୩୦ ପୂର୍ବରୁ ବିଧାନସଭା ଅଧିବେଶନ
୩୦ ପୂର୍ବରୁ ବିଧାନସଭା ଅଧିବେଶନ
admin
6257
ଭୁବନେଶ୍ୱର: ସେପ୍ଟେମ୍ବର ୩୦ ତାରିଖ ପୂର୍ବରୁ ବିଧାନସଭା ବସିବ । ଏନେଇ ସୂଚନା ଦେଇଛନ୍ତି ବିଧାନସଭାର ବାଚସ୍ପତି ସୂର୍ଯ୍ୟନାରାୟଣ ପାତ୍ର । ସେ କହିଛନ୍ତି ଯେ, ବର୍ତ୍ତମାନ ରାଜସ୍ଥାନ ବିଧାନସଭା ଅଧିବେଶନ ବସିଛି । ଲୋକସଭା ବାଚସ୍ପତି ଓ ସଚିବଙ୍କ ସହ ଏନେଇ କଥା ହୋଇଛି । ଗାଇଲାଇନ ଆସିବା ପରେ ରାଜ୍ୟର କରୋନା ସ୍ଥିତି ଦେଖି ନିଷ୍ପତ୍ତି ହେବ । ପ୍ରଥମେ ଲୋକସଭାର କାର୍ଯ୍ୟ ଦେଖିବା ପରେ ନିଷ୍ପତ୍ତି ନେବୁ ବୋଲି ବାଚସ୍ପତି ସୂର୍ଯ୍ୟନାରାୟଣ ପାତ୍ର କହିଛନ୍ତି ।
ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ କୋଭିଡ ପାଇଁ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ୨ଟି ଅଧ୍ୟାଦେଶ, ଅର୍ଥ ବିଭାଗର ୪ଟି, ଶ୍ରମ ବିଭାଗର ୪ଟି, ସମବାୟ ବିଭାଗର ୨ଟି, ଆଇନ ଏବଂ ଗୃହ ଓ ନଗର ଉନ୍ନୟନ ବିଭାଗର ଗୋଟିଏ ଲେଖାଏଁ ଅଧ୍ୟାଦେଶ ବିଲ ପାରିତ ହେବାର ଅଛି । ଏଥିପାଇଁ ଏସବୁ ବିଭାଗକୁ ସଂସଦୀୟ ବ୍ୟାପାର ବିଭାଗ ଚିଠି ଲେଖିଛି । ସମ୍ବିଧାନର ଧାରା ୧୭୪ ଅନୁଯାୟୀ ଗୋଟିଏ ଅଧିବେଶନ ସରିବାର ୬ ମାସ ଭିତରେ ପରବର୍ତ୍ତୀ ଅଧିବେଶନ ଡକାଯିବା ନିୟମ ରହିଛି । ଓଡ଼ିଶା ବିଧାନସଭା ବଜେଟ ଅଧିବେଶନ ଗତ ମାର୍ଚ୍ଚ ୩୦ ତାରିଖରେ ଶେଷ ହୋଇଥିଲା । ସେବେଠାରୁ ହିସାବ କଲେ ୨୦୨୦ ସେପ୍ଟେମ୍ବର ୩୦ ତାରିଖ ଭିତରେ ବିଧାନସଭା ଅଧିବେଶନ ବସିବ । ଖାଲି ସେତିକି ନୁହେଁ ଅଧିବେଶନ ଆରମ୍ଭରେ ୬ ସପ୍ତାହ ଭିତରେ ଯେତେଗୁଡ଼ିଏ ଅଧ୍ୟାଦେଶ ରହିଛି ସେଗୁଡ଼ିକୁ ପାରିତ କରିବାର ନିୟମ ରହିଛି ।
