ସାବଧାନ : ବ୍ୟାପୁଛି ଭୟଙ୍କର ପ୍ରଜାତି ଏନ ୪୪୦କେ

Jun 6, 2021 - 07:22 Updated: Jun 6, 2021 - 07:22

2103

ଅହମଦାବାଦ: କରୋନାର ସବୁଠାରୁ ବିପଜ୍ଜନକ ପ୍ରଜାତି ଏନ୪୪୦କେ ପ୍ରଜାତି ଏବେ ଗୋଟିଏ ପରେ ଗୋଟିଏ ରାଜ୍ୟରେ ଠାବ ହେବାପରେ ବିଶେଷଜ୍ଞଙ୍କ ଚିନ୍ତା ବଢ଼ିଛି । ପ୍ରଥମେ ଆନ୍ଧ୍ର ପ୍ରଦେଶରେ ଠାବ ହୋଇଥିବା ଏହି ନୂଆ ପ୍ରଜାତି ପରବର୍ତ୍ତୀ ସମୟରେ ମହାରାଷ୍ଟ୍ର, କର୍ଣ୍ଣାଟକ ଓ ତେଲେଙ୍ଗାନାରେ ମିଳିଥିଲା । ଏବେ ଗୁଜରାଟରେ ଏହି ପ୍ରଜାତି ଦ୍ୱାରା ସଂକ୍ରମିତ ୯ଟି ମାମଲା ଠାବ ହୋଇଥିବା ବେଳେ ଛତିଶଗଡ଼ରେ ମଧ୍ୟ ଚିହ୍ନଟ ହୋଇଛି । କରୋନାର ଏହି ସବୁଠାରୁ ଶକ୍ତିଶାଳୀ ପ୍ରଜାତି ୧୦ ଗୁଣ ଅଧିକ କ୍ଷୀପ୍ର ସଂକ୍ରମଣ ଘଟାଇବା ସହ ଆକ୍ରାନ୍ତ ବ୍ୟକ୍ତିଙ୍କୁ ମାତ୍ର ୩-୪ ଦିନ ଭିତରେ ଅତି ଗମ୍ଭୀର ସ୍ଥିତିରେ ପହଞ୍ଚାଇ ଦେଉଛି । ଏହି ଘାତକ ପ୍ରଜାତି ଏବେ ୫ଟିରୁ ଅଧିକ ରାଜ୍ୟରେ ଠାବ ହେବାପରେ ଆଗକୁ ଏହି ପ୍ରଜାତି ଗାଏବ ହେବ କିମ୍ବା ବଡ଼ ସଂକ୍ରମଣ ଆଣିବ ସେ ନେଇ ଗବେଷଣା ଜାରି ରହିଛି । ଏନ୪୪୦କେ ପ୍ରଜାତିର ସ୍ପାଇକ ପ୍ରୋଟିନରେ ବଡ଼ ରୂପାନ୍ତର ହୋଇଥିବାରୁ ବର୍ତ୍ତମାନ ଉପଲବ୍ଧ ଥିବା କୋଭିଡ ଟିକା ଏହାର କିଭଳି ମୁକାବିଲା କରୁଛି ତାହାର ଅନୁଧ୍ୟାନ ଚାଲିଛି । ମହାରାଷ୍ଟ୍ରରେ ୭୨୨ଟି କୋଭିଡ ଭାଇରସ ଜିନୋମ ସିକୁ୍ୟନେସିଂରୁ ୯୧ଟିରେ ଏନ୪୪୦କେ ପ୍ରଜାତି ଚିହ୍ନଟ କରାଯାଇଥିଲା । ସେହିଭଳି ତେଲେଙ୍ଗାନାରେ ୮୧ ଏବଂ କର୍ଣ୍ଣାଟକରେ ୫୪ ମାମଲା ଠାବ ହୋଇଛି । ଏବେ ଗୁଜରାଟରେ ୯ଟି ଏନ୪୪୦କେ ମାମଲା ଠାବ ହୋଇଥିବା ଗବେଷଣା ସଂସ୍ଥା ଏସିଏସଆଇଆର ରିପୋର୍ଟରୁ ଜଣାପଡ଼ିଛି ।