ଭୁଲ୍ ମେଟ୍ରିକ୍ ପରୀକ୍ଷା ଫଳ ଶୁଣି ୨ ଛାତ୍ରଙ୍କ ଆତ୍ମହତ୍ୟା
ଭୁଲ୍ ମେଟ୍ରିକ୍ ପରୀକ୍ଷା ଫଳ ଶୁଣି ୨ ଛାତ୍ରଙ୍କ ଆତ୍ମହତ୍ୟା
admin
4584
ବାସୁଦେବପୁର/ପଟ୍ଟାମୁଣ୍ଡାଇ: ଭୁଲ ଖବର ଯୋଗୁ ମାଟି୍ରକ ପରୀକ୍ଷାରେ କୃତକାର୍ଯ୍ୟ ହୋଇଥିବା ୨ ଜଣ ଛାତ୍ରୀ ପ୍ରାଣ ହରାଇଛନ୍ତି । ପ୍ରଥମେ ପରୀକ୍ଷାରେ ଫେଲ ହୋଇଛନ୍ତି ବୋଲି ଖବର ମିଳିଥିଲା । ଏଥିରେ ଭାଙ୍ଗିପଡ଼ି ଜଣେ ବିଷ ପିଇ ଦେଇଥିବା ବେଳେ ଅନ୍ୟ ଜଣେ ବେକରେ ଦଉଡ଼ି ଦେଇଥିଲେ । ପରେ ଯେତେବେଳେ ପାସ ହୋଇଥିବାର ଜଣାପଡ଼ିଲା, ସେତେବେଳକୁ ଦୁହେଁ ଦୁନିଆରେ ନଥିଲେ । ଭଦ୍ରକର ବାସୁଦେବପୁର ଓ କେନ୍ଦ୍ରାପଡ଼ାର ପଟ୍ଟମୁଣ୍ଡାଇରେ ଘଟିଥିବା ଏହି ଘଟଣା ପରିବାରରେ ଗାଁରେ ଶୋକର ଛାୟା ଖେଳାଇ ଦେଇଛି । ତେବେ, ଭୁଲ ଖବର କିଭଳି ଭୟଙ୍କର ହୋଇପାରେ ଏହି ଦୁଇଟି ଘଟଣା ଉଦାହରଣ ପାଲଟିଛି । ମୃତ ୨ ଛାତ୍ରୀଙ୍କ ମଧ୍ୟରୁ ଜଣେ ହେଉଛନ୍ତି ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ସୁଗ ପଞ୍ଚାୟତ ହାଇସ୍କୁଲର ରାଣୀସ୍ମିତା ମହାଳିକ (୧୫) । ବାସୁଦେବପୁର ବ୍ଲକ ହାଟପୋଖଆରି ସାହିର ଅର୍ଜୁନ ମହାଳିକଙ୍କ ଝିଅ ରାଣୀସ୍ମିତା ଏବର୍ଷ ଦଶମ ବୋର୍ଡ ପରୀକ୍ଷା ଦେଇଥିଲେ । ପରୀକ୍ଷା ଫଳ ବାହାରିବା ବେଳେ କେହି ଜଣେ ସାଙ୍ଗ ସେ ଫେଲ ହୋଇଯାଇଛି ବୋଲି କହିଥିଲେ । ରେଜଲ୍ଟ ଖରାପ ହୋଇଛି ବୋଲି ଜାଣିବା ପରେ ରାଣୀସ୍ମିତା ମାନସିକ ଭାରସାମ୍ୟ ହରାଇ ଘରେ ରଖାଯାଇଥିବା ବିଷ ପିଇ ଦେଇଥିଲେ । ପରେ ଜଣାପଡ଼ିଥିଲା ସେ ପାସ କରିଛନ୍ତି । କିନ୍ତୁ କମ ନମ୍ବର ରହିଛି । କିନ୍ତୁ ସେତେବେଳକୁ ରାଣୀସ୍ମିତାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ହୋଇ ପଡ଼ିଥିଲା । ପରିବାର ଲୋକେ ସଙ୍ଗେ ସଙ୍ଗେ ତାଙ୍କୁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଯାଇଥିଲେ ମଧ୍ୟ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ । ସେହିଭଳି ପଟ୍ଟାମୁଣ୍ଡାଇ ପୌର ପରିଷଦ ବାଲିପଡାରେ ଏଭଳି ଏକ ଅଭାବନୀୟ ଘଟଣା ଘଟିଛି । ବାଲିପଡ଼ା ଗ୍ରାମର ବର୍ଷାରାଣୀ ସାହୁ କଷଣଅଣ୍ଟା ସ୍କୁଲରେ ଏଥର ମାଟି୍ରକ ପରୀକ୍ଷା ଦେଇଥିଲେ । ପରୀକ୍ଷା ଫଳକୁ ନେଇ ଆଶଙ୍କା ଭିତରେ ରହିଥିଲେ । ସକାଳେ ଫଳ ବାହାରିବା ପୂର୍ବରୁ ସେ ଫେଲ ହୋଇଛନ୍ତି ବୋଲି କେହି ଜଣେ ତାଙ୍କୁ ମିଛ ଖବର ଶୁଣାଇଥିଲା । ଏଥିରେ ହତାଶ ହୋଇପଡ଼ି ଛାତ୍ରୀ ଜଣଙ୍କ ଆତ୍ମହତ୍ୟା ଉଦ୍ୟମ କରିଥିଲେ । ପରିବାର ଲୋକେ ତାଙ୍କୁ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ହେଲେ ଏହି ଘଟଣାର କିଛି ସମୟ ପରେ ମାଟି୍ରକ ଫଳ ବାହାରିଥିଲା । ବର୍ଷାରାଣୀ ପାସ କରିଥିବା ଜଣାପଡ଼ିଥିଲା । ହେଲେ ସେତେବେଳକୁ ତାଙ୍କ ମୃତଦେହ ମେଡିକାଲରେ ପଡ଼ି ରହିଥିଲା ।
