ଭାରତରେ ଜରୁରୀକାଳୀନ ବ୍ୟବହାର ପାଇଁ ଅନୁମତି ଲୋଡିଲା ଫାଇଜର
ଭାରତରେ ଜରୁରୀକାଳୀନ ବ୍ୟବହାର ପାଇଁ ଅନୁମତି ଲୋଡିଲା ଫାଇଜର
admin
5795
ନୂଆଦିଲ୍ଲୀ : ଭାରତରେ ଜରୁରୀ କାଳୀନ ବ୍ୟବହାର ପାଇଁ ଅନୁମତି ଲୋଡିଛି ଆମେରିକୀୟ ଫାର୍ମା କମ୍ପାନୀ ଫାଇଜର । ଡିସିଜିଆଇ ନିକଟରୁ ଏହି ଟିକାର ବ୍ୟବହାର ପାଇଁ ଅନୁମତି ଲୋଡା ଯାଇଛି । ଏହା ପୂର୍ବରୁ ୟୁକେ ଏବଂ ବାହାରିନ୍ ସରକାରଙ୍କ ପକ୍ଷରୁ ଫାଇଜର ଟିକାର ବ୍ୟବହାରକୁ ଅନୁମତି ମିଳିସାରିଛି । ଭାରତରେ କରୋନା ଆକ୍ରାନ୍ତଙ୍କ ସଂଖ୍ୟା ୯୬ ଲକ୍ଷ ଅତିକ୍ରମ କରିଥିବା ବେଳେ ଫାଇଜର ପକ୍ଷରୁ ଟିକାର ଜରୁରୀ କାଳୀନ ବ୍ୟବହାର ନିମନ୍ତେ ଅନୁମତି ମଗାଯାଇଛି ।
ଡିସେମ୍ବର ୪ ତାରିଖରେ ଡିସିଜିଆଇ ନିକଟରେ ଅନୁମତି ପାଇଁ ଆବେଦନ କରାଯାଇଥିଲେ ମଧ୍ୟ ଅନୁମତି ମିଳିବା ଅସମ୍ଭବ ଲାଗୁଛି । ଭାରତରେ କୌଣସି ଟିକାର ବ୍ୟବହାର ପାଇଁ ରହିଥିବା ନିୟମ ଫାଇଜର ପାଳନ କରିନାହିଁ । ଭାରତରେ ଟିକାର କ୍ଲିନିକାଲ ଟ୍ରାଏଲ ହୋଇନଥିବା କାରଣରୁ ଏହି ଟିକାକୁ ଅନୁମତି ମିଳିବା ଅସମ୍ଭବ ମନେ ହେଉଛି । ତେବେ ଡିସିଜିଆଇ ଚାହିଁଲେ ଭାରତରେ ବିନା କ୍ଲିନିକାଲ ଟ୍ରାଏଲରେ ଟିକାର ସିଧାସଳଖ ବ୍ୟବହାରକୁ ଅନୁମତି ପ୍ରଦାନ କରିପାରିବ । ତେବେ ଭାରତୀୟ ଟିକାକରଣ ଇତିହାସରେ ଆଜି ପର୍ଯ୍ୟନ୍ତ ବିନା କ୍ଲିନିକାଲ ଟ୍ରାଏଲରେ କୌଣସି ଟିକାକୁ ଅନୁମତି ମିଳିନାହିଁ ।
ଉଲ୍ଲେଖଯୋଗ୍ୟ ଯେ, ଆମେରିକୀୟ କମ୍ପାନୀ ଫାଇଜର ଏବଂ ଜର୍ମାନୀ କମ୍ପାନୀ ବାୟୋଏନଟେକ୍ ପକ୍ଷରୁ ଫାଇଜର ଟିକା ନିର୍ମାଣ କରାଯାଇଛି । ଟିକାର ତୃତୀୟ ପର୍ଯ୍ୟାୟ ପରୀକ୍ଷଣ ସୁଦ୍ଧା ଟିକାଟି ୯୫ ପ୍ରତିଶତ ଫଳପ୍ରଦ ସାବ୍ୟସ୍ତ ହୋଇଥିଲା । ତେବେ ଏହି ଟିକାର ମୁଲ୍ୟ ଅପେକ୍ଷାକୃତ ଅଧିକ ହୋଇଥିବାରୁ ଭାରତୀୟ ବଜାରରେ ଏହାର ଉପଯୋଗିତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
