୬୫ ବର୍ଷୀୟା ବୃଦ୍ଧାଙ୍କୁ ଗଣବଳାକ୍ରାର

Apr 30, 2021 - 09:31 Updated: Apr 30, 2021 - 09:31

4193

ଢେ଼ଙ୍କାନାଳ: ଢେ଼ଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନାତୁଣିର ଚିକିତ୍ସା କରାଇବାକୁ ଆସିଥିବା ଜଣେ ୬୫ ବର୍ଷୀୟା ବୃଦ୍ଧାଙ୍କୁ ଗଣବଳାକ୍ରାର ହୋଇଛି । ଡାକ୍ତରଖାନାର ଦୁଇ ଜଣ ଠିକା କର୍ମଚାରୀ ଏଥିରେ ସମ୍ପୃକ୍ତ ଥିବା ଅଭିଯୋଗ ହୋଇଛି । ଏ ନେଇ ଅଭିଯୋଗ ହେବା ପରେ ପୁଲିସ ଦୁଇ ଠିକା କର୍ମଚାରୀଙ୍କୁ ଅଟକ ରଖି ପଚରାଉଚୁରା ଚଳାଇଛି । ଏଥିସହ ଡାକ୍ତରଖାନାର ସିସିଟିଭି ଫୁଟେଜ ଯାଞ୍ଚ କରୁଛି । ସୂଚନା ଅନୁସାରେ ଗଁଦିଆ ଥାନା ଅଞ୍ଚଳର ବୃଦ୍ଧା ଜଣକ ତାଙ୍କର ବାପା-ମା ଛେଉଣ୍ଡ ୯ ବର୍ଷୀୟ ନାତୁଣି ଏକ ଶିଶୁଗୃହରେ ଛାଡ଼ିଥିଲେ । ନାତୁଣିର ଦେହ ଖରାପ ଥିବାରୁ ଗତ ୧୯ ତାରିଖରେ ଶିଶୁ ଗୃହ କର୍ତ୍ତୃପକ୍ଷ ତାଙ୍କୁ ଢେ଼ଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ । ଶିଶୁ ରୋଗ ବିଭାଗରେ ତାର ଚିକିତ୍ସା ଚାଲିଥିବା ବେଳେ ଦେଖାଶୁଣା କରିବାକୁ ବୃଦ୍ଧା ଡାକ୍ତରଖାନାରେ ରହିଥିଲେ । ମଙ୍ଗଳବାର ରାତି ୧୦ଟାରେ ଡାକ୍ତରଖାନାର ଦୁଇ ଜଣ ଠିକା କର୍ମଚାରୀ ବୃଦ୍ଧାଙ୍କୁ ସହାୟତା କରିବା ବାହାନାରେ ଡାକ୍ତରଖାନାଠାରୁ ପ୍ରାୟ ୧ କିମି ଦୂରକୁ ନେଇ ଯାଇଥିଲେ । ସେଠାରେ କାମାନ୍ଧ ଯୁବକ ଦ୍ୱୟ ତାଙ୍କୁ ଗଣବଳାକ୍ରାର କରିଥିଲେ । ବୃଦ୍ଧା ସଂଜ୍ଞାହୀନ ହୋଇପଡ଼ିବା ପରେ ଯୁବକ ଦ୍ୱୟ ସେଠାରେ ତାଙ୍କୁ ଛାଡ଼ି ପଳାଇଥିଲେ । ସକାଳେ ସଜ୍ଞା ଫେରିବା ପରେ ବୃଦ୍ଧା କୌଣସି ମତେ ଆସି ଡାକ୍ତରଖାନାରେ ପହଞ୍ଚିଥିଲେ । ତେବେ ତାଙ୍କ ସ୍ୱାସ୍ଥ୍ୟାବସ୍ଥା ଭଲ ନଥିବାରୁ ସେ ଏ ସମ୍ପର୍କରେ କିଛି କହିପାରିନଥିଲେ । ଜଣେ ରୋଗୀ ସମ୍ପର୍କୀ କୌଣସି ପ୍ରକାରେ ଏ କଥା ଜାଣିବା ପରେ ଡାକ୍ତରଖାନା ପରିସରରେ ଥିବା ମହିଳା ସହାୟତା କେନ୍ଦ୍ର ‘ସଖି’ର କର୍ମଚାରୀ ଏ ସମ୍ପର୍କରେ ଟାଉନଥାନାକୁ ଅବଗତ କରାଇଥିଲେ । ଟାଉନଥାନା ପୁଲିସ ଡାକ୍ତରଖାନାରେ ପହଞ୍ଚି ବୃଦ୍ଧଙ୍କୁ ଭେଟି ସମସ୍ତ ଘଟଣା ବୁଝିବା ସହ ଦୁଇ ଠିକା କର୍ମଚାରୀଙ୍କୁ ଅଟକ ରଖିଛି । ଏଥିସହ ଡାକ୍ତରଖାନାର ସିସିଟିଭି ଫୁଟେଜ ଯାଞ୍ଚ କରୁଛି ।