ବିଧାନସଭା ଚଳାଇ ଦେବୁନି: ବିରୋଧୀ
ବିଧାନସଭା ଚଳାଇ ଦେବୁନି: ବିରୋଧୀ
admin
1924
ଭୁବନେଶ୍ୱର: ବଜେଟ ଅଧିବେଶନର ଆଜି ହେଉଛି ତୃତୀୟ ଦିନ । ତେବେ ବିଧାନସଭା ଆରମ୍ଭରୁ ହିଁ ହଟ୍ଟଗୋଳ ଲାଗି ରହିଛି । ଯାହାକୁ ନେଇ ବାଚସ୍ପତି ସୂର୍ଯ୍ୟନାରାୟଣ ପାତ୍ର ଗୃହକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବୀ କରିଦେଇଛନ୍ତି । ମୁଲତବୀ ପରେ ଗୃହ ବାହାରେ ମଧ୍ୟ ବିରୋଧୀ ହୋହାଲ୍ଲା କରିବା ସହ ପ୍ଲାକାର୍ଡ ପ୍ରଦର୍ଶନ କରିଛନ୍ତି ।
ଏହି ଅବସରରେ ସରକାର ଆଲୋଚନାକୁ ଆସନ୍ତୁ ବୋଲି ବିଜେପି ବିଧାୟକ ନାଉରୀ ନାୟକ କହିଛନ୍ତି । ଖାଦ୍ୟ ଯୋଗାଣ ଓ ସମବାୟ ମନ୍ତ୍ରୀଙ୍କ ବିବୃତିକୁ ସମାଲୋଚନା କରି କହିଛନ୍ତି ଯେ, ମନ୍ତ୍ରୀଙ୍କ ବିବୃତି ଦୁଃଖଦାୟକ । ଧାନ କିଣା ଠିକ ହିସାବରେ ହୋଇନାହିଁ । ଗତବର୍ଷଠୁ ଅଧିକ କିଣାଯାଇଛି ବୋଲି ମନ୍ତ୍ରୀ କହିଲେ । କିନ୍ତୁ ଅଧିକ ଅମଳ ହୋଇଛି ବୋଲି କହିଲେନି । ମଣ୍ଡି ବାହାରେ ହଜାର ହଜାର କ୍ୱିଣ୍ଟାଲ ଧାନ ପଡ଼ି ରହିଛି । ଚାଷୀଙ୍କ ଟୋକନ ଧାନ କିଣାରେ ବିଳମ୍ବ ଯୋଗୁଁ ବାତିଲ ହୋଇଛି । ଟୋକନ ବୈଧ କରାଯିବା ସହ ଟାର୍ଗେଟ ବୃଦ୍ଧି କରାଯିବାକୁ ବିଧାୟକ ଶ୍ରୀ ନାୟକ ଦାବି କରିଛନ୍ତି । ଏହାଛଡ଼ା ପଡ଼ି ରହିଥିବା ଧାନକୁ ଉଠାଯିବାକୁ ସେ ଦାବି କରିଛନ୍ତି । ଅଭିମୁଖ୍ୟ ବଦଳିନି, ସରକାର ନମାନିଲେ ଗୃହକୁ ଚଳାଇ ଦେବୁନି ବୋଲି ବିରୋଧୀଙ୍କ ପକ୍ଷରୁ କୁହାଯାଇଛି ।
ପ୍ରକାଶଯେ, ଆଜି ବିଧାନସଭାରେ ବିରୋଧୀଙ୍କ ପ୍ରବଳ ହଟ୍ଟଗୋଳ ମଧ୍ୟରେ ଖାଦ୍ୟ ଯୋଗାଣ ଓ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ତାଙ୍କ ବିବୃତିରେ କହିଥିଲେଯେ, ଗତ ବର୍ଷ ତୁଳନାରେ ରାଜ୍ୟରେ ୨୧ ପ୍ରତିଶତ ଅଧିକ ଧାନ ସଂଗ୍ରହ ହୋଇଛି । ଧାନ କ୍ରୟର ୭ ଦିନ ପୂର୍ବରୁ ଚାଷୀଙ୍କୁ ତାରିଖ ଓ ପରିମାଣ ଜଣାଇ ଦିଆଯାଉଛି । ଚଳିତ ବର୍ଷ ୫୫.୦୫ ଲକ୍ଷ ମେଟ୍ରିକ ଟନ ଧାନ ସଂଗ୍ରହ ହୋଇଛି । ଗତ ବର୍ଷ ୪୫.୬୧ ଲକ୍ଷ ମେଟ୍ରିକ ଟନ ଧାନ ସଂଗ୍ରହ ହୋଇଥିଲା । ବର୍ତ୍ତମାନ ସୁଦ୍ଧା ୯.୯୩ ଲକ୍ଷ ଚାଷୀ ସରକାରଙ୍କୁ ଧାନ ବିକ୍ରି କରିଛନ୍ତି । ଏ ବାବଦକୁ ଚାଷୀଙ୍କ ଆକାଉଣ୍ଟକୁ ୧୦ ହଜାର ୨୮୧ କୋଟି ଟଙ୍କା ପଠାଯାଇଛି । ବିରୋଧୀଙ୍କ ନିକଟରେ ଏଜେଣ୍ଡା ନଥିବାରୁ ହୋହାଲ୍ଲା କରୁଛନ୍ତି । ବାହାର ରାଜ୍ୟ ବ୍ୟବସାୟୀ ନୁହେଁ, କେବଳ ପଞ୍ଜିକୃତ ଚାଷୀଙ୍କ ଧାନ କିଣିବୁ । ଆସନ୍ତା ମାର୍ଚ୍ଚ ୩୧ ପର୍ଯ୍ୟନ୍ତ ଚାଲିବ ବୋଲି ରଣେନ୍ଦ୍ର ପ୍ରତାପ ସ୍ୱାଇଁ କହିଥିଲେ ।
