ହୀରାକୁଦ ଖୋଲିଲେ କିଛି ଅସୁବିଧା ନାହିଁ : ଏସଆରସି
user1
ଭୁବନେଶ୍ୱର : ସାରା ରାଜ୍ୟରେ ବର୍ଷା ଜାରି ରହିଛି । କେତେକ ସ୍ଥାନରେ ମୂଷଳ ଧାରାରେ ବର୍ଷା ମଧ୍ୟ ହୋଇଛି । ତେବେ ଅନେକ ନଦୀରେ ଜଳସ୍ତର କମି ରହିଥିବା ଦେଖିବାକୁ ମିଳୁଛି । ତେଣୁ ହୀରାକୁଦ ବନ୍ଧ ଖୋଲିଲେ ଅସୁବିଧା ନାହିଁ ବୋଲି ସୂଚନା ଦେଇଛନ୍ତି ଏସଆରସି ସତ୍ୟବ୍ରତ ସାହୁ ।
ଅପରପକ୍ଷରେ ଆସନ୍ତା ୨୭ ପର୍ଯ୍ୟନ୍ତ ରାଜ୍ୟରେ ଲଘୁଚାପ ଜନିତ ବର୍ଷାର ଆଶଙ୍କା ରହିଛି । ପ୍ରଥମେ ପଶ୍ଚିମ ଓ ପରେ ଉପକୂଳ ଓଡ଼ିଶାରେ ବର୍ଷା ହେବ । ଏଥିପାଇଁ ଜିଲ୍ଲାପାଳମାନଙ୍କୁ ସ୍ୱତନ୍ତ୍ର ରିଲିଫ କମିଶନର ସତର୍କ କରାଇ ଦେଇଛନ୍ତି । ସମ୍ବେଦନଶୀଳ ଅଂଚଳ ଉପରେ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି ବୋଲି ଶ୍ରୀ ସାହୁ କହିଛନ୍ତି ।
ଆସନ୍ତା ୨୩ରେ ହୀରାକୁଦ ଡ୍ୟାମ ଖୋଲାଯିବ । ଉପରମୁଣ୍ଡରେ ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରର ଜଳସ୍ତର ବଢ଼ିଛି । ସେହିପରି ମହାନଦୀ ଓ ଶାଖା ନଦୀରେ ବି ଅଧିକ ଜଳ ପ୍ରବାହିତ ହେଉଛି । ଆଗାମୀ ଦିନରେ ବି ବଡ଼ ବର୍ଷା ହେବାର ସମ୍ଭାବନା ରହିଛି । ତେଣୁ ଏସବୁକୁ ନଜରରେ ରଖି କର୍ଭ ରୁଲ ଆଧାରରେ ହୀରାକୁଦ ଡ୍ୟାମ ଗେଟ ଖୋଲିବା ନେଇ ନିଷ୍ପତି ନିଆଯାଇଛି । ୨୩ରୁ ପ୍ରଥମ ବନ୍ୟା ଜଳ ପ୍ରବାହିତ ହେବାର ଥିବାରୁ ସତର୍କ ରହିବାକୁ କୁହାଯାଇଛି । ଜନସାଧାରଣ ଏନେଇ ଆଗୁଆ ସତର୍କ ହେବାକୁ ହୀରାକୁଦ ବନ୍ଧ କର୍ତୃପକ୍ଷ ସୂଚନା ଦେଇଛନ୍ତି ।
