ଖାଉଛନ୍ତି କି ତମାଖୁ ? ସାବଧାନ, ବିପଦ ସୃଷ୍ଟି କରୁଛି କୋଭିଡ୍
admin
ଭୁବନେଶ୍ବର: ତମାଖୁ ସେବନକାରୀଙ୍କ ପାଇଁ ବିପଦ ସୃଷ୍ଟି କରୁଛି କୋଭିଡ୍। ସଂକ୍ରମିତ ବ୍ୟକ୍ତି ଗୁରୁତର ହୋଇ ପଡ଼ିବା ସହିତ କୋଭିଡ୍ ପରବର୍ତୀ ଜଟିଳତା ବଢ଼ାଉଛି। ଏମ୍ସ ଦେଓଘର(ଝାରଖଣ୍ଡ), ଜାତୀୟ ମାନସିକ ସ୍ବାସ୍ଥ୍ୟ ଓ ନ୍ୟୁରୋସାଇନ୍ସ(ନିମାହନ୍ସ) ଓ କର୍ଣ୍ଣାଟକର ତମାଖୁ ନିୟନ୍ତ୍ରଣ କାର୍ଯ୍ୟକ୍ରମ ପକ୍ଷରୁ ହୋଇଥିବା ଗବେଷଣାରୁ ଏକଥା ସ୍ପଷ୍ଟ ହୋଇଛି। କର୍ଣ୍ଣାଟକରେ ଏହି ଗବେଷଣା କରାଯାଇଥିଲା। ଯୁବପିଢ଼ିଙ୍କ କ୍ଷେତ୍ରରେ ସିଗାରେଟ୍ ସେବନର ମାତ୍ର ଅଧିକ ଥିବା ବେଳେ କୋଭିଡ୍ ମଧ୍ୟ ବିଷମ ପରିସ୍ଥିତି ସୃଷ୍ଟି କରୁଛି।
କୋଭିଡ୍ରୁ ସୁସ୍ଥ ହେବା ପରେ ସେମାନଙ୍କ ନିକଟରେ ହୃଦ୍ ଓ ମାନସିକ ସ୍ବାସ୍ଥ୍ୟ ସମସ୍ୟା ବୃଦ୍ଧି ପାଉଥିବା ନଜରକୁ ଆସୁଛି। କେତେକ ରୋଗୀଙ୍କ କ୍ଷେତ୍ରରେ ସଂକ୍ରମଣ ସମୟରେ ହିଁ ଏକାଧିକ ନୂଆ ନୂଆ ସ୍ବାସ୍ଥ୍ୟ ସମସ୍ୟା ସୃଷ୍ଟି କରୁଥିବା ଦେଖିବାକୁ ମିଳୁଛି। ସୋସିଆଲ ସାଇନ୍ସ ଗବେଷଣା ନେଟୱାର୍କରେ ଏହି ଗବେଷଣା ରିପୋର୍ଟ ପ୍ରକାଶିତ ହୋଇଛି। ମାର୍ଚ୍ଚ ୨୦୨୦ରୁ ଡିସେମ୍ବର ୨୦୨୧ ମଧ୍ୟରେ କୋଭିଡରେ ସଂକ୍ରମିତ ହୋଇଥିବା ଉଭୟ ତମାଖୁ ସେବନକାରୀ ଓ ଅଣ ସେବନକାରୀଙ୍କ ଉପରେ ଗବେଷଣା ହୋଇଥିଲା। ଦୁଇଟି ପର୍ଯ୍ୟାୟରେ ଏହି ଗବେଷଣା ହୋଇଥିଲା।
