ଆଜି କେନ୍ଦ୍ର ବଜେଟ୍
ଆଜି କେନ୍ଦ୍ର ବଜେଟ୍
admin
3974
ନୂଆଦିଲ୍ଲୀ: ୨୦୨୦-୨୧ ଆର୍ଥିକ ବର୍ଷ ନିମନ୍ତେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ସଂସଦରେ ସାଧାରଣ ବଜେଟ ଆଗତ କରିାବେ । ଲୋକସଭାରେ ପୂର୍ବାହ୍ନ ୧୧ ଟାରେ ସୀତାରମଣ ଅଭିଭାଷଣ ଆରମ୍ଭ କରିବେ । ଦେଶର ଅର୍ଥମନ୍ତ୍ରୀ ଭାବେ ଏହା ତାଙ୍କର ଦ୍ୱିତୀୟ ବଜେଟ୍ ହେବ । ସେହିଭଳି ମୋଦି ସରକାରଙ୍କ ଦ୍ୱିତୀୟ ପାଳିର ଏହା ପ୍ରଥମ ପୂର୍ଣ୍ଣାଙ୍ଗ ବଜେଟ୍ ହେବ ।
ସମ୍ପ୍ରତି ଦେଶରେ ମାନ୍ଦାବସ୍ଥା ଦେଖାଦେଇଥିବା ବେଳେ ଘରୋଇ ଚାହିଦା ହ୍ରାସ ପାଇଛି । ଚଳିତ ଆର୍ଥିକ ବର୍ଷରେ ଅଭିବୃଦ୍ଧି ୫% କୁ ଖସିବ ବୋଲି ସରକାର ଆକଳନ କରିଛନ୍ତି । ତେଣୁ ଅଭିବୃଦ୍ଧିରେ ଇନ୍ଧନ ଭରିବା ପାଇଁ ସୀତାରମଣ କେଉଁ ଗୋଟି ଚଳାଇବେ ତାହା ଉପରେ ନଜର ରହିବ । ଅଭିବୃଦ୍ଧିକୁ ଗତିଶୀଳ କରାଇବା ପାଇଁ ଚାହିଦା ବୃଦ୍ଧି ଜରୁରୀ ହୋଇଥିବାରୁ ସରକାର ଲୋକଙ୍କ କ୍ରୟଶକ୍ତି ବଢ଼ାଇବା ଉପରେ ଗୁରୁତ୍ୱ ଦେବେ ବୋଲି ଆଶା । ଏଥିଲାଗି ବ୍ୟକ୍ତିଗତ ଆୟକର ହ୍ରାସ ଦିଗରେ ପଦକ୍ଷେପ ନିଆଯାଇପାରେ । ଅନ୍ୟ ପକ୍ଷରେ ବିଭିନ୍ନ ଶିଳ୍ପ କ୍ଷେତ୍ର ମଧ୍ୟ ମାନ୍ଦାବସ୍ଥାର ସମ୍ମୁଖୀନ ହେଉଛି । ଏନ୍ବିଏଫସି (ଅଣ ବ୍ୟାଙ୍କିଙ୍ଗ ଆର୍ଥିକ ପ୍ରତିଷ୍ଠାନ ) ରିୟଲ ଇଷ୍ଟେଟ ଠାରୁ ଅଟୋ ମୋବାଇଲ କ୍ଷେତ୍ର ପର୍ଯ୍ୟନ୍ତ ସବୁଠି ମାନ୍ଦାବସ୍ଥାର ଝଲକ ଦେଖିବାକୁ ମିଳୁଛି । ତେଣୁ ସରକାର ବିଭିନ୍ନ ଟିକସ ହ୍ରାସ ଦିଗରେ ପଦକ୍ଷେପ ନେବା ସହିତ କୋହଳ ନୀତି ଆଣିବେ ବୋଲି ଆଶା କରାଯାଉଛି । ନିକଟରେ ସରକାର କମ୍ପାନୀ ଟିକସରେ ଯେଉଁ ହ୍ରାସ କରିଥିଲେ ତାହା ପର୍ଯ୍ୟାପ୍ତ ନୁହେଁ ବୋଲି କର୍ପୋରେଟ୍ ସଂସ୍ଥା ଯୁକ୍ତି ବାଢ଼ିଛନ୍ତି ।
