ଏସସିବିରେ ଡେଡିକେଟେଡ କୋଭିଡ ହସପିଟାଲ ବେଡ ସଂଖ୍ୟା ବୃଦ୍ଧି

କଟକ: ରାଜ୍ୟରେ ଭୟଙ୍କର ହେଉଛି କରୋନା ସ୍ଥିତି । ବଢୁଛି କରୋନାର କାୟା । ସ୍ଥିତି ହେଉଛି ବେକାବୁ । ଓଡ଼ିଶାରେ କରୋନା ମହାମାରୀର ମହାସମର ଆରମ୍ଭ ହୋଇଯାଇଛି । କରୋନା ଏବେ ଲମ୍ବ ଡିଆଁ ମାରି ଗୋଟିକ ପରେ ଗୋଟିଏ ଜିଲ୍ଲାରେ ପ୍ରବେଶ କରିଛି । ଦିନକୁ ଦିନ ଆକ୍ରାନ୍ତଙ୍କ ସଂଖ୍ୟା ବଢି ଚାଲିଛି । ଏହାରି ଭିତରେ ଏସସିବିରେ ଡେଡିକେଟେଡ କୋଭିଡ ହସପିଟାଲ(ଡିସିଏଚ) ବେଡ ସଂଖ୍ୟାକୁ ବୃଦ୍ଧି କରାଯାଇଛି । ବେଡ ସଂଖ୍ୟା ୩୧୫କୁ ବୃଦ୍ଧି କରାଯାଇଛି । ତନ୍ମଧ୍ୟରୁ ୬୩ଟି ଆଇସିୟୁ ଥିବା ଜଣାଯାଇଛି । ଏନେଇ ଏସସିବି ଜରୁରୀକାଳୀନ ଅଧିକାରୀ ସୂଚନା ଦେଇଛନ୍ତି । ପ୍ରକାଶ ଯେ, ନୂଆ ଷ୍ଟ୍ରେନ୍‌ରେ ସଂକ୍ରମଣ କ୍ଷୀପ୍ରଗତିରେ ବଢୁଛି । ଗତବର୍ଷ ମାସରୁ ଆରମ୍ଭ ହୋଇ ସେପ୍ଟେମ୍ବରରେ ପିକ୍‌କୁ ଯାଇଥିଲା କରୋନା । ଏବେ କିନ୍ତୁ ଯେଉଁ ଗତିରେ ବଢୁଛି, ଦୁଇ ମାସ ମଧ୍ୟରେ ଶୀର୍ଷକୁ ଚାଲିଯିବ କରୋନା । ଏମିତି ଆଶଙ୍କା କରୁଛନ୍ତି ବିଶେଷଜ୍ଞ । ନୂଆ ଷ୍ଟ୍ରେନ୍‌ରେ ମୃତ୍ୟୁହାର କମ୍‌ ରହିଛି ସତ । ହେଲେ ଗୁରୁତର ରୋଗୀଙ୍କ ସଂଖ୍ୟା ବଢୁଛି। ଶୀଘ୍ର ସଂକ୍ରମଣ ବଢୁଥିବାରୁ ହସ୍ପିଟାଲରେ ବେଡ୍‌ ମିଳିବା ଏବେ ସବୁଠୁ ବଡ଼ ଚ୍ୟାଲେଞ୍ଜ ରହିଛି।ଖାଲି ସଂକ୍ରମଣ ବଢ଼ିଛି ବୋଲି ନୁହେଁ । ଯେଉଁମାନେ କରୋନା ଆକ୍ରାନ୍ତ ହୋଇଛନ୍ତି, ସେମାନେ ପୁନଃ ସଂକ୍ରମିତ ହେବାର ଆଶଙ୍କା ମଧ୍ୟ ରହିଛି । ଟିକାର ଦୁଇଟି ଡୋଜ୍‌ ନେଇଥିବା ଲୋକଙ୍କୁ ମଧ୍ୟ ସଂକ୍ରମଣ ହେଉଛି । ଗତ ୨୪ ଘଣ୍ଟା ରାଜ୍ୟରେ ୩୦ଟି ଜିଲ୍ଲାରୁ ୨୯୮୯ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ୧୭୩୩ ଜଣ କ୍ୱାରେଣ୍ଟାଇନ୍‌ରେ ଥିବା ବେଳେ ୧୨୫୬ ଜଣ ରୋଗୀ ସ୍ଥାନୀୟ ସଂକ୍ରମିତ ହୋଇଛନ୍ତି । ଏହାକୁ ମିଶାଇ ରାଜ୍ୟରେ ମୋଟ୍ କରୋନା ସଂକ୍ରମିତଙ୍କ ସଂଖ୍ୟା ୩ ଲକ୍ଷ ୫୮ ହଜାର ୩୪୨ ଜଣକୁ ଛୁଇଁଛି । ଏ ନେଇ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ସୂଚନା ପ୍ରଦାନ କରାଯାଇଛି ।