ବୁଲା କୁକୁର, ଗୋରୁଙ୍କୁ ଦିଆଯିବ ଖାଦ୍ୟ
ବୁଲା କୁକୁର, ଗୋରୁଙ୍କୁ ଦିଆଯିବ ଖାଦ୍ୟ
admin
6107
ଭୁବନେଶ୍ୱର:ଲକଡାଉନ ପାଇ ବିଭିନ୍ନ ବର୍ଗର ଲୋକଙ୍କ ପାଇଁ ଭିନ୍ନ ଭିନ୍ନ ପ୍ୟାକେଜ ଘୋଷଣା କରିବା ପରେ ଏବେ ରାଜ୍ୟ ସରକାର ବୁଲା କୁକୁର/ ଗୋରୁଙ୍କ ପାଇଁ ୫୪ ଲକ୍ଷ ଟଙ୍କା ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ଦେଇଛନ୍ତି । ଲକଡାଉନ ପାଇଁ ଦୋକାନ ବଜାର, ହୋଟେଲ, ରେସ୍ତୋରାଁ, ହଷ୍ଟେଲ ଆଦି ବନ୍ଦ ହୋଇଯାଇଥିବାରୁ ସହରାଞ୍ଜଳରେ ବୁଲା ପଶୁମାନେ ଖାଇବାକୁ ନ ପାଇ ବହୁ ହଇରାଣ ହେଉଛନ୍ତି । ଏପରିକି ବହୁ କୁକୁର ପାଗଳା ହୋଇଗଲେଣି । ବୁଲା ପଶୁ ଖାଦ୍ୟ ଅଭାବରୁ ହିଂସ୍ର ହୋଇଯାଉଥିବାରୁ ସେମାନଙ୍କୁ ଯେପରି ପ୍ରତିଦିନ ଖାଇବାକୁ ଦିଆଯିବ ସେ ନେଇ ଏହି ଅର୍ଥ ବରାଦ ହୋଇଛି । ରାଜ୍ୟର ୫ଟି ମହାନଗର ନିଗମ ସମେତ ୪୮ଟି ପୌରାଞ୍ଚଳରେ ଏହି ବ୍ୟବସ୍ଥା ଲାଗୁ କରିବାକୁ ପୌର ପ୍ରଶାସକ ସଂଗ୍ରାମଜିତ ନାୟକ ସମସ୍ତ ମହାନଗର ନିଗମ କମିସନର, ନିର୍ବାହୀ ଅଧିକାରୀଙ୍କୁ ଚିଠି ଲେଖି ଜଣାଇଛନ୍ତି ।
ରାଜ୍ୟର ୫ଟି ମହାନଗର ନିଗମ ଭୁବନେଶ୍ୱର, କଟକ, ବ୍ରହ୍ମପୁର, ରାଉରକେଲା, ସମ୍ବଲପୁର ସମେତ ୪୮ଟି ମ୍ୟୁନିସିପାଲିଟିରେ ଥିବା ପ୍ରାୟ ୧ ଲକ୍ଷ ୨୦ ହଜାର ବୁଲା କୁକୁର ଏବେ ଖାଇବାକୁ ପାଉନାହାନ୍ତି । ସେମାନଙ୍କୁ ତୁରନ୍ତ ଖାଇବାକୁ ଦେବାକୁ କୁହାଯାଇଛି । ୧୮ ଦିନ ପାଇଁ ଏହି ବ୍ୟବସ୍ଥା କରିବାକୁ କୁହାଯାଇଛି । ଏଥିରେ ଭୁବନେଶ୍ୱରରେ ଦିନକୁ ୨୦ ହଜାର ଟଙ୍କା ହିସାବରେ ୩ ଲକ୍ଷ ୬୦ ହଜାର, ବାକି ୪ଟି ମହାନଗର ନିଗମରେ ଦିନକୁ ୧୦ ହଜାର ଟଙ୍କା ହିସାବରେ ୭ ଲକ୍ଷ ୨୦ ହଜାର, ୪୮ଟି ମ୍ୟୁନିସିପାଲଟି ୫ ହଜାର ଲେଖାଏଁ ହିସାବରେ ୪୩ ଲକ୍ଷ ୨୦ ହଜାର ଟଙ୍କା ଦେବାକୁ କୁହାଯାଇଛି ।
ବୁଲା କୁକୁର / ପଶୁଙ୍କୁ ଖାଇବାକୁ ଦେବାକୁ ବିଭିନ୍ନ ସ୍ୱେଚ୍ଛାସେବୀ ସଂଗଠନ, ପୌରସଂସ୍ଥାର ୱାର୍ଡ ସ୍ତରୀୟ କର୍ମଚାରୀମାନଙ୍କ ମାଧ୍ୟମରେ ଖାଦ୍ୟ ବାଣ୍ଟିବାକୁ କୁହାଯାଇଛି ।
