ନିଆଳି ନିର୍ବାଚନ ମଣ୍ଡଳୀରେ ନିର୍ବାଚନ ଆଚରଣ ବିଧି ଉଲ୍ଲଙ୍ଘନ, ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଲା କଂଗ୍ରେସ
ANGIKAR NEWS
7747
ପ୍ରଦେଶ କଂଗ୍ରେସ କମିଟିର ସାମାଜିକ ଗଣମାଧ୍ୟମର ଅଧ୍ୟକ୍ଷ ଶ୍ରୀ ଅମିୟ ପାଣ୍ଡବଙ୍କ ନେତୃତ୍ୱରେ ଏକ ପ୍ରତିନିଧି ଦଳ ନିଆଳି ବିଧାନସଭା ନିର୍ବାଚନ ମଣ୍ଡଳୀରେ ନିର୍ବାଚନ ଆଚରଣ ବିଧିର ଉଲ୍ଲଙ୍ଘନ ହୋଇଥିବାର ଅଭିଯୋଗ ପତ୍ର ମୁଖ୍ୟ ନିର୍ବାଚନ ଅଧିକାରୀଙ୍କୁ ପ୍ରଦାନ କରାଯାଇଥିଲା । କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି ଯେ ମିଶନ ଶକ୍ତିରେ କାର୍ଯ୍ୟରତ ମହିଳା ଅଧିକାରୀ ଖୋଲାଖୋଲି ଭାବରେ ବିଜୁ ଜନତା ଦଳ ସପକ୍ଷରେ ପ୍ରଚାର କରୁଛନ୍ତି ।
ନିଆଳି ବ୍ଲକ ମିଶନ ଶକ୍ତି ମହିଳା ମହା ସଂଘର ସଭାପତି ରେଣୁବାଳା ଜେନା ଏବଂ ସଂପାଦିକା ସତ୍ୟସ୍ମିତା ପାଣିଙ୍କ ନେତୃତ୍ୱରେ କିଛି ମିଶନଶକ୍ତି ମହାସଂଘରେ କାର୍ଯ୍ୟରତ ମହିଳା ଗାଁ ଗାଁ ବୁଲି ବିଜୁ ଜନତା ଦଳ ପ୍ରାର୍ଥୀଙ୍କ ସପକ୍ଷରେ ଭୋଟ ମାଗୁଛନ୍ତି । ସେମାନେ ପ୍ରତି ଗାଁରେ ମହିଳା ସ୍ୱୟଂ ସହାୟିକା ଗୋଷ୍ଠୀଙ୍କୁ ଭେଟି ସେମାନଙ୍କୁ ପ୍ରଲୋଭନ ଦେଖାଉଛନ୍ତି । ଏପରିକି ଶଙ୍ଖ ଚିହ୍ନରେ ଭୋଟ ଦେବାକୁ ବାଧ୍ୟ କରୁଛନ୍ତି । ସେମାନେ ବିଜେଡ଼ି ଦଳୀୟ ସଭାରେ ଯୋଗଦେଉଛନ୍ତି ଏବଂ ସ୍ୱୟଂ ସହାୟିକା ଗୋଷ୍ଠୀର ମହିଳାମାନଙ୍କୁ ସଭାସ୍ଥଳକୁ ଡାକି ବିଜେଡ଼ି ପ୍ରାର୍ଥୀଙ୍କୁ ଭୋଟ ଦେବାକୁ ଶପଥ କରାଉଛନ୍ତି ।
ସେହିପରି ନିଆଳି ବ୍ଲକର ଅଁଳ ଗ୍ରାମପଂଚାୟତର କଂଟାପଡ଼ା ଗ୍ରାମର ଅଙ୍ଗନବାଡି ଦିଦି ଲିପିକା ନାୟକ ବିଜେଡ଼ି ବିଧାୟକଙ୍କ ସାଧାରଣ ନିର୍ବାଚନୀ ସଭାରେ ବିଜେଡ଼ିର ଗୁଣଗାନ କରି ଗୀତ ଗାଇବା ସହ ବିରୋଧି ଦଳଙ୍କୁ ତାଚ୍ଛଲ୍ୟ କରୁଛନ୍ତି । ସେହି ପଂଚାୟତର ନୂଆବାବଜା ଗ୍ରାମର ଅଙ୍ଗନବାଡ଼ି କର୍ମୀ ମଳୟ ରାଉତ ବିଜେଡ଼ିର ନିର୍ବାଚନୀ ସଭାରେ ଯୋଗଦେବା ସହ ସ୍ୱୟଂସହାୟିକ ଗୋଷ୍ଠୀର ସଭ୍ୟାମାନଙ୍କୁ ବିଜେଡ଼ି ଦଳୀୟ ସଭାରେ ଯୋଗଦେବା ପାଇଁ ପ୍ରବର୍ତାଉଛନ୍ତି । ଶଙ୍ଖଚିହ୍ନରେ ଭୋଟ ଦେବାପାଇଁ ବିଭିନ୍ନ ପ୍ରଲୋଭନ ଦେଖାଉଛନ୍ତି । ଏଠାରେ ସୂଚନାଯୋଗ୍ୟ ଯେ ନିଆଳି ବିଧାୟକ ପ୍ରମୋଦ ମଲ୍ଲିକ ଏମାନେ ପ୍ରଚାର କରୁଥିବାର ଭିଡିଓ ନିଜ ଫେସବୁକ ଆକାଂଟରେ ଅପଲୋଡ଼ କରିଛନ୍ତି । ଏଣୁ ଏହା ସ୍ପଷ୍ଟ ଯେ ବିଧାୟକ ଶ୍ରୀ ମଲ୍ଲିକ ସ୍ୱୟଂସହାୟକ ଗୋଷ୍ଠିର ସଭ୍ୟା ଏବଂ ଅଙ୍ଗନବାଡ଼ି କର୍ମୀମାନଙ୍କୁ ବିଜେଡ଼ି ନିର୍ବାଚନୀ କାର୍ଯ୍ୟରେ ନିୟୋଜିତ କରିବାପାଇଁ ଏମାନଙ୍କୁ ଅସ୍ତ୍ର କରିଛନ୍ତି ।
ଏ ସମ୍ପର୍କରେ ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଏକ ସାମ୍ବଦିକ ସମ୍ମିଳନୀ କରାଯିବାପରେ ଦଳପକ୍ଷରୁ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ଆଚରଣବିଧି ଉଲ୍ଲଙ୍ଘନ ବାବଦରେ ଅବଗତ କରାଯାଇଥିଲା । ଏହି ପ୍ରତିନିଧି ମଣ୍ଡଳୀରେ ପ୍ରଦେଶ କଂଗ୍ରେସ କମିଟି ସାଧାରଣ ସଂପାଦକ ଶ୍ରୀ ଶଶିକାନ୍ତ ଲେଙ୍କା, ଡ. ମନିଷା ଦାସ ପଟ୍ଟନାୟକ, ରାହୁଲ ମହାନ୍ତି ପ୍ରମୁଖ ଉପସ୍ଥିତ ଥିଲେ ।
