ପ୍ରଧାନମନ୍ତ୍ରୀ ମୋଦୀ ଗଣତନ୍ତ୍ର ପ୍ରତି ବିପଦ

Jan 25, 2020 - 05:13 Updated: Jan 25, 2020 - 05:13

4225

ନୂଆଦିଲ୍ଲୀ - ଲଣ୍ଡନରୁ ପ୍ରକାଶ ପାଉଥିବା ସାପ୍ତାହିକ ପତ୍ରିକା "ଦ ଇକୋନୋମିଷ୍ଟ' ତା'ର ସଦ୍ୟତମ ସଂସ୍କରଣରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କଡ଼ା ସମାଲୋଚନା କରିଛି । ପ୍ରଧାନମନ୍ତ୍ରୀ ମୋଦୀ ବିଶ୍ୱର ସବୁଠାରୁ ବଡ଼ ଗଣତନ୍ତ୍ର ଭାରତରେ ବିଭାଜନକୁ ପ୍ରୋତ୍ସାହନ କରୁଛନ୍ତି ଏବଂ ସେ ଗଣତନ୍ତ୍ର ପ୍ରତି ବିପଦ ବୋଲି "ଦି ଇକୋନୋମିଷ୍ଟ' ନିଜ କଭର୍ ଷ୍ଟୋରିରେ କହିଛି । ଏହି କଭର୍ ଷ୍ଟୋରିର ଶୀର୍ଷକ "ଅସହିଷ୍ଣୁ ଭାରତ' ବୋଲି ରଖାଯାଇଛି । ଏହି ଲେଖାରେ କୁହାଯାଇଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତୀୟ ସମ୍ବିଧାନର ଧର୍ମନିରପେକ୍ଷ ନୀତିକୁ ଦୁର୍ବଳ କରୁଛନ୍ତି । ବିଜେପି ତା'ର ନିର୍ବାଚନୀ ଫାଇଦା ପାଇଁ ମୁସ୍ଲିମ୍ ସଂପ୍ରଦାୟ ମଧ୍ୟରେ ଭୟ ସୃଷ୍ଟି କରିବାକୁ ଚାହୁଛି ବୋଲି ଏଥିରେ ଉଲ୍ଲେଖ ରହିଛି । ଭାରତର ନାଗରିକତା ସଂଶୋଧନ ଆଇନ (ସିଏଏ)କୁ ଏକ ବିଭାଜନକାରୀ ପଦକ୍ଷେପ ବୋଲି ଏହି ପତ୍ରିକା ଦର୍ଶାଇଛି । ତେବେ ସୋସିଆଲ ମିଡିଆରେ ଦି ଇକୋନମିଷ୍ଟର ଏଭଳି ଲେଖାକୁ ଅନେକ ଭାରତ ବିରୋଧୀ ବୋଲି କହିବା ସହ ଏହାର କଡ଼ା ନିନ୍ଦା କରିଛନ୍ତି । ଭାରତର ରାଜନୀତି ଏବଂ ଅର୍ଥନୀତି ବିରୋଧରେ ଏହି ପତ୍ରିକା ତା'ର ଅପପ୍ରଚାର ଜାରି ରଖିଛି ବୋଲି ସେମାନେ ମତ ଦେଇଛନ୍ତି ।