କନଷ୍ଟେବଳଙ୍କୁ ପିଟି ହତ୍ୟା କଲେ ମଦ ମାଫିଆ

Feb 11, 2021 - 10:18 Updated: Feb 11, 2021 - 10:18

4454

କାଶଗଞ୍ଜ: ଉତ୍ତରପ୍ରଦେଶର କାଶଗଞ୍ଜ ଜିଲ୍ଲାରେ ବହୁ ଚର୍ଚ୍ଚିତ ବିକାଶ ଦୁବେ ଘଟଣାର ପୁନରାବୃତ୍ତି ହୋଇଛି । ଏଠାରେ ଥିବା ଗାଁ ନଗଲା ଧୀମରରେ ବେଆଇନ ମଦ କାରବାର ହେଉଥିବା ଖବର ପାଇଁ ମଙ୍ଗଳବାର ବିଳମ୍ବିତ ରାତିରେ ସେଠାରେ ପୁଲିସ ଚଢ଼ାଉ ହୋଇଥିଲା । ସିଢ଼ପୁରା ଥାନାରେ ଏସଆଇ ଏବଂ ଜଣେ କନଷ୍ଟେବଳ ବାଇକ ଯୋଗେ ସେଠାରେ ପହଞ୍ଚି ଚଢ଼ାଉ କରିଥିଲେ । କିନ୍ତୁ ସେଠାରେ ମଦ ମାଫିଆମାନେ ଉଭୟ କନଷ୍ଟେବଳ ଏବଂ ଏସଆଇଙ୍କୁ ଆକ୍ରମଣ କରିଛନ୍ତି । ଉଭୟଙ୍କ ଦେହରୁ ବର୍ଦ୍ଧି କାଢ଼ି ମଦ ମାଫିଆମାନେ ଏକ ଘରେ ବନ୍ଦ କରି ନିସ୍ତୁକ ମାଡ଼ ମାରିଛନ୍ତି । ମଦ ମାଫିଆଙ୍କ ଆକ୍ରମଣରେ ପୁଲିସ କନଷ୍ଟେବଳ ଦେବେନ୍ଦ୍ର ସହିଦ ହୋଇଥିବା ବେଳେ ଏସଆଇ ଅଶୋକ କୁମାରଙ୍କ ଅବସ୍ଥା ଗୁରୁତର ଅଛି । ଆଲିଗଡ଼ ମେଡିକାଲ କଲେଜରେ ଅଶୋକଙ୍କର ଚିକିତ୍ସା ଜାରି ରହିଛି । ତାଙ୍କର ଉଭୟ ଗୋଡ଼ ଭାଙ୍ଗିଯିବା ସହ ମସ୍ତିଷ୍କରେ ଗଭୀର ଆଘାତ ଲାଗିଛି । ମଦ ମାଫିଆମାନେ ତାଙ୍କୁ ଆକ୍ରମଣ କରିବା ପରେ ନିକଟସ୍ଥ ଏକ ବିଲରେ ଛାଡ଼ି ଚାଲିଯାଇଥିଲେ । ଘଟଣାର ପାଖାପାଖି ୨ ଘଣ୍ଟା ପରେ ପୁଲିସ ଟିମ ସେଠାରେ ପହଞ୍ଚି ତାଙ୍କୁ ଉଦ୍ଧାର କରିଥିଲେ ।