ପିପିଲିର ସ୍ଥିତି ସମୀକ୍ଷା କଲେ ଡିଜି
ପିପିଲିର ସ୍ଥିତି ସମୀକ୍ଷା କଲେ ଡିଜି
admin
5777
ଭୁବନେଶ୍ୱର: ନିର୍ବାଚନୀ ହିଂସା ପାଇଁ କୁଖ୍ୟାତ ଥିବା ପିପିଲି ନିର୍ବାଚନମଣ୍ଡଳୀରେ ଚଳିତ ଉପନିର୍ବାଚନରେ ମଧ୍ୟ ହିଂସାକାଣ୍ଡ ଘଟିବାରେ ଲାଗିଛି । ବିଗତ କିଛି ଦିନ ହେଲା ବିଜେପି ଓ ବିଜେଡି କର୍ମୀଙ୍କ ମଧ୍ୟରେ ହିଂସାକାଣ୍ଡ ଘଟି ରକ୍ତପାତ ହୋଇଛି । ପିପିଲି ନିର୍ବାଚନ ପ୍ରଚାର ଯେତିକି ଉଷ୍ମ ହେଉଛି, ନିର୍ବାଚନୀ ହିଂସା ନେଇ ସେତିକି ଖବର ଆସିବାରେ ଲାଗିଛି । ଏହାରି ଭିତରେ ଆଜି ପିପିଲିରେ ପହଞ୍ଚିଛନ୍ତି ପୁଲିସ ମହାନିଦେ୍ର୍ଧଶକ ଅଭୟ । ଗୋଇନ୍ଦା ବିଭାଗ ନିଦେ୍ର୍ଧଶକ ଓ ଏଡିଜି ଆଇନ ଶୃଙ୍ଖଳା ବି ତାଙ୍କ ସହ ସାମିଲ ହୋଇଛନ୍ତି । ଶେଷ ଖବର ସୁଦ୍ଧା ପିପିଲି ଥାନାରେ ଡିଜିପି ଓ ବରିଷ୍ଠ ଅଧିକାରୀମାନେ ସ୍ଥିତି ସମୀକ୍ଷା କରୁଥିବା ଜଣାଯାଇଛି । ପିପିଲିରେ ବଢି ଚାଲିଥିବା ନିର୍ବାଚନୀ ହିଂସାକୁ ନେଇ ଏହି ସମୀକ୍ଷା କରାଯାଉଥିବା ଜଣାଯାଇଛି ।
ପ୍ରକାଶ ଯେ, ଗତକାଲି ବିଜେଡି କର୍ମୀଙ୍କ ମାଡରେ ୩ଜଣ ବିଜେପି କର୍ମୀ ଆହତ ହୋଇଥିବା ଅଭିଯୋଗ ହୋଇଥିଲା । ଆହତଙ୍କୁ ଡେଲାଙ୍ଗ ଡାକ୍ତରଖାନାରେ ଚିକିତ୍ସା କରାଯାଉଛି । ଗୁରୁତର ଆହତଙ୍କୁ ଏମ୍ସ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଭୁବନେଶ୍ୱର ଏମ୍ସ ଯାଇ ବିଜେପି ସଭାପତି ସମୀର ମହାନ୍ତି ଗୁରୁତର ବିଜେପି କର୍ମୀଙ୍କୁ ଭେଟି ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି । ଡେଲାଙ୍ଗ ଜେନାପୁରର ବାହ୍ମଣ ବାଡ଼ ଅଂଚଳରେ ବିଜେପି କର୍ମୀ ପ୍ରଚାର କରୁଥିବା ବେଳେ ଏହି ଗଣ୍ଡଗୋଳ ହୋଇଥିଲା । ଘଟଣା ପରେ ପଟନେକିଆ ରାସ୍ତାକୁ ହାଟଡେଲାଙ୍ଗ ଠାରେ ଅବରୋଧ କରି ଅଭିଯୁକ୍ତକୁ ଗିରଫ କରିବା ପାଇଁ ଦାବି କରିଛି ବିଜେପି ।
ସେପଟେ ଗତକାଲି ଶ୍ରମ ମନ୍ତ୍ରୀ ସୁଶାନ୍ତ ସିଂଙ୍କୁ କିଛି ବିଜେପି କର୍ମୀ ଆକ୍ରମଣ କରିଥିବା ଅଭିଯୋଗ ହୋଇଥିଲା । ଏଥିରେ ଗାଡିର କାଚ ଭାଙ୍ଗିବା ସହିତ କିଛି ବିଜେଡି କର୍ମୀ ଆହତ ହୋଇଥିବା ସୂଚନା ମିଳିଛି । ଆହତଙ୍କୁ ଏବେ ଡେଲାଙ୍ଗ ଡାକ୍ତରଖାନାରେ ଭର୍ତ୍ତି କରାଯାଇଛି । ପିପିଲିରେ ଭୋଟ୍ ପଡିବା ଆଗରୁ ଏହି ନିର୍ବାଚନୀ ହିଂସା କେଉଁ ଦିଗକୁ ଗତି କରୁଛି ତାହା ଉପରେ ଏବେ ଚର୍ଚ୍ଚା ଆରମ୍ଭ ହୋଇଛି ।
