ରଥଯାତ୍ରାକୁ ମିଳିଲା ଅନୁମତି ,ବିନା ଭକ୍ତରେ ବଡଦାଣ୍ଡରେ ଗଡିବ ମହାପ୍ରଭୁଙ୍କ ତିନି ରଥ ।
ରଥଯାତ୍ରାକୁ ମିଳିଲା ଅନୁମତି ,ବିନା ଭକ୍ତରେ ବଡଦାଣ୍ଡରେ ଗଡିବ ମହାପ୍ରଭୁଙ୍କ ତିନି ରଥ ।
admin
6379
ସବୁ କଳ୍ପନା ଜଳ୍ପନାର ଅନ୍ତଘଟିଛି । ପୁରୀରେ ରଥଯାତ୍ରା ଆୟୋଜନ ନେଇ ଜାରି ରହିଥିବା ଅନିଶ୍ଚିତତାରେ ପୂର୍ଣ୍ଣଚ୍ଛେଦ ପଡ଼ିଛି । ରଥଯାତ୍ରା ନେଇ ପୁନଃବିଚାର ନିମନ୍ତେ ଆଗତ ପିଟିସନ ଉପରେ ଶୁଣାଣି କରି ସୁପ୍ରମିକୋର୍ଟ ରଥଯାତ୍ରା ପାଇଁ ଗ୍ରୀନ ସିଗନାଲ ଦେଇଛନ୍ତି । ଫଳରେ ଚଳିତ ବର୍ଷ ମହାପ୍ରଭୁ ବଡ଼ଦାଣ୍ଡକୁ ଓହ୍ଲାଇବେ ।ବଡ଼ଦାଣ୍ଡରେ ଗଡ଼ିବ ନନ୍ଦିଘୋଷ, ତାଳଧ୍ୱଜ ଓ ଦର୍ପଦଳନ । ସାଢେ଼ ୪ କୋଟି ଓଡ଼ିଆ ରଥଯାତ୍ରା ଦେଖିବାରୁ ବଂଚିତ ହେବେ ନାହିଁ । ସୁପ୍ରିମକୋର୍ଟର ମୁଖ୍ୟ ବିଚାରପତି ଏସ.ଏ ବୋବଡେ଼ଙ୍କ ନେତୃତ୍ୱାଧୀନ ଖଣ୍ଡପୀଠ ରଥଯାତ୍ରା ସପକ୍ଷରେ ରାୟ ଶୁଣାଇଛନ୍ତି । ଉକ୍ତ ଖଣ୍ଡପୀଠରେ ଜଷ୍ଟିସ ଏ.ଏସ ବୋପାନ୍ନା ଓ ଜଷ୍ଟିସ ଦୀନେଶ ମାହେଶ୍ୱରୀ ସାମିଲ ଥିଲେ । ନାଗପୁରସ୍ଥିତ ବାସଭବନରୁ ଭିଡିଓ କନଫରେନ୍ସିଂ ଜରିଆରେ ମୁଖ୍ୟ ବିଚାରପତି ଏସ.ଏ ବୋବଡେ଼ ମାମଲାର ଶୁଣାଣି କରି ରଥଯାତ୍ରା ହେବା ନେଇ ରାୟ ଶୁଣାଇଛନ୍ତି । କେତେକ ସର୍ତ୍ତ ସହ ସୁପ୍ରିମକୋର୍ଟ ପୁରୀ ରଥଯାତ୍ରାକୁ ଅନୁମତି ଦେଇଛନ୍ତି ।
ରଥଯାତ୍ରା ଆୟୋଜନ ଉପରେ ପୂର୍ବରୁ ଲଗାଇଥିବା ରୋକ ଉପରେ ପୁନଃବିଚାର କରି ଏଭଳି ରାୟ ଶୁଣାଇଛନ୍ତି ସୁପ୍ରିମକୋର୍ଟ । ସୁପ୍ରିମକୋର୍ଟ କହିଛନ୍ତି ଯେ, ରଥଯାତ୍ରା ସମୟରେ ବଡଦାଣ୍ଡରେ ନିର୍ଧାରିତ ସେବାୟତ ଛଡା ସାଧାରଣ ଭକ୍ତଙ୍କ ପ୍ରବେଶ ନିଷେଧ । ସେହିଭଳି ରଥଯାତ୍ରା ସମୟରେ ଯେଭଳି କୌଣସି ଜାଗାରେ ଭିଡ ନଜମିବ ସେଥିପ୍ରତି ବି ଗୁରୁତ୍ୱ ଦେବାକୁ ସୁପ୍ରିମକୋର୍ଟ ଖଣ୍ଡପୀଠ ପକ୍ଷରୁ କୁହାଯାଇଛି । ସେହିପରି କେବଳ ପୁରୀରେ କଟକଣା ଯୁକ୍ତ ରଥ ଗଡିବା ନେଇ ଅନୁମତି ଦେଇଛନ୍ତି ସୁପ୍ରିମକୋର୍ଟ । ଅନ୍ୟ କେଉଁ ଜାଗାରେ ବି ରଥଯାତ୍ରା ହେବ ନାହିଁ ସ୍ପଷ୍ଟ କରିଛନ୍ତି ସର୍ବୋଚ୍ଚ ଅଦାଲତ ।
ସେପଟେ, ସ୍ନାନ ଯାତ୍ରା ଭଳି ରଥ ଯାତ୍ରାର ମଧ୍ୟ ଲାଇଭ ଟେଲିକାଷ୍ଟ ହେବ । ଅର୍ଥାତ୍ ଭକ୍ତମାନେ ଘରେ ବସି ତିନି ଠାକୁରଙ୍କ ରଥଯାତ୍ରାର ସିଧା ପ୍ରସାରଣ ଦେଖିପାରିବେ । ଯଦିଓ ବଡଦାଣ୍ଡରେ ମହାପ୍ରଭୁଙ୍କ ସିଧାସଳଖ ଦେଖିବାର ସୌଭାଗ୍ୟ ମିଳିବନି ତଥାପି କିନ୍ତୁ ମହାପ୍ରଭୁଙ୍କ ରଥଯାତ୍ରା ହେବା ନେଇ ସୁପ୍ରିମ ରାୟ ଆସିବା ପରେ ଭକ୍ତଙ୍କ ମଧ୍ୟରେ ଖୁସିର ଲହରି ଖେଳିଯାଇଛି ।
