ଘୋର ଆର୍ଥିକ ସଙ୍କଟରେ ଆମେରିକା
admin
ୱାସିଂଟନ: ବିଶ୍ବର ସବୁଠୁ ଶକ୍ତିଶାଳୀ ରାଷ୍ଟ୍ର ରୂପେ ପରିଚିତ ଆମେରିକା ଏବେ ଘୋର ଆର୍ଥିକ ସଙ୍କଟ ଦେଇ ଗତି କରୁଛି। ସରକାରୀ ପାଣ୍ଠି ସରିବାକୁ ବସିଲାଣି। ନୂଆ ପାଣ୍ଠି ସଂଗ୍ରହ ପାଇଁ ସଂସଦ (କଂଗ୍ରେସ)ର ଅନୁମତି ଦରକାର ଥିବା ବେଳେ ସରକାର ଓ ବିରୋଧୀ ଦଳ ମଧ୍ୟରେ ବିବାଦ ଯୋଗୁଁ ଏହା ସମ୍ଭବ ହୋଇପାରୁ ନାହିଁ। ଏହାର ଶୀଘ୍ର ସମାଧାନ ନହେଲେ ଆମେରିକାର ଅର୍ଥନୀତି ଭୁଶୁଡ଼ି ପଡ଼ିବାକୁ ବେଶି ସମୟ ଲାଗିବ ନାହିଁ।
ଏଭଳି ପରିସ୍ଥିତି ସୃଷ୍ଟି ହେଲେ ସାରା ବିଶ୍ବର ଅର୍ଥନୀତି ପ୍ରଭାବିତ ହେବ ବୋଲି ବିଶେଷଜ୍ଞମାନେ ମତ ଦେଇଛନ୍ତି। ଆମେରିକାରେ ଗୋଟିଏ ପରେ ଗୋଟିଏ ବ୍ୟାଙ୍କ ଦେବାଳିଆ ହେବାରେ ଲାଗିଥିବା ବେଳେ ପାଣ୍ଠି ସଙ୍କଟ ପରିସ୍ଥିତିକୁ ଜଟିଳ କରି ପକାଇଛି। ଆମେରିକା ହେଉଛି ବିଶ୍ବ ଅର୍ଥନୀତିର ମୂଳ କେନ୍ଦ୍ର। ଏହା ଉପରେ ବିଶ୍ବର ଅଧିକାଂଶ ଦେଶ ଓ ବିଶ୍ବସ୍ତରୀୟ ସଂସ୍ଥା ନିର୍ଭରଶୀଳ। ଏହା ବିଭିନ୍ନ ଦେଶକୁ ଆର୍ଥିକ ଓ ସାମରିକ ସହାୟତା ପ୍ରଦାନ କରୁଛି। ବିଶ୍ବବ୍ୟାଙ୍କ, ଆନ୍ତର୍ଜାତିକ ମୁଦ୍ରା ପାଣ୍ଠି (ଆଇଏମ୍ଏଫ୍), ଜାତିସଂଘ, ବିଶ୍ବ ସ୍ବାସ୍ଥ୍ୟ ସଂଗଠନ ଆଦି ଅନେକ ସଂସ୍ଥା ଆମେରିକୀୟ ସହାୟତା ଉପରେ ନିର୍ଭର କରିଥାନ୍ତି। ଯଦି ଆମେରିକାରେ ଆର୍ଥିକ ସଙ୍କଟ ଦେଖାଦେବ, ଏହା ଉପରେ ନିର୍ଭରଶୀଳ ଥିବା ସବୁ ଦେଶ ଓ ସଂଗଠନ ଦୁର୍ବଳ ହେଇପଡ଼ିବ ଯାହା ସାରା ବିଶ୍ବରେ ଘୋର ଅସ୍ଥିରତା ସୃଷ୍ଟି କରିବ।
ଆମେରିକାରୁ ଆର୍ଥିକ ସହାୟତା ପାଉଥିବା ଗରିବ ଦେଶଗୁଡ଼ିକରେ କ୍ଷୁଧା, ଅନାହାର ଓ ଦାରିଦ୍ର୍ୟ ବଢ଼ିଯିବ। ବିଶ୍ବ ସ୍ତରରେ ଷ୍ଟକ ବଜାର ଭୁଶୁଡ଼ି ପଡ଼ିବ। ବ୍ୟାଙ୍କଗୁଡ଼ିକ ଦୁର୍ବଳ ହୋଇପଡ଼ିବେ। ସମସ୍ୟା ସୃଷ୍ଟି ହୋଇଛି ଖୋଲା ବଜାରରୁ ଋଣ ଉଠାଣକୁ ନେଇ। ବିଭିନ୍ନ ଖର୍ଚ୍ଚ ଲାଗି ସରକାର ଖୋଲା ବଜାରରୁ ଋଣ ଉଠାଇଥାଆନ୍ତି। ତେବେ ଏହି ଋଣ ଉଠାଣ ପାଇଁ ସୀମା ଧାର୍ଯ୍ୟ ହୋଇଥାଏ। ଅଧିକ ଅର୍ଥ ଦରକାର ପଡ଼ିଲେ ସରକାର ଏହି ଋଣ ସୀମା ବୃଦ୍ଧି କରନ୍ତି। ଏହା ଏକ ନିୟମିତ ଏବଂ ଆଇନଗତ ପ୍ରକ୍ରିୟା। ତେବେ ସୀମା ବୃଦ୍ଧି ଲାଗି ଆମେରିକୀୟ କଂଗ୍ରେସ ବା ସଂସଦର ଅନୁମତି ଦରକାର।
ବର୍ତ୍ତମାନ ସରକାରଙ୍କ ପାଖରେ ଯେତିକି ନଗଦ ରହିଛି ତାହା ଧୀରେ ଧୀରେ ଶେଷ ହେବାରେ ଲାଗିଛି। ଋଣ ସୀମାକୁ ବଢ଼ାଇବାରେ ସରକାର ଅସମର୍ଥ ହେଲେ ଆମେରିକା ପାଖରେ ଥିବା ସବୁ ନଗଦ ଅର୍ଥ ଜୁନ୍ ୧ ସୁଦ୍ଧା ଶେଷ ହୋଇଯିବ। ସରକାର ଆଉ କୌଣସି ଦେୟ ଦେଇପାରିବେ ନାହିଁ ବୋଲି ଆମେରିକାର ଟ୍ରେଜେରି ସଚିବ ଜାନେଟ୍ ୟାଲେନ୍ କହିଛନ୍ତି। ଏକ ଆକଳନରୁ ଜଣାପଡ଼ିଛି ଯେ ଯଦି ଆମେରିକା ଋଣ ଖିଲାପ କରିବ କିମ୍ବା ନିଜ ଉପରେ ଥିବା ଆର୍ଥିକ ଦାୟିତ୍ବକୁ ନିର୍ବାହ କରିବାରେ ବିଫଳ ହେବ, ତେବେ ଗୋଟିଏ ଝଟ୍କାରେ ୭୦ ଲକ୍ଷ ଚାକିରି ଚାଲିଯିବ। ଆମେରିକାର ଅଭିବୃଦ୍ଧି ହ୍ରାସ ପାଇବ ଯାହା ବିଶ୍ବ ଅର୍ଥନୀତିକୁ ତଳକୁ ଟାଣିବ।
ସୂଚନାଯୋଗ୍ୟ ଯେ ଆମେରିକା ଅର୍ଥନୀତି ଜଟିଳ ସ୍ଥିତି ଦେଇ ଗତି କରୁଛି। ସେଠାରେ ସରକାରଙ୍କ ବ୍ୟୟ ତୁଳନାରେ ଆୟ କମ୍ ରହିଛି। ସେଥିପାଇଁ ବିତ୍ତୀୟ ନିଅଣ୍ଟ ଉଚ୍ଚ ସ୍ତରରେ ରହିଛି। ଆୟ କମ୍ ରହୁଥିବାରୁ ବୈଧାନିକ ଦାୟିତ୍ବଗୁଡ଼ିକୁ ନିର୍ବାହ କରିବା ଲାଗି ଆମେରିକା ସରକାରଙ୍କୁ ଋଣ ଉପରେ ନିର୍ଭରଶୀଳ ରହିବାକୁ ପଡ଼ୁଛି। ୨୦୨୩ ମାର୍ଚ୍ଚ ସୁଦ୍ଧା ଆମେରିକାର ବିତ୍ତୀୟ ନିଅଣ୍ଟ ୩୦ ଲକ୍ଷ କୋଟି ଟଙ୍କାରୁ ଅଧିକ ହୋଇଯାଇଛି। ଆଗକୁ ଖର୍ଚ୍ଚ ତୁଲାଇବା ଲାଗି ଆମେରିକାକୁ ୭୨,୬୦୦ କୋଟି ଡଲାର ଋଣ ଦରକାର ଯାହା ଜାନୁଆରିରେ ଦିଆଯାଇଥିବା ପ୍ରସ୍ତାବ ତୁଳନାରେ ୪୪,୯୦୦ କୋଟି ଡଲାର ଅଧିକ।
