ଅପରାଜିତାଙ୍କ ସହ ଅସନ୍ତୁଷ୍ଟ କଂଗ୍ରେସ ନେତ୍ରୀ
ଅପରାଜିତାଙ୍କ ସହ ଅସନ୍ତୁଷ୍ଟ କଂଗ୍ରେସ ନେତ୍ରୀ
admin
4497
ଭୁବନେଶ୍ୱର : ପ୍ରଦେଶ କଂଗ୍ରେସ ନେତୃତ୍ୱ ବିରୋଧରେ ଯୁଦ୍ଧଂ ଦେହି ଡାକରା ଦେଇ ନୂଆଦିଲ୍ଲୀ ଗଲେ । ଗଣମାଧ୍ୟମରେ ପ୍ରକାଶ ପାଇଲା ଯେ ଦାୟିତ୍ୱରେ ଥିବା କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଏମାନେ ଭେଟିବେ । କିନ୍ତୁ ନୂଆଦିଲ୍ଲୀରୁ ଆସୁଥିବା କିଛି ଫଟୋ ଚିତ୍ର ଭିନ୍ନ କଥା କହିଲେଣି । କଂଗ୍ରେସ ନେତୃତ୍ୱ ବିରୋଧରେ ଯାଇଥିବା ରାଜ୍ୟର ଏହି ମହିଳା ନେତ୍ରୀ ଅସଲରେ ବିଜେପିରେ ମିଶିବାକୁ ଯୋଜନା ଚଲାଇଛନ୍ତି । ଭୁବନେଶ୍ୱର ଲୋକସଭା ସାଂସଦ ଅପରାଜିତା ଷଡଙ୍ଗୀଙ୍କ ସହିତ ସେମାନଙ୍କର ପ୍ରାରମ୍ଭିକ ଯୋଗାଯୋଗ ଶେଷ ହୋଇଛି । ଏ ସଂକ୍ରାନ୍ତ ଫଟୋ ଏବେ ଭାଇରାଲ୍ ହୋଇଛି ।
ମିଳିଥିବା ସୂଚନା ଅନୁସାରେ, ରାଜ୍ୟ କଂଗ୍ରେସର ବରିଷ୍ଠ ନେତ୍ରୀ ସନ୍ଧ୍ୟା ମହାପାତ୍ରଙ୍କ ନେତୃତ୍ୱରେ ୭ରୁ ଅଧିକ ମହିଳା କଂଗ୍ରେସ ନେତ୍ରୀ ଗତ ଏକ ସପ୍ତାହ ଧରି ଦିଲ୍ଲୀରେ ଡେରା ପକାଇଛନ୍ତି । ହେଲେ ଦିଲ୍ଲୀରେ ଏହି ଅସନ୍ତୁଷ୍ଟ କଂଗ୍ରେସ ନେତାମାନେ କିନ୍ତୁ ବିଜେପି ନେତୃତ୍ୱ ସହ ସଂପର୍କରେ ଥିବା ସୂଚନା ମିଳିଛି । ଅସନ୍ତୁଷ୍ଟ କଂଗ୍ରେସ ନେତ୍ରୀଙ୍କୁ ଦଳରେ ମିଶାଇବା ପାଇଁ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ପ୍ରମୁଖ ମଧ୍ୟସ୍ଥି ସାଜିଛନ୍ତି । ଅସନ୍ତୁଷ୍ଟ ଏହି ନେତ୍ରୀଙ୍କୁ ସାଂସଦଙ୍କ ଘରେ ଓ ସଂସଦରେ ତାଙ୍କ ସହ ଦେଖିବାକୁ ମିଳୁଥିବା କଂଗ୍ରେସ ଶିବରରେ ଚର୍ଚ୍ଚା ହେଲାଣି । ତେବେ ବିଜେପି ଏହି ନେତ୍ରୀମାନଙ୍କୁ ଦଳରେ ସାମିଲ କରିବା ନେଇ ଏଯାଏ କୌଣସି ନିଷ୍ପତ୍ତି ନେଇନାହିଁ । କଂଗ୍ରେସ ଦଳ ଛାଡିବା ପରେ ତୁରନ୍ତ ବିଜେପି ସଂଗଠନରେ ସେମାନଙ୍କୁ ଯେମିତି ନିଆଯାଏ, ସେ ନେଇ ସର୍ତ୍ତ ରଖାଯାଇଛି । କିନ୍ତୁ ବିଜେପି ଏହି ସର୍ତ୍ତରେ ରାଜି ନାହିଁ । ପ୍ରଥମେ ଦଳରେ ମିଶିବା ପରେ ଥଇଥାନ କରାଯିବ କି ନାହିଁ, ତାହା ପରବର୍ତ୍ତୀ ସମୟରେ ବିଚାର କରାଯିବ ବୋଲି ବିଜେପି କହିଛି ।
