ଝାରସୁଗୁଡା ଉପନିର୍ବାଚନ ପାଇଁ ଲାଗୁହେଲା ଆଦର୍ଶ ଆଚରଣବିଧି
admin
ଭୁବନେଶ୍ବର : ମନ୍ତ୍ରୀ ନବକିଶୋର ଦାସଙ୍କ ହତ୍ୟାକାଣ୍ଡ ପରେ ଖାଲି ପଡ଼ିଥିବା ଝାରସୁଗୁଡ଼ା ବିଧାନସଭା ନିର୍ବାଚନମଣ୍ଡଳୀରେ ଆସନ୍ତା ମେ’ ୧୦ତାରିଖରେ ଉପନିର୍ବାଚନ ହେବ ବୋଲି ଭାରତ ନିର୍ବାଚନ ଆୟୋଗ ଘୋଷଣା କରିଛନ୍ତି। ଏନେଇ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହରୀ ଧଳ ସୂଚନା ଦେଇ କହିଛନ୍ତି ଯେ, ନିର୍ବାଚନ ଆୟୋଗଙ୍କ ଘୋଷଣା ଅନୁଯାୟୀ ଏପ୍ରିଲ ୧୩ରେ ଗେଜେଟ୍ ବିଜ୍ଞପ୍ତି, ଏପ୍ରିଲ ୨୦ରେ ନାମାଙ୍କନପତ୍ର ଦାଖଲର ଶେଷ ହେବ, ଏପ୍ରିଲ ୨୧ରେ ନାମାଙ୍କନପତ୍ର ଯାଞ୍ଚ, ଏପ୍ରିଲ ୨୪ରେ ପ୍ରାର୍ଥୀପତ୍ର ପ୍ରତ୍ୟାହାର ଶେଷ, ମେ ୧୦ରେ ମତଦାନ, ମେ ୧୩ରେ ଭୋଟ୍ ଗଣତି, ମେ ୧୫ରେ ସମସ୍ତ ନିର୍ବାଚନ ପ୍ରକ୍ରିୟା ଶେଷ ହେବ।
ଏକ ସାମ୍ବାଦିକ ସମ୍ମିଳନୀରେ ଶ୍ରୀ ଧଳ କହିଛନ୍ତି ଯେ, ନିର୍ବାଚନ ତାରିଖ ଘୋଷଣା ଦିନଠାରୁ ଅର୍ଥାତ୍ ଆଜିଠାରୁ ଝାରସୁଗୁଡ଼ା ନିର୍ବାଚନମଣ୍ଡଳୀ ସହ ସମଗ୍ର ଜିଲ୍ଲାରେ ଆଦର୍ଶ ଆଚରଣ ବିଧି ଲାଗୁ ହୋଇଛି। ଆଦର୍ଶ ଆଚରଣ ବିଧି ନିର୍ବାଚନରେ ଅଂଶଗ୍ରହଣ କରିବାକୁ ଥିବା ସମସ୍ତ ପ୍ରାର୍ଥୀ, ପ୍ରାର୍ଥିନୀ, ରାଜନୈତିକ ଦଳ ଏବଂ ଜିଲ୍ଲାରେ ଥିବା କେନ୍ଦ୍ର ଓ ରାଜ୍ୟ ସରକାରଙ୍କ ସରକାରୀ ଓ ବେସରକାରୀ ସଂସ୍ଥାଗୁଡ଼ିକ ପାଇଁ ମଧ୍ୟ ଲାଗୁ କରାଯାଇଛି। ଝାରସୁଗୁଡ଼ା ନିର୍ବାଚନମଣ୍ଡଳୀରେ ମୋଟ୍ ୨୨୧୦୭୦ ଜଣ ଭୋଟର୍ ଥିବାବେଳେ ସେଥିରୁ ୧୧୦୩୨୦ ଜଣ ପୁରୁଷ ଏବଂ ୧୧୦୬୮୭ ଜଣ ମହିଳା, ୬୩ଜଣ ତୃତୀୟ ଲିଙ୍ଗ ଭୋଟର ଅଛନ୍ତି। ଏଠାରେ ମୋଟ୍ ୨୫୨୬ଜଣ ଦିବ୍ୟାଙ୍ଗ ଭୋଟର ଅଛନ୍ତି। ୮୦ବର୍ଷରୁ ଉର୍ଦ୍ଧ୍ବ ୪୦୭୪ଜଣ ବରିଷ୍ଠ ଭୋଟର ଅଛନ୍ତି। ଏଥର ୨୦୬ ସ୍ଥାନରେ ୨୫୩ଟି ଭୋଟ୍ଗ୍ରହଣ କେନ୍ଦ୍ର ହେବ। ରାଜ୍ୟରେ କୋଭିଡ ସ୍ଥିତିକୁ ଦେଖି କୋଭିଡ କଟକଣା ଲାଗୁ ହେବ।
ସେହିପରି ଝାରସୁଗୁଡ଼ା ବିଧାନସଭା ଉପନିର୍ବାଚନ ପାଇଁ ଆବଶ୍ୟକ ହେଉଥିବା ଇଭିଏମ୍ ଓ ଭିଭିପ୍ୟାଟ୍ ପର୍ୟ୍ୟାପ୍ତ ପରିମାଣରେ ମହଜୁଦ୍ ଅଛି ଓ ସେସବୁର ପ୍ରାଥମିକ ସ୍ତରୀୟ ତନଖି କାର୍ୟ୍ୟ ସମାପ୍ତ ହୋଇଛି। ଉପନିର୍ବାଚନ ସମୟରେ ସମସ୍ତ ବୁଥ୍ରେ ପାନୀୟ ଜଳ ଯୋଗାଣ, ପାଇଖାନା, ରୢାମ୍ପ ଓ ବିଦ୍ୟୁତ ସଂଯୋଗ ସୁବିଧା ଯୋଗାଇ ଦିଆଯିବ।
