ହାତୀ ଆକ୍ରମଣରେ ବୃଦ୍ଧ ମୃତ ।
ହାତୀ ଆକ୍ରମଣରେ ବୃଦ୍ଧ ମୃତ ।
admin
5413
ମୟୂରଭଞ୍ଜ ଜିଲ୍ଲାରେ ଥମୁନି ହାତୀ ଉପଦ୍ରବ । ପୁଣି ଜଣେ ବ୍ୟକ୍ତି ହାତୀ ଆକ୍ରମଣରେ ପ୍ରାଣ ହରାଇଛନ୍ତି । ମୃତକ ହେଲେ ବାରିପଦା ସଦର ଥାନା କୁକୁଡ଼ାଯୋଡ଼ି ଗ୍ରାମର ଚତୁର୍ଭୁଜ ନାୟକ (୬୦) । ହାତୀ ସ୍ଥାନ ଛାଡ଼ି ନ ଯିବାରୁ ୪ ଘଣ୍ଟା ଧରି ଶବ ପଡ଼ି ରହିଥିଲା ।
ସୂଚନା ଅନୁଯାୟୀ, ରାସଗୋବିନ୍ଦପୁର ରେଞ୍ଜ ଶଙ୍ଖାଭଙ୍ଗା ବିଟ ଅଞ୍ଚଳରେ ୫ ରୁ ୬ଟି ହାତୀ ଗତ କିଛି ଦିନ ହେଲା ସ୍ଥାନୀୟ ଅଞ୍ଚଳରେ ଉତ୍ପାତ ଜାରି ରଖିଛନ୍ତି । ଏ ନେଇ ଲୋକେ ବାରମ୍ବାର ଅଭିଯୋଗ କରୁଥିଲେ ବି ହାତୀ ଘଉଡ଼ାଇବାରେ ବିଫଳ ହୋଇଥିଲା ବନ ବିଭାଗ । ରବିବାର ସକାଳେ ଚତୁର୍ଭୁଜ କୁକୁଡ଼ାଯୋଡ଼ି ଗାଁ ନିକଟ ଜଙ୍ଗଲକୁ ଶୌଚ ହେବାକୁ ଯାଇଥିବା ବେଳେ ଏକ ଦନ୍ତା ଚତୁର୍ଭୁଜଙ୍କୁ ଶୁଣ୍ଢରେ ଟେକି ନେଇ କଚାଡ଼ି ଦେଇଥିଲା । ଫଳରେ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା । ଏ ସମ୍ପର୍କରେ ଗ୍ରାମବାସୀଙ୍କଠାରୁ ଖବର ପାଇ ବନ ବିଭାଗ କର୍ମଚାରୀ ଗାଁରେ ପହଞ୍ଚିଥିଲେ । ତେବେ ହାତୀପଲ ସେହି ସ୍ଥାନ ନ ଛାଡ଼ିବାରୁ ପ୍ରାୟ ୪ ଘଣ୍ଟା ଧରି ଜଙ୍ଗଲରେ ଚତୁର୍ଭୁଜଙ୍କ ମୃତ ଦେହ ପଡ଼ି ରହିଥିଲା । ପରେ ରାସଗୋବିନ୍ଦପୁର ରେଞ୍ଜ ବନ କର୍ମଚାରୀ ଓ ବାରିପଦା ସଦର ଥାନା ପୁଲିସ ହାତୀ ଘଉଡ଼ାଇ ମୃତଦେହ ଉଦ୍ଧାର କରିଥିଲେ । ପୁଲିସ ମୃତଦେହକୁ ବ୍ୟବଚ୍ଛେଦ ପାଇଁ ବାରିପଦା ପଠାଇଛି ।
ଏହି ଘଟଣାକୁ ନେଇ କୁକୁଡ଼ାଯୋଡ଼ି ଗ୍ରାମରେ ତୀବ୍ର ଅସନ୍ତୋଷ ଦେଖା ଦେଇଛି । ହାତୀପଲ ବର୍ଷତମାମ ସେମାନଙ୍କ ଘର ଭାଙ୍ଗିବା ସହ ଫସଲ ଉଜାଡ଼ୁଛନ୍ତି ଓ ଧନଜୀବନ କ୍ଷୟକ୍ଷତି କରୁଛନ୍ତି । ହେଲେ ବନବିଭାଗ ହାତ ଘଉଡ଼ାଇବାରେ ବିଫଳ ହେବା ସହ କ୍ଷତିଗ୍ରସ୍ତଙ୍କୁ ସହାୟତା ଦେବାରେ ଅହେତୁକ ବିଳମ୍ବ କରୁଛି । ଏହାକୁ ଆଉ ବରଦାସ୍ତ କରାଯିବନି ଓ ତୁରନ୍ତ କ୍ଷତିପୂରଣ ନ ମିଳିଲେ ଗ୍ରାମବାସୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।