ପ୍ରଥମ ପର୍ଯ୍ୟାୟରେ ୧୯୩୮ ଜଣଙ୍କୁ ମେସେଜ୍ ଜରିଆରେ ଓ ଦ୍ବିତୀୟ ପର୍ଯ୍ୟାୟରେ ୯୦୨ ଲୋକଙ୍କୁ ଟେଲିଫୋନ୍ ଜରିଆରେ ଏହି ସର୍ଭେରେ ସାମିଲ କରାଯାଇଥିଲା। ପ୍ରଥମ ପର୍ଯ୍ୟାୟରେ ୧୪୯୮ ପୁରୁଷ(୭୮.୩%) ଓ ୪୩୯(୨୨.୬%)ମହିଳା ଓ ଜଣେ ତୃତୀୟଲିଙ୍ଗୀଙ୍କ ସାକ୍ଷାତକାର କରାଯାଇଥିଲା। ସେମାନଙ୍କ ବୟସ ୩୧-୪୦ବର୍ଷ ରହିଥିଲା। ଦ୍ବିତୀୟ ପର୍ଯ୍ୟାୟରେ ୯୦୨ ଲୋକଙ୍କୁ ସାମିଲ କରାଯାଇଥିବା ବେଳେ ଏଥିରେ ୬୭୫ ପୁରୁଷ ଓ ୨୨୬ଜଣ ମହିଳା ଓ ଜଣେ ତୃତୀୟଲିଙ୍ଗୀ ରହିଥିଲେ। ପ୍ରକୃତରେ ତମାଖୁ ସେବନକାରୀଙ୍କ କ୍ଷେତ୍ରରେ କୋଭିଡର ଭୟବହତା କେତେ ତାହାର ଅନୁଧ୍ୟାନ କରିବା ହିଁ ଏହାର ମୁଖ୍ୟ ଉଦ୍ଦେଶ୍ୟ ରହିଥିଲା। ଜୀବନବ୍ୟାପୀ ତମାଖୁ ସେବନ କରୁଥିବା ବ୍ୟକ୍ତିଙ୍କ କ୍ଷେତ୍ରରେ କୋଭିଡ ସଂକ୍ରମଣ ୨୫ ପ୍ରତିଶତ(ପ୍ରଥମ ପର୍ଯ୍ୟାୟ) ଓ ଦ୍ବିତୀୟ ପର୍ଯ୍ୟାୟରେ ଏହା ୧୯ ପ୍ରତିଶତ ରହିଛି।
ଗବେଷଣାରେ କୁହାଯାଇଛି ଯେ କୋଭିଡ ସଂକ୍ରମଣ ପରେ ଏକ ତୃତୀୟାଂଶ ତମାଖୁ ସେବନକାରୀ ତମାଖୁ ବର୍ଜନ କରୁଛନ୍ତି। ତମାଖୁ ସେବନକାରୀଙ୍କ କ୍ଷେତ୍ରରେ ହୃଦ୍ରୋଗ ସମସ୍ୟା ଥିବା ବେଳେ କରୋନା ସଂକ୍ରମଣ ଏହାକୁ ଆହୁରି ବଢ଼ାଇ ଦେଉଛି। ତେଣୁ ଅଧିକରୁ ଅଧିକ ସଚେତନତା ସହିତ ତମାଖୁ ବର୍ଜନକାରୀଙ୍କ ସଂଖ୍ୟା ବଢ଼ାଇବାର ଆବଶ୍ୟକତା ରହିଛି। ବିଶ୍ବ ବୟସ୍କ ତମାଖୁ ସର୍ଭେ(ଜିଏଟିଏସ୍) ୨୦୨୬-୧୭ ମସିହା ଅନୁସାରେ ଦେଶରେ ୨୮.୬ ପ୍ରତିଶତ ଲୋକ ତମାଖୁ ସେବନ କରୁଛନ୍ତି। ସିଗାରେଟ୍ ସେବନ ଫଳରେ କୋଭିଡ ସଂକ୍ରମଣକାରୀଙ୍କ କ୍ଷେତ୍ରରେ ଏହା ମୃତ୍ୟୁହାରକୁ ବଢ଼ାଇ ଦେଉଛି। ବିଶେଷକରି ସିଗାରେଟ୍ ସେବନ କରୁଥିବା ଯୁବପିଢ଼ିଙ୍କ କ୍ଷେତ୍ରରେ ଫଳାଫଳ ଅତ୍ୟନ୍ତ ଖରାପ ରହିଛି।
