ନବୀନ ହାରି ସାରିଛନ୍ତି, ପାଟକୁରାରେ ବିଜେଡ଼ି ହାରିବ : ଧର୍ମେନ୍ଦ୍ର
ନବୀନ ହାରି ସାରିଛନ୍ତି, ପାଟକୁରାରେ ବିଜେଡ଼ି ହାରିବ : ଧର୍ମେନ୍ଦ୍ର
admin
5248
ଭୁବନେଶ୍ୱର : ପାଟକୁରାରେ ବିଜେଡ଼ି ହାରିବା ନିଶ୍ଚିତ । ସେଥିପାଇଁ ବିଜେଡ଼ି ଭୟଭୀତ ହୋଇଯାଇଛି । ତେଣୁ ପାଟକୁରା ନିର୍ବାଚନ ଘୁଂଚାଇବାକୁ ନବୀନ ପଟ୍ଟନାୟକ ନିର୍ବାଚନ କମିଶନଙ୍କୁ ଅନୁରୋଧ କରିଛନ୍ତି ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି । ଧର୍ମେନ୍ଦ୍ର କହିଛନ୍ତିଯେ, ରାଜନଗରରେ ବାତ୍ୟା ସ୍ଥଳଭାଗରେ ମାଡ଼ ହେବ ବୋଲି ନବୀନ କହୁଛନ୍ତି । କିନ୍ତୁ ସମସ୍ତ ଗଣମାଧ୍ୟମର ରିପୋର୍ଟ ଅନୁଯାୟୀ, ପୁରୀର କୃଷ୍ଣପ୍ରସାଦ ବ୍ଲକରେ ବାତ୍ୟା ମାଡ଼ କରିବ । ଯାହାକି ପାଟକୁରା ଠାରୁ ୧୦୦ରୁ ୧୫୦ କିମି ଦୂର । ଆଜିଠୁ ତାହାକୁ ନେଇ ଭୟର ବାତାବରଣ ସୃଷ୍ଟି କରିବାକୁ ନବୀନ ବାବୁ ଚାହୁଁଛନ୍ତି । ତେଣୁ ପାଟକୁରାରେ ନିର୍ବାଚନ ଯଥାରୀତି କରାଯାଉ ବୋଲି ଧର୍ମେନ୍ଦ୍ର ନିର୍ବାଚନ କମିଶନଙ୍କ ନିକଟରେ ଦାବି କରିଛନ୍ତି ।
ସେହିପରି ଆଦର୍ଶ ଆଚରଣ ବିଧି ଉଠାଇବା ସମ୍ପର୍କରେ ମଧ୍ୟ ଧର୍ମେନ୍ଦ୍ର ନିର୍ବାଚନ କମିଶନଙ୍କ ଦୃଷ୍ଟି ଆକର୍ଷଣ କରିଛନ୍ତି । ସେ କହିଛନ୍ତିଯେ, ନବୀନ ବାବୁ ବହୁତ ଲୁଟି ସାରିଲେଣି । ଆଦର୍ଶ ଆଚରଣ ବିଧି ଉଠାଇ ନିଜ କର୍ମୀଙ୍କ ବକେୟା ବିଲ ଓ ଅନ୍ୟ କାର୍ୟ୍ୟ କରିବାକୁ ଚାହୁଁଛନ୍ତି । ନବୀନବାବୁ ଜାଣି ସାରିଛନ୍ତି ସରକାର ବଦଳି ସାରିଛି । ଲୋକମାନେ ବିଜେପି ସପକ୍ଷରେ ରାୟ ଶୁଣାଇଛନ୍ତି । ତେଣୁ ଆଉ ଲୁଟିବାକୁ ସୁଯୋଗ ନଦେବାକୁ ସେ ନିର୍ବାଚନ କମିଶନଙ୍କୁ ଅନୁରୋଧ କରିଛନ୍ତି ।
ଅପରପକ୍ଷରେ ଚତୁର୍ଥ ପର୍ୟ୍ୟାୟରେ ୧୫ ବୁଥରେ ଗୁଣ୍ଡାଗର୍ଦ୍ଧି ହୋଇଛି । ଶାସକ ଦଳର କର୍ମୀ ଭ୍ରଷ୍ଟ ଅଧିକାରୀଙ୍କ ସହଯୋଗରେ ତାହା କରିଛନ୍ତି । ଏନେଇ ନିର୍ବାଚନ କମିଶନଙ୍କୁ ତଥ୍ୟ ପ୍ରମାଣ ଦିଆଯାଇଥିବାବେଳେ ରିପୋଲିଂ କରିବାକୁ ନିର୍ବାଚନ କମିଶନଙ୍କ ଦୃଷ୍ଟି ଆକର୍ଷଣ କରାଯାଇଛି । ସେହିପରି ଧର୍ମେନ୍ଦ୍ର ଓଡ଼ିଶାର ମୁଖ୍ୟ ନିର୍ବାଚନ ଅଧିକାରୀ ସୁରେନ୍ଦ୍ର କୁମାରଙ୍କ ଉପରେ ବର୍ଷିଛନ୍ତି । ସେ କହିଛନ୍ତିଯେ, ସୁରେନ୍ଦ୍ର ଜଣେ ଭ୍ରଷ୍ଟ ଅଧିକାରୀ । ସେ କିଛି ଜିଲ୍ଲାପାଳଙ୍କ ଠାରୁ ଉଦେ୍ଧଶ୍ୟମୂଳକ ଭାବେ ତଥ୍ୟ ମଗାଇ ବରୀର ୧୨ ବୁଥରେ ସାନି ମତଦାନ କରିବାର ଷଡ଼ଯନ୍ତ୍ର କରୁଛନ୍ତି ବୋଲି ଶ୍ରୀ ପ୍ରଧାନ କହିଛନ୍ତି ।
