଖାଦ୍ୟ ଖାଇବା ଓ ଦୂଷିତ ପାଣି ପିଇବା ଦ୍ବାରା ଯୋଗୁଁ ଫୁଡ ପଏଜନିଂ ହୋଇଥାଏ। ଏହା ହେଲେ ଶରୀରରେ ଯନ୍ତ୍ରଣା, ଦୁର୍ବଳତା, ଜ୍ବର, ବାନ୍ତି, ଡାଇରିଆ, ମୁଣ୍ଡବ୍ୟଥା ଇତ୍ୟାଦି ହୋଇଥାଏ। ତେଣୁ ବିଶେଷ କରି ଖରାଦିନେ ବାହାରର ଛଣାଛଣି ଖାଦ୍ୟ ନ ଖାଇ ଘର ଖାଦ୍ୟ ଖାଆନ୍ତୁ। ଏହାସହ ଗରମ ଖାଦ୍ୟ ଓ ବିଶୁଦ୍ଧ ପାଣି ପିଅନ୍ତୁ।
ଜଣ୍ଡିସ୍ :
ଖରାଦିନେ ଅସ୍ବାସ୍ଥ୍ୟକର ଖାଦ୍ୟ ଓ ଅପରିଷ୍କାର ପାଣି ପିଇବା ଦ୍ବାରା ଜଣ୍ଡିସ୍ ହୋଇପାରେ। ଜଣ୍ଡିସ ହେବା ଦ୍ବାରା ନଖ, ମୂତ୍ର, ଚର୍ମ ଓ ଆଖି ହଳଦିଆ ପଡିଯାଏ। ତେଣୁ ବାହାରର ଖାଦ୍ୟ ଖାଆନ୍ତୁ ନାହିଁ ଓ ପରିଷ୍କାର ପାଣି ପିଇବା ସହ ସ୍ବଚ୍ଛ ପରିବେଶରେ ରୁହନ୍ତୁ।
ଟାଇଫଏଡ :
ଖରାଦିନେ ସଂକ୍ରମଣ ଜନିତ ଓ ଦୂଷିତ ପାଣି କାରଣରୁ ଟାଇଫଏଡ ରୋଗ ହୋଇଥାଏ। ଖରା ଦିନେ ବାହାରର ପାଣି ଓ ଖାଦ୍ୟ ଠାରୁ ଯଥେଷ୍ଟ ଦୂରେଇ ରୁହନ୍ତୁ। ଏହାସହ ଖାଦ୍ୟ ଖାଇବା ପୂର୍ବରୁ ହାତକୁ ଭଲ ଭାବେ ଧୁଅନ୍ତୁ।
