ଓଡ଼ିଶାରେ ଡବଲ ଇଂଜିନ ହେଇଗଲା : ଦାମ
ଓଡ଼ିଶାରେ ଡବଲ ଇଂଜିନ ହେଇଗଲା : ଦାମ
admin
5781
ଭୁବନେଶ୍ୱର : ଅଶ୍ୱିନୀ ବୈଷ୍ଣବଙ୍କୁ ବିଜେପି ରାଜ୍ୟସଭା ପ୍ରାର୍ଥୀ କରିବା ଓ ବିଜେଡ଼ି ତାଙ୍କୁ ସମର୍ଥନ ଦେବା ଘଟଣାକୁ ନେଇ ରାଜ୍ୟ ରାଜନୀତିରେ ଆଲୋଡ଼ନ ସୃଷ୍ଟିହୋଇଛି । ଏଭଳି ଘଟଣା ନେଇ ପୂର୍ବରୁ ବିଜେଡ଼ି ଓ ବିଜେପି ନେତା କିଛି ଟେର ପାଇନଥିବାବେଳେ ଏହା ପଛରେ କ’ଣ ନିଘନ ରହସ୍ୟ ରହିଛି ତାହା ବି ଠଉରାଇ ପାରୁନାହାନ୍ତି । ତେବେ ବରିଷ୍ଠ ବିଜେପି ନେତା ଡାକ୍ତର ଦାମୋଦର ରାଉତ ପରୋକ୍ଷରେ ଉଭୟ ଦଳକୁ ଇଲେଇତି କରିଛନ୍ତି । ଡାକ୍ତର ରାଉତ କହିଛନ୍ତିଯେ, ବିଜେପି ଚାହୁଁଥିଲା ଡବଲ ଇଂଜିନ ସରକାର ହେଉ । ହେଲେ ଭୋଟ ବେଳେ ତାହା ପ୍ରତିଫଳିତ ହୋଇନଥିଲା । କିନ୍ତୁ ନିର୍ବାଚନ ପରେ ଡବଲ ଇଂଜିନ ହୋଇଗଲା ବୋଲି ସେ କହିଛନ୍ତି । ସେହିପରି ଅଶ୍ୱିନୀ ବୈଷ୍ଣବ ଜଣେ ଭଲ ବ୍ୟକ୍ତି । ତାଙ୍କର ଦକ୍ଷତା ରହିଛି । ଦିଲ୍ଲୀରେ ତାଙ୍କର ଭଲ ଲବି ରହିଛି । ଯେଉଁଥିପାଇଁ ବିଜେପି ତାଙ୍କୁ ପ୍ରାର୍ଥୀ କରିଛି । ଅପରପକ୍ଷରେ ବିଜେଡ଼ି ସହ ମଧ୍ୟ ତାଙ୍କର ଭଲ ସମ୍ପର୍କ ଅଛି ବୋଲି ସେ କହିଛନ୍ତି । ଉଭୟ ଦଳ ନିଜର ଫାଇଦା ପାଇଁ ଅଶ୍ୱିନୀଙ୍କୁ ସମର୍ଥନ ଦେଇଛନ୍ତି ବୋଲି ଦାମ ପ୍ରକାଶ କରିଛନ୍ତି ।
ନବୀନଙ୍କ ଆପଣ ମାନେ ଖୁସି ତ ଷ୍ଟାଇଲରେ ନିଜ ମତ ଦେଇଛନ୍ତି ଦାମ। ବିଜେପି ସହ ବିଜେଡ଼ି ଭଲ ସମ୍ପର୍କ ରଖିଲେ ମୁଁ ଖୁସି ହେବି ବୋଲି ଦାମ ଗଣମାଧ୍ୟମକୁ କହିଛନ୍ତି। ଏଥିସହିତ କେନ୍ଦ୍ର ଓ ରାଜ୍ୟରେ ବିଜେପିର ପତିଆର ଦେଖି ବିଜେଡ଼ି ଭଲ ସମ୍ପର୍କ ସ୍ଥାପନ କରୁଛି ବୋଲି ଦାମ କହିଛନ୍ତି। ରାଜନୀତିରେ ଦିନକୁ ଦିନ ବରିଷ୍ଠ ନେତା ଗୌଣ ହେବାକୁ ଲାଗିଛନ୍ତି ଏବଂ ପ୍ରତିଶ୍ରୁତି କେହି ନରଖିବା ଏକ ନୂଆ କଥା ନୁହେଁ ବୋଲି ଦାମ ମନ୍ତବ୍ୟ ଦେଇଛନ୍ତି।
ଅପରପକ୍ଷରେ କଂଗ୍ରେସ କିନ୍ତୁ ଏହାକୁ ସମାଲୋଚନା କରିଛି । ବିଜେପି ଓ ବିଜେଡ଼ି ଉପରେ ଉପରେ କଳି କିନ୍ତୁ ଭିତରେ ଭିତରେ କୋଳାକୋଳି । ଉଭୟଙ୍କ ମଧ୍ୟରେ ନିଘନ ସମ୍ପର୍କ ରହିଛି ବୋଲି ସ୍ପଷ୍ଟ ହୋଇଯାଇଛି । ତେବେ ଏହି ଡିଲ ପଛରେ କି ରହସ୍ୟ ରହିଛି ବୋଲି କଂଗ୍ରେସ ମୁଖପାତ୍ର ସତ୍ୟ ପ୍ରକାଶ ନାୟକ ପ୍ରଶ୍ନ କରିଛନ୍ତି ।
