ବିଜେପି ସହ ନିଷ୍ଠାରେ ଜଡ଼ିତ ବ୍ୟକ୍ତି ଏଭଳି ହିଂସାକାଣ୍ଡ କରିବେନି : ପୃଥ୍ୱୀରାଜ ହରିଚନ୍ଦନ
ବିଜେପି ସହ ନିଷ୍ଠାରେ ଜଡ଼ିତ ବ୍ୟକ୍ତି ଏଭଳି ହିଂସାକାଣ୍ଡ କରିବେନି : ପୃଥ୍ୱୀରାଜ ହରିଚନ୍ଦନ
admin
6487
ଭୁବନେଶ୍ୱର: ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଗାଡ଼ି ଉପରକୁ ଆକ୍ରମଣ ଘଟଣାକୁ ନେଇ ଏବେ ଆରମ୍ଭ ହୋଇଯାଇଛି ରାଜନୈତିକ ଆରୋପ ଓ ପ୍ରତ୍ୟାରୋପ । ଆକ୍ରମଣ ଘଟଣାକୁ ନେଇ ବିଜେପି ଯୁବମୋର୍ଚ୍ଚାକୁ ନିରଞ୍ଜନ ଦାୟୀ କରିଥିବାବେଳେ ଏହାର ଜବାବ ଦେଇଛି ବିଜେପି ।
ଏହି ପରିପ୍ରେକ୍ଷୀରେ ବିଜେପି ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି ଯେ, ରାଜନୈତିକ ହିଂସା କେବେ ଗ୍ରହଣୀୟ ନୁହେଁ, ନିନ୍ଦା କରିବା ଦରକାର । ବିଜେପି ହିଂସାରେ ବିଶ୍ୱାସ କରେ ନାହିଁ । ବିଜେପି ସହ ନିଷ୍ଠାରେ ଜଡ଼ିତ ବ୍ୟକ୍ତି ଏଭଳି ହିଂସାକାଣ୍ଡ କରିବେନି । ପଞ୍ଚାୟତ ନିର୍ବାଚନରେ ୧୫ ଜଣ ରାଜନୈତିକ ହିଂସାର ଶିକାର ହୋଇଥିଲେ । କଂଗ୍ରେସ କେବେ ଏହି ପ୍ରସଙ୍ଗ ଉଠାଇ ନଥିଲା ବୋଲି ପୃଥ୍ୱୀରାଜ କହିଛନ୍ତି ।
ଏହାଛଡ଼ା ମାହାଙ୍ଗାର କୁଳମଣୀ ବରାଳଙ୍କ ହତ୍ୟା ଘଟଣାରେ ବି କଂଗ୍ରେସ ପକ୍ଷରୁ ଅଭିମୁଖ୍ୟ ରଖାଯାଇନଥିଲା । ବିଜେଡି ସହ ଯେଉଁ ଅଲିଖିତ ଗଠବନ୍ଧନ ଅଛି, ଯାହା ଯୋଗୁ ୨୦୦୯ରେ ବିଜେଡି ସରକାରଙ୍କୁ ବଞ୍ଚାଇଥିଲେ, ସେଥିପାଇଁ କଂଗ୍ରେସ ପକ୍ଷରୁ ଏପରି ଅଭିଯୋଗ କରାଯାଇଥିବା ବିଜେପି ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି ।
ପ୍ରକାଶ ଯେ, ତାଙ୍କ ଗାଡ଼ି ଉପରକୁ ଆକ୍ରମଣ ଓ ସୁରକ୍ଷା କର୍ମୀଙ୍କୁ ମାଡ଼ ନେଇ ନିରଞ୍ଜନ ଟୁଇଟ ଜରିଆରେ ନିଜର ପ୍ରତିକ୍ରିୟା ପ୍ରକାଶ କରିଥିଲେ । ସେଥିରେ ସେ ଉଲ୍ଲେଖ କରିଥିଲେ ଯେ, ଗତକାଲି ରାତିରେ କିଛି ଦୁର୍ବୃତ୍ତ ମୋ ଗାଡ଼ିକୁ ଆକ୍ରମଣ କରିଥିଲେ । ସୁରକ୍ଷା କର୍ମୀ ଓ ଡ୍ରାଇଭରଙ୍କୁ ପିଟିଥିଲେ । ଏନେଇ ଥାନାରେ ଏତଲା ହୋଇଛି । ତେବେ ଆକ୍ରମଣକାରୀ ବିଜେପି ଯୁବମୋର୍ଚ୍ଚା କର୍ମୀ ବୋଲି ଜାଣି ମୁଁ ଚକିତ । ଏହା ବିଜେପିର ରାଜନୈତିକ ଅଭିସନ୍ଧି ଓ ନୈରାଶ୍ୟର ପ୍ରତିଫଳନ । ବିଜେପି ପାଇଁ କଂଗ୍ରେସ ସବୁଠୁ ବଡ଼ ପ୍ରତିବନ୍ଧକ ହୋଇଥିବାରୁ ଏମିତି କାଣ୍ଡ ଘଟିଛି । କାହିଁକି ବିଜେପି ଏମିତି କାପୁରୁଷୋଚିତ ଆଚରଣ କରୁଛି ବୋଲି ନିରଞ୍ଜନ ପ୍ରଶ୍ନ କରିଥିଲେ । ଏହାଛଡ଼ା ଯଦି ମୋ ସହ ଏଭଳି ହେଲା ତେବେ ଆମ ମା’ ଓ ଝିଅମାନେ କେତେ ସୁରକ୍ଷିତ ବୋଲି ନିରଞ୍ଜନ ପ୍ରଶ୍ନ କରିଥିଲେ ।
