ସୂର୍ଯ୍ୟପରାଗ ପାଇଁ ୨୫ରେ ରାତି ସାରା ଖୋଲାରହିବ ଶ୍ରୀମନ୍ଦିର
ସୂର୍ଯ୍ୟପରାଗ ପାଇଁ ୨୫ରେ ରାତି ସାରା ଖୋଲାରହିବ ଶ୍ରୀମନ୍ଦିର
admin
2588
ଭୁବନେଶ୍ୱର - ଡିସେମ୍ବର ୨୬ରେ ସୂର୍ଯ୍ୟପରାଗ । ଏହିଦିନ ସକାଳ ୮ ଘଣ୍ଟା ୨୦ ମିନିଟ୍ ୮ ସେକେଣ୍ଡରେ ଗ୍ରହଣ ସ୍ପର୍ଶ କରିବ । ତେଣୁ ଡିସେମ୍ବର ୨୫ ରାତି ୮ଟା ୨୦ ମିନିଟରୁ ପାକତ୍ୟାଗ ସହ ଅନ୍ନଭୋଜନ, ଦେବନୀତି ନିଷେଧ କରାଯାଇଛି । ଯେହେତୁ ରାତି ୮ଟା ୨୦ରୁ ପାକତ୍ୟାଗ ସହ ଦେବନୀତି ନିଷେଧ କରାଯାଇଛି, ସେହି ଦୃଷ୍ଟିରୁ ଏହି ସମୟ ପରଠାରୁ ଗ୍ରହଣ ସ୍ପର୍ଶ ପର୍ଯ୍ୟନ୍ତ ଶ୍ରୀମନ୍ଦିରରେ ଦେବନୀତି ନିଷେଧ କରାଯାଇଛି । ପହିଲି ଭୋଗର କୌଣସି ବି ନୀତି ଏହି ସମୟ ପରଠାରୁ ସଂପାଦନ ହେବନି । ଏହି ଦୃଷ୍ଟିରୁ ୨୫ ତାରିଖ ରାତି ୮ଟା ୨୦ରୁ ୨୬ ତାରିଖ ୮ଟା ୨୦ ମିନିଟ୍ ୮ ସେକେଣ୍ଡ ପର୍ଯ୍ୟନ୍ତ ଶ୍ରୀମନ୍ଦିରରେ ପହୁଡ଼ ସହ ଅନ୍ୟାନ୍ୟ ନୀତି ନିଷେଧ କରାଯାଇଛି । ଯେହେତୁ ପହୁଡ଼ ନୀତି ଅନୁଷ୍ଠିତ ହେବନି, ସେହି ଦୃଷ୍ଟିରୁ ୨୫ ତାରିଖ ରାତିସାରା ଶ୍ରୀମନ୍ଦିର ଖୋଲା ରହିବ ବୋଲି ଶ୍ରୀମନ୍ଦିର ପ୍ରଶାସନ ସୂଚନା ଦେଇଛି ।
ଶ୍ରୀମନ୍ଦିର ପ୍ରଶାସନ ସୂଚନା ମୁତାବକ, ରାତିସାରା ଶ୍ରୀମନ୍ଦିର ଖୋଲା ରହିବ । ଭକ୍ତମାନେ ଶ୍ରୀମନ୍ଦିର ଯାଇପାରିବେ । ମହାପ୍ରଭୁଙ୍କ ଦର୍ଶନ ବି କରିପାରିବେ । କିନ୍ତୁ ମହାପ୍ରଭୁଙ୍କ ଦର୍ଶନ କେତେ ସମୟ ହୋଇପାରିବ, ସେ ଉପରେ କୌଣସି ନିଷ୍ପତ୍ତି ନିଆଯାଇନି । ତଥାପି ଶ୍ରୀମନ୍ଦିର ବନ୍ଦ ହେବନି । ୨୬ ତାରିଖ ଗ୍ରହଣ ସ୍ପର୍ଶ ପରେ ଗ୍ରହଣ ମହାସ୍ନାନ ଅନୁଷ୍ଠିତ ହେବ । ପରେ ବିଭିନ୍ନ ନୀତି ଆରମ୍ଭ ହେବ ।
ସୂଚନାଯୋଗ୍ୟ, ଗତ ୧୬ ତାରିଖ ଧନୁ ସଂକ୍ରାନ୍ତିରୁ ଶ୍ରୀମନ୍ଦିରରେ ପହିଲି ଭୋଗ ନୀତି ଆରମ୍ଭ ହୋଇଛି । ମକର ସଂକ୍ରାନ୍ତିରେ ଏହି ନୀତି ଶେଷ ହେବ । ଏଥିପାଇଁ ସ୍ୱତନ୍ତ୍ର ନୀତି ଚୂଡ଼ାନ୍ତ ହୋଇଛି । ଚୂଡ଼ାନ୍ତ ନୀତି ଅନୁଯାୟୀ ରାତି ୧୧ଟାରେ ମହାପ୍ରଭୁଙ୍କ ପହୁଡ଼ ନୀତି ଅନୁଷ୍ଠିତ ହେଉଛି । ଶ୍ରୀମନ୍ଦିରରେ ଦର୍ଶନ ବନ୍ଦ କରି ପହୁଡ଼ ହେଉଛି । କିନ୍ତୁ ୨୫ ତାରିଖରୁ ୨୬ ତାରିଖ ଗ୍ରହଣ ସ୍ପର୍ଶ ପର୍ଯ୍ୟନ୍ତ ଏହି ନୀତି ଅନୁଷ୍ଠିତ ହେବନାହିଁ ।
