ଏନ୍ସିପିର ଘୋଷଣା : ଶିବସେନାକୁ ମୁଖ୍ୟମନ୍ତ୍ରୀ ପଦ
ଏନ୍ସିପିର ଘୋଷଣା : ଶିବସେନାକୁ ମୁଖ୍ୟମନ୍ତ୍ରୀ ପଦ
admin
3743
ସପ୍ତାହକ ମଧ୍ୟରେ ନୂଆ ସରକାର ସମ୍ଭାବନା, ସରକାର ୫ ବର୍ଷ ଚାଲିବ: ପାୱାର
ମୁମ୍ବାଇ: ମହାରାଷ୍ଟ୍ରରେ ମିଳିତ ସରକାର ଗଠନ ପାଇଁ ପ୍ରକ୍ରିୟା ତ୍ୱରାନ୍ୱିତ ହୋଇଛି ଏବଂ ମୁଖ୍ୟମନ୍ତ୍ରୀ ପଦ ଶିବସେନାକୁ ହିଁ ମିଳିବ ବୋଲି ଆଜି ଏନ୍ସିପି ଘୋଷଣା କରିଛି । ଦଳର ମୁଖ୍ୟ ମୁଖପାତ୍ର ନବାବ୍ ମଲ୍ଲିକ କହିଛନ୍ତି ଯେ କଂଗ୍ରେସ-ଶିବସେନା-ଏନ୍ସିପି ସରକାର ଗଠନ ପାଇଁ ସୁବିଧାଜନକ ସ୍ଥିତିରେ ଅଛନ୍ତି ଏବଂ ମୁଖ୍ୟମନ୍ତ୍ରୀ ପଦ ସ୍ୱାଭାବିକ ଭାବେ ଶିବସେନାକୁ ହିଁ ଯିବ । ସାଧାରଣ ସର୍ବନିମ୍ନ କାର୍ଯ୍ୟକ୍ରମ (ଏନ୍ସିପି)କୁ ଚୂଡ଼ାନ୍ତ ରୂପ ଦେବାପାଇଁ ୩ ଦଳ ଏବେ ମିଳିତ ଭାବେ କାମ କରୁଛନ୍ତି ଏବଂ ମହାରାଷ୍ଟ୍ରବାସୀଙ୍କ ମତକୁ ସମ୍ମାନ ଦେଇ ଆମେ କାମ କରିବୁ ବୋଲି ମଲ୍ଲିକ କହିଛନ୍ତି । ଆଜି ଏନ୍ସିପିର ଏହି ଘୋଷଣା ପରେ ମହାରାଷ୍ଟ୍ରରେ ସପ୍ତାହକ ମଧ୍ୟରେ ନୂଆ ସରକାର ଗଠନ ହେବା ସମ୍ଭାବନା ବଢ଼ିଯାଇଛି । ଶିବସେନା ସୁପ୍ରିମୋ ଉଦ୍ଧବ ଠାକରେ କିମ୍ବା ତାଙ୍କ ପୁଅ ଆଦିତ୍ୟ ଠାକରେ ମୁଖ୍ୟମନ୍ତ୍ରୀ ହୋଇପାରନ୍ତି । ତେବେ ଉଭୟଙ୍କ ମଧ୍ୟରୁ କିଏ ମୁଖ୍ୟମନ୍ତ୍ରୀ ହେବ ସେ ନେଇ କଳ୍ପନାଜଳ୍ପନା ଲାଗି ରହିଛି ।
ଏନ୍ସିପି ସୁପ୍ରିମୋ ଶରଦ ପାୱାର କହିଛନ୍ତି ଯେ ମହାରାଷ୍ଟ୍ରରେ ୫ ବର୍ଷ ପାଇଁ ଏକ ସ୍ଥାୟୀ ସରକାର ଗଠନ ହେବ ଏବଂ ରାଜ୍ୟରେ ମଧ୍ୟବର୍ତ୍ତୀ ନିର୍ବାଚନର ପ୍ରଶ୍ନ ଉଠୁନାହିଁ । ଖୁବ୍ଶୀଘ୍ର ରାଜ୍ୟରେ ଶିବସେନା-ଏନ୍ସିପି-କଂଗ୍ରେସ ସରକାର ଗଠନ ହେବ ଏବଂ ଏହି ସରକାର ୫ ବର୍ଷର କାର୍ଯ୍ୟକାଳ ସୁରୁଖୁରୁରେ ସଂପନ୍ନ କରିବ ବୋଲି ସେ କହିଛନ୍ତି । ନାଗପୁରରେ ସାମ୍ବାଦିକଙ୍କ ସହ କଥାବାର୍ତ୍ତା ବେଳେ ପାୱାର କହିଛନ୍ତି, ସରକାର ଗଠନ ପାଇଁ ଚାଲିଥିବା ଆଲୋଚନା ଏବେ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି ଏବଂ ଚିଠା ସିଏମ୍ପି ପ୍ରସ୍ତୁତ ହୋଇସାରିଛି । ବିଜେପି ସହ ମଧ୍ୟ ସରକାର ଗଠନ ନେଇ ଆଲୋଚନା ଚାଲିଛି କି ବୋଲି ସାମ୍ବାଦିକଙ୍କ ପ୍ରଶ୍ନର ଜବାବରେ ପାୱାର କହିଥିଲେ ଯେ ଆମେ କଂଗ୍ରେସ ଏବଂ ଶିବସେନାକୁ ବାଦ୍ ଦେଇ ଅନ୍ୟ କୌଣସି ଦଳ ସହିତ ଆଲୋଚନା କରିନାହୁଁ । ରାଜ୍ୟରେ ସ୍ଥିର ସରକାର ଗଠନ ହୋଇପାରିବ ନାହିଁ ବୋଲି ପୂର୍ବ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଦେଇଥିବା ବୟାନକୁ ସମାଲୋଚନା କରି ପାୱାର କହିଛନ୍ତି ଯେ ଫଡନାଭିସ ଜ୍ୟୋତିଷ ଶାସ୍ତ୍ରର ଛାତ୍ର ବୋଲି ମୁଁ ଜାଣିନଥିଲି । ତାଙ୍କର ସବୁ ଅନୁମାନ ଏ ପର୍ଯ୍ୟନ୍ତ ଭୁଲ୍ ପ୍ରମାଣିତ ହୋଇଛି ବୋଲି ପାୱାର କହିଛନ୍ତି ।
