କଂଗ୍ରେସ ଭବନରେ ଜାନକୀ ବାବୁଙ୍କୁ ଶ୍ରଦ୍ଧାଞ୍ଜଳି
ANGIKAR NEWS
4544
ଆଧୁନିକ ଓଡ଼ିଶାର ବିନ୍ଧାଣୀ, ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ, ଆସାମର ପୂର୍ବତନ ରାଜ୍ୟପାଳ ପ୍ରଜ୍ଞା ପୁରୁଷ ଜାନକୀ ବଲ୍ଲଭ ପଟ୍ଟନାୟକଙ୍କ ୯ମ ଶ୍ରାଦ୍ଧ ଦିବସ ଅବସରରେ ପ୍ରଦେଶ କଂଗ୍ରେସ କାର୍ଯ୍ୟାଳୟ କଂଗ୍ରେସ ଭବନ ଠାରେ କଂଗ୍ରେସ ସେବାଦଳ ପକ୍ଷରୁ ପୁଷ୍ପାର୍ଘ୍ୟ ପ୍ରଦାନ ଉତ୍ସବ ଓ ଶ୍ରଦ୍ଧାଞ୍ଜଳି ସଭା ରାଜ୍ୟ ସେବାଦଳ ଅଧ୍ୟକ୍ଷ ଡଃ ଆର୍ଯ୍ୟ କୁମାର ଜ୍ଞାନେନ୍ଦ୍ରଙ୍କ ପୌରହିତ୍ୟରେ ଅନୁଷ୍ଠିତ ହୋଇଯାଇଛି ।
ସ୍ୱର୍ଗତ ପଟ୍ଟନାୟକଙ୍କ ଫଟୋଚିତ୍ରରେ ମାଲ୍ୟାର୍ପଣ ପରେ ଏକ ମିନିଟ ନୀରବ ପ୍ରାର୍ଥନା ପରେ ପୂର୍ବ ପ୍ରଶାସକ ପଂଚାନନ ଦାଶ ସ୍ୱର୍ଗତ ଜାନକୀ ବଲ୍ଲଭ ପଟ୍ଟନାୟକ ଉଦେ୍ଦଶ୍ୟରେ ସ୍ମୃତି ଚାରଣ କରି କହିଲେ ଯେ ଆଜି ଆମେ ଯେଉଁ ଓଡ଼ିଶା ଦେଖୁଛେ, ଏହି ଆଧୁନିକ ଓଡ଼ିଶାର ପ୍ରକୃତ ବିନ୍ଧାଣୀ ଥିଲେ ସ୍ୱର୍ଗତ ପଟ୍ଟନାୟକ । ତାଙ୍କର ୧୪ ବର୍ଷ ଶାସନ ଥିଲା ଓଡ଼ିଶା ପାଇଁ ସୁବର୍ଣ୍ଣ ଯୁଗ । ପୂର୍ବ ପ୍ରଶାସକ ତଥା ଗାନ୍ଧୀ ଶାନ୍ତି ପ୍ରତିଷ୍ଠାନର ରାଜ୍ୟ ସଂପାଦକ ଜୟନ୍ତ ଦାସ ସ୍ମୃତି ଚାରଣ କରି କହିଲେ ଯେ ୧୯୮୦ ମସିହାରେ ଓଡ଼ିଶାର ଆର୍ଥିକ ବ୍ୟବସ୍ଥା ଅତ୍ୟନ୍ତ ଦୁର୍ବଳ ଥିଲା । କିନ୍ତୁ ତାଙ୍କର ଦୃଢ଼ ଇଛାଶକ୍ତି ବଳରେ ଓଡ଼ିଶାର ଯୁବକଙ୍କୁ କର୍ମନିଯୁକ୍ତି ପାଇଁ ସେ ଯେଉଁ ହଜାର ଦିନର ହଜାର କୋଟି ଟଙ୍କାର ହଜାର ଶିଳ୍ପର ଆହ୍ୱାନ ଦେଲେ ତାହା ଥିଲା, ଓଡ଼ିଶା ଉନ୍ନତିର ମୂଳଭିତି ।
କାର୍ଯ୍ୟକ୍ରମ ଆରମ୍ଭରେ ପ୍ରଦେଶ କଂଗ୍ରେସ ସେବାଦଳ ସଂଗଠକ ଜ୍ୟୋତିଷ କୁମାର ସାହୁ, ସ୍ୱାଗତ ଭାଷଣ ଓ ସାଧାରଣ ସଂପାଦକ ମହମ୍ମଦ ଶାହାଦୁଲ୍ଲା ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ କଂଗ୍ରେସ ନେତା ସଂକୁନା କହଁର, କାର୍ଯ୍ୟାଳୟ ସଂପାଦକ ବୈଦ୍ୟନାଥ ସ୍ୱାଇଁ, ସେବାଦଳ କର୍ମକର୍ତା କୁଳମଣି ସାହୁ, ବରୁଣ ରାଜ, ପ୍ରସନ୍ନ ପାଇକରାୟ, ଖଗେଶ୍ୱର ମଲ୍ଲିକ ପ୍ରମୁଖ ବହୁ ଛାତ୍ର, ଯୁବକ ଉପସ୍ଥିତ ଥିଲେ ।
