ୟୁଏଇରେ ଲିଭ-ଇନ ଓ ମଦ୍ୟପାନକୁ ଅନୁମତି

Nov 10, 2020 - 09:00 Updated: Nov 10, 2020 - 09:00

2215

ଦୁବାଇ: ସଂଯୁକ୍ତ ଆରବ ଏମିରେଟ୍ସ (ୟୁଏଇ) ସରକାର ଏକ ଐତିହାସିକ ନିଷ୍ପତ୍ତି ନେଇ ଦେଶର ଇସଲାମିକ ଆଇନରେ ବଡ଼ ସଂଶୋଧନ ଆଣିଛନ୍ତି । ଏହି ସଂଶୋଧନ ଅନୁସାରେ ଦେଶର ପ୍ରେମୀ ଯୁଗଳ ବିବାହ ପୂର୍ବରୁ ଲିଭ-ଇନରେ ରହିପାରିବେ । ଏଥିସହ ଦେଶରେ ମଦ୍ୟପାନକୁ ଅନୁମତି ଦିଆଯାଇଥିବା ବେଳେ ଅନର କିଲିଙ୍ଗକୁ ଅପରାଧ ଶ୍ରେଣୀ ଭୁକ୍ତ କରାଯାଇଛି । ପୂର୍ବରୁ ପ୍ରଚଳିତ ଆଇନରେ ମଦ୍ୟପାନ ଉପରେ କଠୋର ନିୟମ ଲାଗୁ ହୋଇଥିଲା । ମଦ ବିକିବା ଏବଂ ଘରେ ମହଜୁଦ ରଖିବା ପାଇଁ ଲାଇସେନ୍ସ ଆବଶ୍ୟକ ପଡ଼ୁଥିଲା । ଏବେ୨୧ ବର୍ଷରୁ ଅଧିକ ବୟସର ଲୋକେ ମଦ ପିଇବା, ରଖିବା ଏବଂ ବିକି୍ର କରିପାରିବେ । ମଦ ପିଇବା ନେଇ ଯେଉଁ ମୁସଲିମଙ୍କ ଉପରେ କଟକଣା ଲଗାଯାଇଥିଲା, ତାହାକୁ ବି ହଟାଇ ଦିଆଯାଇଛି । ପୂର୍ବରୁ ୟୁଏଇରେ ଲିଭ ଇନ ସମ୍ପର୍କରେ ରହିବା ପାଇଁ କେବଳ ବିଦେଶୀଙ୍କୁ ଅନୁମତି ମିଳୁଥିଲା । ତଥାପି କିଛି କଟକଣା ଲାଗୁ ହେଉଥିଲା । ଏବେ ସମସ୍ତଙ୍କ ପାଇଁ ନିୟମ କୋହଳ କରାଯାଇଛି । ଦେଶରେ ଏବେ ଅବିବାହିତ ଲୋକମାନେ ବିବାହ ପୂର୍ବରୁ ଏକାଠି ରହିପାରିବେ । ଏହାକୁ ଆଉ ଅପରାଧ ବିବେଚନା କରାଯିବ ନାହିଁ । ପୂର୍ବରୁ ଦେଶରେ ଅନର କିଲିଙ୍ଗ ଭଳି ଅପରାଧକୁ ସଂରକ୍ଷଣ ମିଳୁଥିଲା । ଫଳରେ ଏହି ଅପରାଧ ବୃଦ୍ଧି ପାଇବାକୁ ଲାଗି ଥିଲା । କେତେକ ହତ୍ୟା ଘଟଣାରେ ଅଭିଯୁକ୍ତମାନେ ଏହାକୁ ଅନର କିଲିଙ୍ଗ ଆଖ୍ୟା ଦେଇ ବଞ୍ଚିଯାଇଥିଲେ । କିନ୍ତୁ ଏବେ ଏହାକୁ ଅପରାଧ ବିବେଚନା କରାଯିବ ଏବଂ ଦୋଷୀଙ୍କୁ ଦଣ୍ଡ ମିଳିବ ।