ପୁଲିସ ଗାଡ଼ି ପୋଡ଼ି ଘଟଣାରେ ୧୦୦ରୁ ଊଦ୍ଧ୍ୱର୍ ନାମରେ ମାମଲା
ପୁଲିସ ଗାଡ଼ି ପୋଡ଼ି ଘଟଣାରେ ୧୦୦ରୁ ଊଦ୍ଧ୍ୱର୍ ନାମରେ ମାମଲା
admin
3349
ଭଦ୍ରକ: ପୁଲିସ ଉପରେ ଆକ୍ରମଣ ଓ ଗାଡ଼ି ପୋଡ଼ି ଘଟଣାରେ ୧୦୦ରୁ ଊଦ୍ଧ୍ୱର୍ ଲୋକଙ୍କ ନାମରେ ମାମଲା ରୁଜୁ କରାଯାଇଛି । ଏଥିସହ ଏହି ଘଟଣାରେ ୬ ଜଣଙ୍କୁ ଗିରଫ କରାଯାଇଛି । ଭଦ୍ରକ ଜିଲ୍ଲା ତିହିଡ଼ିରେ ରାସ୍ତାରୋକବେଳେ ପୁଲିସକୁ ଆକ୍ରମଣ ହୋଇଥିଲା । ହାଟୁଆରୀ ଗ୍ରାମର ଯୁବକଙ୍କ ମୃତୁ୍ୟ ପରେ ଉତ୍ତେଜନାରୁ ପୋଡ଼ାଜଳା ହୋଇଥିଲା ।
ପ୍ରକାଶ ଯେ, ପୁଲିସ ଚଢ଼ଉ ବେଳେ ଦିବ୍ୟାଙ୍ଗ ଯୁବକଙ୍କ ମୃତ୍ୟୁକୁ କେନ୍ଦ୍ରକରି ବୁଧବାର ଭଦ୍ରକ ଜିଲ୍ଲାର ତିହିଡିରେ ଲଙ୍କାକାଣ୍ଡ ଘଟିଥିଲା। ଉତ୍ତ୍ୟକ୍ତ ଲୋକେ ଥାନା କନଷ୍ଟେବଳଙ୍କୁ ମାରଧର କରିବା ସହ ପୁଲିସ ଗାଡ଼ି ଜାଳି ଦେଇଥିଲେ। ଏହି ମଉକାରେ ପୁଲିସ ହେପାଜତରେ କୋର୍ଟକୁ ଯାଉଥିବା ଜଣେ ଦୁଷ୍କର୍ମ ଅଭିଯୁକ୍ତ ଖସି ପଳାଇଥିଲା। ଏହି ଘଟଣାକୁ ନେଇ ଆଚାନ୍ଦବାଲି-ଭଦ୍ରକ ରାସ୍ତାରେ ବହୁ ସମୟ ଧରି ଗାଡ଼ି ଚଳାଚଳ ବନ୍ଦ ରହିଥିଲା।
ତିହିଡି ଥାନା ହାଟୁଆରି ଗ୍ରାମର ଭାଗିରଥୀ ମହାଳିକଙ୍କ ଅଭିଯୋଗ ଅନୁଯାୟୀ, ତାଙ୍କ ପୁଅ ବାପି ଆଜି ଭଉଣୀ ଘରକୁ ମକରସଂକ୍ରାନ୍ତି ଭାର ନେଇ ଯାଇଥିଲା। ବାପି ଭଉଣୀ ଘରେ ଥିବା ସମୟରେ ପୁଲିସ ଆସି ତାଙ୍କ ଜ୍ବାଇଁ ଅଶୋକଙ୍କୁ ଖୋଜିଥିଲେ। ବାପି କଥା କହି ପାରନ୍ତିନି କି ଶୁଣି ପାରନ୍ତିନି। ପୁଲିସକୁ ଦେଖି ସେ ଭୟଭୀତ ହୋଇ ଦୌଡ଼ିବାକୁ ଆରମ୍ଭ କରିଥିଲେ। ପୁଲିସ କର୍ମଚାରୀମାନେ ମଧ୍ୟ ତାଙ୍କୁ ଅଶୋକ ଭାବି ଗୋଡ଼ାଇବାରୁ ସେ ନିକଟସ୍ଥ ପୋଖରୀକୁ ଡେଇଁ ପଡିଥିଲେ। ପରେ ଅଗ୍ନିଶମ କର୍ମଚାରୀଙ୍କ ଦ୍ବାରା ବାପିଙ୍କ ମୃତଦେହକୁ ପୋଖରୀରୁ ଉଦ୍ଧାର କରାଯାଇଥିଲା। ନିମିଷକେ ମଧ୍ୟରେ ଏହି ଖବର ଆଖପାଖ ଅଞ୍ଚଳକୁ ବ୍ୟାପିଯିବା ପରେ ଅଲୀନଗର ଛକରେ ଲୋକେ ଏକାଠି ହୋଇ ଭଦ୍ରକ-ଚାନ୍ଦବାଲି ରାସ୍ତାରେ ଶବ ରଖି ବିକ୍ଷୋଭ ପ୍ରଦର୍ଶନ କରିଥିଲେ। ଏହି ସମୟରେ ପୀରହାଟ ଥାନା ପୁଲିସ ଜଣେ ଦୁଷ୍କର୍ମ ଅଭିଯୁକ୍ତଙ୍କୁ ନେଇ ଭଦ୍ରକ କୋର୍ଟକୁ ଯାଉଥିବାବେଳେ ଉତ୍ତ୍ୟକ୍ତ ଲୋକମାନେ ପୁଲିସ ଗାଡି (ବୋଲେରୋ)କୁ ଅଟକାଇ ଭଙ୍ଗାରୁଜା କରିବା ସହ ସେଥିରେ ଥିବା କର୍ମଚାରୀଙ୍କୁ ମାରଧର କରିଥିଲେ। ଭୟରେ ଥାନା ଷ୍ଟାଫ୍ ଦୌଡ଼ି ପଳାଇବା ବେଳେ ଲୋକମାନେ ସେମାନଙ୍କୁ ଗୋଡ଼େଇ ଗୋଡ଼େଇ ପିଟିବା ସହ ଗାଡ଼ିକୁ ନିଆଁ ଲଗାଇ ଜାଳି ଦେଇଥିଲେ। ଏହି ସୁଯୋଗରେ ଗାଡ଼ିରେ ବସିଥିବା ଦୁଷ୍କର୍ମ ଅଭିଯୁକ୍ତ ଜଣକ ଚମ୍ପଟ ମାରିଥିଲା।
