ସଙ୍କଟରେ ଓଡ଼ିଶାର ଇଞ୍ଜିନିୟରିଂ କଲେଜ, କମୁଛି ପିଲାଙ୍କ ଇଞ୍ଜିନିୟରିଂ ପଢ଼ିବାର ଆଗ୍ରହ
ସଙ୍କଟରେ ଓଡ଼ିଶାର ଇଞ୍ଜିନିୟରିଂ କଲେଜ, କମୁଛି ପିଲାଙ୍କ ଇଞ୍ଜିନିୟରିଂ ପଢ଼ିବାର ଆଗ୍ରହ
admin
4088
ଓଡ଼ିଶାରେ କିଭଳି ଅଛି ଇଞ୍ଜିନିୟରିଂ କଲେଜର ସ୍ଥିତି, ପିଲାଙ୍କ ଏହି ଶିକ୍ଷାପ୍ରତି ଆଗ୍ରହ ବଢିଛି ନା କମିଛି ସେ ନେଇ ଆଜି ବିଧାନସଭାରେ ଉତ୍ତର ରଖିଛନ୍ତି ବିଭାଗୀୟ ମନ୍ତ୍ରୀ | ସଙ୍କଟରେ ଇଞ୍ଜିନିୟରିଂ କଲେଜ । ଦିନକୁ ଦିନ ଇଞ୍ଜିନିୟରିଂ ଶିକ୍ଷା ପ୍ରତି ଛାତ୍ରଛାତ୍ରୀଙ୍କ ଆଗ୍ରହ କମୁଛି । ଫଳରେ ରାଜ୍ୟରେ ଖାଲି ପଡ଼ିଛି ୬୦%ରୁ ଅଧିକ ଇଂଜିନିୟରିଂ ସିଟ୍ । ରାଜ୍ୟର ବିଭିନ୍ନ ଇଞ୍ଜିନିୟରିଂ କଲେଜରେ କେଉଁଠି ୨୦ ପ୍ରତିଶତ, କେଉଁଠି ୩୦ ପ୍ରତିଶତ ପିଲା ପାଠ ପଢ଼ୁଛନ୍ତି । ୨୦୧୯-୨୦ ଶିକ୍ଷା ବର୍ଷରେ ମାତ୍ର ୧୧୭୪୫ ଜଣ ଛାତ୍ରଛାତ୍ରୀ ନାମ ଲେଖାଇଛନ୍ତି । ଚଳିତ ବର୍ଷ ମୋଟ୍ ୩୧୧୭୪ଟି ସିଟରୁ ୧୯୪୨୯ଟି ସିଟି ଖାଲି ପଡ଼ିଛି । ଇଞ୍ଜିନିୟରମାନଙ୍କୁ ରାଜ୍ୟରେ ଥିବା ଘରୋଇ ଶିଳ୍ପ ସଂସ୍ଥାରେ ନିଯୁକ୍ତି ଦେବା ପାଇଁ ସ୍ୱତନ୍ତ୍ର ଭାବେ ପଦକ୍ଷେପ ନେଉନଥିବାରୁ ଇଞ୍ଜିନିୟରିଂ ଶିକ୍ଷାଠାରୁ ପିଲାମାନେ ଦୂରେଇ ଯାଉଛନ୍ତି ।
ଆଜି ବିଧାନସଭାରେ ରାଜ୍ୟ ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରେମାନନ୍ଦ ନାୟକ, କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତିଙ୍କ ପ୍ରଶ୍ନର ଉତ୍ତର ରଖି କହିଛନ୍ତି, ରାଜ୍ୟରେ ବର୍ତ୍ତମାନ ୯୩ଟି ଇଞ୍ଜିନିୟରିଂ କଲେଜ ଓ ୧୬୩ ଟି ଡିପ୍ଲୋମା କଲେଜ ରହିଛି । ତିନୋଟି ଇଞ୍ଜିନିୟରିଂ କଲେଜ ବନ୍ଦ କରିବାକୁ ଅନୁମତି ନିଆଯାଇଛି । ଅନ୍ୟପଟେ ଉତ୍ତମ ପ୍ରଦର୍ଶନ କରୁନଥିବା ତଥା ରୁଗ୍ଣ ଅନଷ୍ଠାନକୁ ସହାୟତା କରିବା ପାଇଁ ସରକାର କୌଣସି ସାହାଯ୍ୟ କରିବେ ନାହିଁ ବୋଲି ସ୍ପଷ୍ଟ କରିଛନ୍ତି ମନ୍ତ୍ରୀ । ତେବେ ଇଞ୍ଜିନିୟରିଂ ଶିକ୍ଷାନୁଷ୍ଠାନଗୁଡ଼ିକୁ ସରକାରୀ ସହାୟତା ଦେବାସହ ପିଲାଙ୍କୁ ନିଯୁକ୍ତି ଦିଆଯାଉ ବୋଲି ଦାବି କରିଛନ୍ତି କଂଗ୍ରେସ ବିଧାୟକ ତାରା ବାହିନୀ ପତି । ଫଳରେ ଚାକିରି ଅନ୍ୱେଷଣରେ ଶିକ୍ଷିତ ଯୁବଗୋଷ୍ଠୀ ରାଜ୍ୟ ବାହାରକୁ ଯିବାକୁ ବାଧ୍ୟ ହେବେନି ବୋଲି ତାରା କହିଛନ୍ତି ।
