ବଢ଼ୁଛି ପିଆଜ ଆମଦାନୀ, ଖୁଚୁରା ବଜାରରେ କିଲୋ ୭୦ ରୁ ୮୦
ବଢ଼ୁଛି ପିଆଜ ଆମଦାନୀ, ଖୁଚୁରା ବଜାରରେ କିଲୋ ୭୦ ରୁ ୮୦
admin
6457
ଭୁବନେଶ୍ୱର - ରାଜ୍ୟକୁ ପିଆଜ ଆମଦାନୀ ବଢ଼ୁଛି । ଫଳରେ ରୋଷେଇ ଘରର ଏହି ପ୍ରମୁଖ କଞ୍ଚାମାଲ ମୂଲ୍ୟ ଖସିବାରେ ଲାଗିଛି । ଗୁରୁବାର ରାଜଧାନୀ ଭୁବନେଶ୍ୱର ସମେତ ବିଭିନ୍ନ ସ୍ଥାନରେ ପିଆଜ ପାଇକାରୀ (ହୋଲସେଲ) ଦର ୫୫ ଟଙ୍କାରୁ ୬୦ ଟଙ୍କାକୁ ଖସିଆସିଛି । ଖୁଚୁରା ମୂଲ୍ୟ ୭୦ ରୁ ୮୦ ଟଙ୍କା ମଧ୍ୟରେ ରହିଛି ।
ନାସିକରୁ ଆମଦାନୀ କମିଥିବାରୁ ୧୫ ଦିନ ହେଲା ଓଡ଼ିଶାର ବିଭିନ୍ନ ସହରରେ ପିଆଜ ଦର ଆକାଶଛୁଅାଁ ହୋଇଥିଲା । କିଲୋ ପିଛା ୧୫୦ ଟଙ୍କା ଟପିଥିଲା । କିନ୍ତୁ ୨ ଦିନ ହେଲା ରାଜ୍ୟକୁ ପିଆଜ ଆମଦାନୀ ବଢ଼ିଛି । ଏବେ ନାସିକ ଓ ବାଙ୍ଗାଲୋରରୁ ଦୈନିକ ୨,୦୦୦ ଟନ୍ ପିଆଜ ଓଡ଼ିଶାକୁ ପଶୁଛି । ଫଳରେ ପିଆଜର ଉପଲବ୍ଧତା ବଢ଼ିଛି ।
ବିଭିନ୍ନ ବ୍ୟବସାୟୀ ସଂଘ ପକ୍ଷରୁ ମିଳିଥିବା ସୂଚନା ମୁତାବକ, ଓଡ଼ିଶାକୁ ଦୈନିକ ୩,୫୦୦ ଟନ ପିଆଜ ଆବଶ୍ୟ । ନାସିକରେ ଯୋଗାଣ ସଙ୍କଟ କାରଣରୁ ଡିସେମ୍ବର ପହିଲା ବେଳକୁ ରାଜ୍ୟକୁ ପିଆଜ ଆମଦାନୀ ୧,୫୦୦ ଟନକୁ ଖସି ଆସିଥିଲା । କିନ୍ତୁ ଗୁରୁବାର ରାଜ୍ୟର ବିଭିନ୍ନ ବଜାରକୁ ୨,୦୦୦ ଟନ୍ ପିଆଜ ଆମଦାନି ହୋଇଛି । ସେଥିମଧ୍ୟରୁ ୧,୪୦୦ ଟନ କେବଳ ନାସିକରୁ ଆସିଛି । ଆଉ ୬୦୦ ଟନ୍ ଛୋଟ ପିଆଜ ବାଙ୍ଗାଲୋରରୁ ଆସିଛି । ଏଣୁ ପିଆଜ ମୂଲ୍ୟ କମିବାରେ ଲାଗିଛି ।
ଭୁବନେଶ୍ୱର କୁବେରପୁରୀ ବ୍ୟବସାୟୀ ମହାସଂଘ ସାଧାରଣ ସମ୍ପାଦକ ଶକ୍ତି ଶଙ୍କର ମିଶ୍ର କହିଛନ୍ତି, ନାସିକରୁ ଆସିଥିବା ପିଆଜର ପାଇକାରୀ ମୂଲ୍ୟ ୬୦ ଟଙ୍କା ରହିଛି । ପାଇକାରୀ ବଜାରରେ ବାଙ୍ଗାଲୋର ଛୋଟ ପିଆଜ ୫୫ ଟଙ୍କାରେ ବିକି୍ର ହେଉଛି । ଏହା ସାଧାରଣ ଜନତାଙ୍କୁ ସାମାନ୍ୟ ଆଶ୍ୱସ୍ତି କରିଛି । ଆଗାମୀ କିଛି ଦିନ ମଧ୍ୟରେ ନାସିକରୁ ପିଆଜ ଅମଳ ଆରମ୍ଭ ହେବ । ଏହାପରେ ଯୋଗାଣ ବଢ଼ିବ ଓ ଦାମ ଖସିବ ।
ସେହିପରି ଭୁବନେଶ୍ୱର ଏକ ନମ୍ବର ହାଟର ଜଣେ ବ୍ୟବସାୟୀ କହିଛନ୍ତି, ପିଆଜ ଆମଦାନୀ ସାମାନ୍ୟ ବଢ଼ିଥିବାରୁ ଦର କମିଛି । ପିଆଜ କିଲୋ ୭୦ ରୁ ୮୦ ଟଙ୍କାରେ ବିକି୍ର ହେଉଛି । ତେବେ ଜାନୁଆରୀ ପ୍ରଥମାର୍ଦ୍ଧରେ ଓଡ଼ିଶାର କଣ୍ଟାବାଞ୍ଜି, ଅନୁଗୁଳ ଓ ବୌଦ୍ଧ ଜିଲ୍ଲାରୁ ନୂଆ ପିଆଜ ଅମଳ ହେବ । ଫଳରେ ଦର ପୁଣି ଖସିବ । ଏହିପରି ପିଆଜର ମୂଲ୍ୟ ୧୫ ରୁ ୨୦ ଟଙ୍କାକୁ ଖସି ଆସିବ ବୋଲି ବ୍ୟବସାୟୀ ଜଣକ କହିଛନ୍ତି ।
