ପ୍ରବାସୀ ଶ୍ରମିକଙ୍କ ହେବ ଦକ୍ଷତା ମ୍ୟାପିଂ ।
ପ୍ରବାସୀ ଶ୍ରମିକଙ୍କ ହେବ ଦକ୍ଷତା ମ୍ୟାପିଂ ।
admin
5288
କରୋନା ଲକଡାଉନ ଯୋଗୁଁ ବାହାରେ ରାଜ୍ୟରେ ଫସି ରହିଥିବା ପ୍ରବାସୀ ଓଡ଼ିଆମାନେ ଏବେ ପର୍ଯ୍ୟାୟ କ୍ରମେ ଧୀରେ ଧୀରେ ଓଡ଼ିଶା ଫେରୁଛନ୍ତି । କିଏ ବସରେ ତ କିଏ ଟ୍ରେନରେ ଫେରୁଛନ୍ତି । ଏହାରି ଭିତରେ ରାଜ୍ୟକୁ ୩ ଲକ୍ଷ ପ୍ରବାସୀ ଶ୍ରମିକ ଆସିଥିବା ସିଏମଓ ପକ୍ଷରୁ କୁହାଯାଇଥିଲା । ତେବେ ଆସିଥିବା ପ୍ରବାସୀମାନଙ୍କ ଦକ୍ଷତା ମ୍ୟାପିଂ କରାଯିବ । ପ୍ରବାସୀ ଶ୍ରମିକଙ୍କୁ କାମ ଦେବା ପ୍ରସଙ୍ଗରେ ସାଂସଦ ସୁବାସ ସିଂହ ନିଜର ପ୍ରତିକ୍ରିୟା ରଖି ଏହା କହିଛନ୍ତି ।
ସେ କହିଛନ୍ତି ଯେ, କେଉଁ ଶ୍ରମିକ କେଉଁ କ୍ଷେତ୍ରରେ କି କାମ କରୁଥିଲେ ତାର ପୂରା ତଥ୍ୟ ନିଆଯିବ । ଦକ୍ଷତା ଅନୁସାରେ ପ୍ରବାସୀ ଶ୍ରମିକଙ୍କୁ କାମ ଯୋଗାଇ ଦିଆଯିବ । ଶ୍ରମିକଙ୍କ ଦକ୍ଷତା ନେଇ ବ୍ଲକ ଓ ଜିଲ୍ଲାସ୍ତରରେ ସର୍ଭେ ଚାଲିଛି । ତେବେ ମନରେଗାରେ ସର୍ବନିମ୍ନ ମଜୁରୀ ୩ ଶହ କରିବା ନେଇ କେନ୍ଦ୍ର ସରକାର ବିଚାର କରନ୍ତୁ ବୋଲି ସାଂସଦ ଶ୍ରୀ ସିଂହ କହିଛନ୍ତି ।
ଏହାଛଡ଼ା ସେ କହିଛନ୍ତି ଯେ, ପ୍ରବାସୀଙ୍କୁ କର୍ମ ସଂସ୍ଥାନ ନେଇ ବଡ଼ ଯୋଜନା ଚାଲିଛି । ମନରେଗାରେ ସ୍କିଲ କାମ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରସ୍ତାବ ଦିଆଯାଇଥିବା ସେ କହିଛନ୍ତି ।
ପ୍ରକାଶ ଯେ, ଆମର ପଡେ଼ାଶୀ ରାଜ୍ୟ ବିହାର ଓ ଝାଡ଼ଖଣ୍ଡ ସମେତ ଉତ୍ତରପ୍ରଦେଶରେ ପ୍ରବାସୀ ଶ୍ରମିକମାନଙ୍କର ଦକ୍ଷତା ମ୍ୟାପିଂ କାର୍ଯ୍ୟ ଜୋରଦାର ହେଉଛି । ସେମାନଙ୍କ ରାଜ୍ୟକୁ କେଉଁ ପ୍ରକାରର ଶ୍ରମିକ କେତେ ଆସିଛନ୍ତି ସେମାନେ ତାର ଡାଟାବେସ ପ୍ରସ୍ତୁତ କରିସାରିଲେଣି । ତେବେ ଓଡ଼ିଶାରେ କେବେ ଶ୍ରମିକମାନଙ୍କର ଦକ୍ଷତା ମ୍ୟାପିଂ ହେବ ବା ହେଲାଣି ସେ ସମ୍ପର୍କରେ ସେଣ୍ଟର ଫର ପଲିସି, ଗଭର୍ଣ୍ଣାନ୍ସ ଆଣ୍ଡ ଆଡଭୋକେସି (ସିପିଜିଏ) ର ଅଧ୍ୟକ୍ଷ ତେଜେଶ୍ୱର ପରିଡ଼ା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପୁଣି ଇ-ମେଲ ଯୋଗେ ଚିଠି ଲେଖିଥିଲେ ।
