ଅଧାରୁ ସ୍ଥଗିତ ଥିବା ଆଇପିଏଲ-୨୧ ଯଦି ସମ୍ପୂର୍ଣ୍ଣ ନହେଲେ କ୍ଷତି କଣ ହେବ, ଜାଣନ୍ତୁ
ଅଧାରୁ ସ୍ଥଗିତ ଥିବା ଆଇପିଏଲ-୨୧ ଯଦି ସମ୍ପୂର୍ଣ୍ଣ ନହେଲେ କ୍ଷତି କଣ ହେବ, ଜାଣନ୍ତୁ
admin
2298
ନୂଆଦିଲ୍ଲୀ : ଅଧାରୁ ସ୍ଥଗିତ ଥିବା ଆଇପିଏଲ-୨୧ ଯଦି ସମ୍ପୂର୍ଣ୍ଣ କରିବାରେ ଆମେ ବିଫଳ ହେଉ ତେବେ ବିସିସିଆଇ ପ୍ରାୟ ୨୫୦୦ କୋଟି ଟଙ୍କାର କ୍ଷତି ସହିବ ବୋଲି ଏକ ପ୍ରାରମ୍ଭିକ ଆକଳନରୁ କହିଛନ୍ତି ସଭାପତି ସୌରଭ ଗାଙ୍ଗୁଲି । ଅଂଶଗ୍ରହଣକାରୀ ୮ ଫ୍ରାଞ୍ଚାଇଜ ମଧ୍ୟରୁ ୪ଟିର ଦଳୀୟ ଅଧିକାରୀ ଓ ଖେଳାଳି କୋଭିଡ-୧୯ ଭୂତାଣୁରେ ସଂକ୍ରମିତ ହେବା ପରେ ଚଳିତ ସପ୍ତାହରୁ ଆଇପିଏଲକୁ ସ୍ଥଗିତ ରଖାଯାଇଛି । ୨୯ ମ୍ୟାଚ ଖେଳା ସରିଥିବା ବେଳେ ଅବଶିଷ୍ଟ ୩୧ ମ୍ୟାଚ କିଭଳି ଖେଳାଯିବ ବିସିସିଆଇ ଏବଂ ଆଇପିଏଲ ପରିଚାଳନା ପରିଷଦ ଏବେ ବାଟ ଖୋଜୁଛନ୍ତି । ବିଭିନ୍ନ ଦେଶର କ୍ରିକେଟ ବୋର୍ଡ ଏବଂ ଆଇସିସି ସହ କଥାବାର୍ତା କରି ଏହାର ସୂତ୍ର ବାହାର କରିବାକୁ ମଧ୍ୟ ବିସିସିଆଇ ଲାଗି ପଡ଼ିଛି । ତେବେ ବ୍ୟସ୍ତବହୁଳ ଏଫଟିପି କାରଣରୁ ଏହା କଷ୍ଟକର ହୋଇପଡିଛି । ଅକ୍ଟୋବର-ନଭେମ୍ବରରେ ଭାରତରେ ଆଇସିସି ଟି-୨୦ ବିଶ୍ୱକପ ଖେଳାଯିବାକୁ ଥିବାରୁ ଏହା ପୂର୍ବରୁ କିମ୍ବା ପରେ କରାଯିବା କଥା ବିଚାର କରାଯାଉଛି । କିନ୍ତୁ ଭାରତରେ ଏହା କରାଇବା କାଠିକର ପାଠ ହେବ ବୋଲି ବର୍ତମାନର କରୋନା ମହାମାରୀ ପରିସ୍ଥିତିରୁ ସ୍ପଷ୍ଟ ପ୍ରତୀୟମାନ ହେଉଛି । ଏଭଳି ପରିସ୍ଥିତିରେ ୟୁଏଇ କିମ୍ବା ଇଂଲଣ୍ଡ ସ୍ଥାନାନ୍ତର ବିଷୟ ମଧ୍ୟ ବିଚାର କରାଯାଉଛି । ଆଇପିଏଲ ଏବଂ ବିଶ୍ୱକପ ଖେଳାଯିବା ନେଇ ଏବେଠାରୁ କିଛି କହିବା ସମ୍ଭବ ନୁହେଁ । ମାସକ ପରେ ପରିସ୍ଥିତିକୁ ଦେଖି ନିଷ୍ପତ୍ତି ନିଆଯିବ ବୋଲି ଗାଙ୍ଗୁଲି କହିଛନ୍ତି ।
