ଯାଂଚରେ କଟିଲା ୮ ପ୍ରାର୍ଥୀଙ୍କ ନାମାଙ୍କନ

Apr 11, 2019 - 07:42 Updated: Apr 11, 2019 - 07:42

3401

ଭଦ୍ରକ : ସାଧାରଣ ନିର୍ବାଚନ ୨୦୧୯ ନିମନ୍ତେ ଦାଖଲ ପ୍ରାର୍ଥୀପତ୍ରର ଆଜି ଯାଂଚ କରାଯାଇଛି । ମୋଟ ୫୫ଜଣ ପ୍ରାର୍ଥୀଙ୍କ ମଧ୍ୟରୁ ୮ଜଣ ପ୍ରାର୍ଥୀଙ୍କ ପ୍ରାର୍ଥୀପତ୍ର ଯାଞ୍ଚରେ କଟି ଯାଇଛି । ଭଦ୍ରକ ସଂସଦୀୟ କ୍ଷେତ୍ର ନିମନ୍ତେ ଦାଖଲ ହୋଇଥିବା ୧୦ଟି ପ୍ରାର୍ଥୀପତ୍ର ମଧ୍ୟରୁ ୨ଟି ପ୍ରାର୍ଥୀପତ୍ର ଯାଂଚରେ କଟିଛି । ଯେଉଁ ପ୍ରାର୍ଥୀଙ୍କ ନାମାଙ୍କନ ନାକଚ ହୋଇଛି ସେମାନେ ହେଲେ ସ୍ୱାଧୀନ ପ୍ରାର୍ଥୀ ସୁଶାନ୍ତ ଜେନା ଓ ଆମ୍ବେଦକର ନ୍ୟାସନାଲ ପାର୍ଟିର ଗୋପାଲ ରାମ । ସେହିପରି ଚାନ୍ଦବାଲି ବିଧାନସଭା ଆସନ ପାଇଁ ଦାଖଲ ହୋଇଥିବା ୮ଟି ପ୍ରାର୍ଥୀପତ୍ର ମଧ୍ୟରୁ ସୂର୍ଯ୍ୟନାରାୟଣ ମହାନ୍ତିଙ୍କ ପ୍ରାର୍ଥୀପତ୍ର ନାକଚ ହୋଇଛି । ସେହିପରି ବାସୁଦେବପୁର ପାଇଁ ଦାଖଲ ୮ଟି ପ୍ରାର୍ଥୀପତ୍ର ମଧ୍ୟରୁ ୨ଜଣଙ୍କ ପ୍ରାର୍ଥୀପତ୍ର ନାକଚ ହୋଇଛି । ସେ ଦୁଇଜଣ ହେଲେ ଆମ୍ବେଦକର ନ୍ୟାସନାଲ ପାର୍ଟିର ସେକ ମହମ୍ମଦ ଜମୀର ଓ ସ୍ୱାଧୀନ ପ୍ରାର୍ଥୀ ଗଣପତି ବେହେରା । ଭଦ୍ରକ ନିର୍ବାଚନ ମଣ୍ଡଳୀ ପାଇଁ ଦାଖଲ ହୋଇଥିବା ୧୦ଟି ପ୍ରାର୍ଥୀପତ୍ର ମଧ୍ୟରୁ ୨ଟି ପ୍ରାର୍ଥୀପତ୍ର ନାକଚ ହୋଇଛି । ସେ ଦୁଇଜଣ ହେଲେ ସଞ୍ଜୟ କୁମାର ନାୟକ ଏବଂ କୃଷ୍ଣଚନ୍ଦ୍ର ଖଟୁଆ । ଭଣ୍ଡାରିପୋଖରୀ ନିର୍ବାଚନ ମଣ୍ଡଳୀ ପାଇଁ ଦାଖଲ ହୋଇଥିବା ୧୧ ପ୍ରାର୍ଥୀପତ୍ର ମଧ୍ୟରୁ କେବଳ ଜଣଙ୍କର ପ୍ରାର୍ଥୀପତ୍ର ନାକଚ ହୋଇଛି । ଧାମନଗର ନିର୍ବାଚନ ମଣ୍ଡଳୀର କୌଣସି ପ୍ରାର୍ଥୀଙ୍କ ନାମାଙ୍କନପତ୍ର ନାକଚ ହୋଇ ନାହିଁ । ସେ ହେଲେ ବହୁଜନ ସମାଜ ପାର୍ଟିର ସନ୍ତୋଷ ପେରେଇ । ଯାଂଚ ପରେ ଏବେ ମୋଟ ୪୭ଜଣଙ୍କ ପ୍ରାର୍ଥୀପତ୍ର କାଏମ ରହିଛି । ଭଦ୍ରକ ସଂସଦୀୟ କ୍ଷେତ୍ର ପାଇଁ ୮, ବାସୁଦେବପୁର ବିଧାନସଭା ପାଇଁ ୬, ଭଦ୍ରକ ପାଇଁ ୮, ଭଣ୍ଡାରିପୋଖରୀ ପାଇଁ ୧୦, ଚାନ୍ଦବାଲି ପାଇଁ ୭ ଏବଂ ଧାମନଗର ପାଇଁ ୮ଜଣ ପ୍ରାର୍ଥୀ କାଏମ ରହିଛନ୍ତି ।