ନିର୍ମାଣଧୀନ କୋଠାରେ ଶ୍ରମିକଙ୍କ ଗଳାକାଟି ହତ୍ୟା
ନିର୍ମାଣଧୀନ କୋଠାରେ ଶ୍ରମିକଙ୍କ ଗଳାକାଟି ହତ୍ୟା
admin
4551
ଭୁବନେଶ୍ୱର: ରାତିରେ ବାଣିବିହାର ପରିସର ସ୍ଥିତ ଏକ ନିର୍ମାଣଧୀନ କୋଠାରେ ଜଣେ ଶ୍ରମିକଙ୍କୁ ଗଳାକାଟି ହତ୍ୟା କରାଯାଇଛି । ମୃତ ଶ୍ରମିକ ହେଲେ ମୟୂରଭଞ୍ଜ ଜିଲ୍ଲା ଉଦଳାର ଗୁଜୁର ସିଂ । ସହିଦନଗର ଥାନା ପୁଲିସ ଘଟଣା ସ୍ଥଳରୁ ଗୁଜୁରଙ୍କ ରକ୍ତ ଜୁଡ଼ୁବୁଡ଼ୁ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଇଛି । ଗୁଜୁରଙ୍କ ଜଣେ ସାଥୀ ଶ୍ରମିକ ହତ୍ୟା କରିଥିବା ପୁଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି । ହତ୍ୟାକାଣ୍ଡର କାରଣ ଅସ୍ପଷ୍ଟ ଥିବା ବେଳେ ପୂର୍ବରାଗର ପ୍ରତିଶୋଧନ ନେବାକୁ ଯାଇ ଏହା ଘଟିଛି ବୋଲି ସନେ୍ଦହ କରାଯାଉଛି । ତେବେ ଫେରାର ଶ୍ରମିକକୁ ପୁଲିସ ଠାବ କରିପାରିନାହିଁ । ସୂଚନା ଅନୁସାରେ ନିର୍ମାଣଧୀନ କୋଠାରେ ଗୁଜୁରଙ୍କୁ କେହି ହତ୍ୟା କରିଛି ବୋଲି ଖବର ମିଳିବା ପରେ ପୁଲିସ ସେଠାରେ ପହଞ୍ଚିଥିଲା । ପୁଲିସ ଘଟଣାସ୍ଥଳରେ ପହଞ୍ଚିବା ବେଳକୁ ଗୁଜୁରଙ୍କ ରକ୍ତାକ୍ତ ମୃତଦେହ ପଡ଼ି ରହିଥିଲା । ତାଙ୍କ ଗଳାକୁ କେହି କୌଣସି ଧାରୁଆ ଅସ୍ତ୍ରରେ କାଟି ଦେଇଥିବା ଜଣାପଡ଼ିଥିଲା । ନିକଟରେ ମଦବୋତଲ ଓ ବିଭିନ୍ନ ଖାଦ୍ୟ ପୁଡ଼ିଆ ପଡ଼ିଥିଲା । ପଚରାଉଚରା ପରେ ଅନ୍ୟ ଶ୍ରମିକମାନେ ଗୁଜୁରଙ୍କ ସହ ମଦ ପିଉଥିବା ଜଣେ ଶ୍ରମିକର ନାଁ ନେଇଥିଲେ । କିନ୍ତୁ ତାକୁ ପୁଲିସ ଖୋଜିଲା ବେଳକୁ ସେ ଫେରାର ହୋଇଯାଇଥିଲା । ପୁଲିସ ହତ୍ୟା ଅଭିଯୁକ୍ତ ଶ୍ରମିକକୁ ଧରିବା ପାଇଁ ରେଳଷ୍ଟେସନ ଓ ବସଷ୍ଟାଣ୍ଡ ଭଳି ସ୍ଥାନରେ ଚଢ଼ଉ ଜାରି ରଖିଛି ।
