ହାତୀ ଆକ୍ରମଣରେ ଜଣେ ମୃତ
user2
ଭବାନୀପାଟଣା : ଲାଞ୍ଜିଗଡ଼ ବ୍ଳକ ତ୍ରିଲୋଚନପୁର ପଞ୍ଚାୟତ ନିୟମଗିରି ପାହାଡ଼ର ପାଦ ଦେଶର ଥିବା ବେରେନ ପିଣ୍ଡା ଗ୍ରାମରେ ହାତୀ ଆକ୍ରମଣରେ ଗ୍ରାମର ରାଇସିଙ୍ଗ ମାଝୀ (୫୫ )ଙ୍କ ମୃତ୍ୟୁ ହୋଇଛି।
ରାଇସିଙ୍ଗ ମାଝୀ ଗତ ରବିବାର ସନ୍ଧ୍ୟା ସାଢ଼େ ୫ ଟାରେ କାଶୀବୋଣ୍ଡେଲରୁ ନିଜ ଗାଁ ବେରେନ ପିଣ୍ଡା ଫେରୁଥିଲେ। ଏହି ସମୟରେ ବେରେନ ପିଣ୍ଡା ଓ ମଇନଗୁଡା ଜଙ୍ଗଲରେ ରାଇସିଙ୍ଗ ମାଝୀଙ୍କୁ ହାତୀ ଆକ୍ରମଣ କରିବା ଫଳରେ ଘଟଣା ସ୍ଥଳରେ ହିଁ ମୃତ୍ୟୁ ହୋଇଥିଲା। ରାତିରେ ସେ ଘରକୁ ନ ଫେରିବାରୁ ସ୍ତ୍ରୀ ଓ ବନ୍ଧୁବାନ୍ଧବ ଲୋକେ ମିଶି ପ୍ରଥମେ ଆଖପାଖ ଗାଁକୁ ଯାଇ ପଚାରି ବୁଝିଥିଲେ। ଖୋଜାଖୋଜି କରିବା ପରେ ସୋମବାର ସକାଳ ୬ ଟାରେ ଗାଁ ଠାରୁ ପ୍ରାୟ ଦୁଇଶହ ମିଟର ବରେନପିଣ୍ଡା ଓ ମାଇନଗୁଡା ଜଙ୍ଗଲ ନିକଟରେ ରାଇସିଙ୍ଗଙ୍କୁ ହାତୀ ଆକ୍ରମଣ କରିଥିବା ଦେଖିବାକୁ ପାଇଥିଲେ। ହାତୀ ଘୋଷାରି ଘୋଷାରି ପେଟ ଓ ଜଙ୍ଘରେ ମାଡି କ୍ଷତବିକ୍ଷତ କରିଥିବା ଜଣାପଡିଛି। ପରିବାର ଲୋକେ ଲାଞ୍ଜିଗଡ଼ ବନ ବିଭାଗ କର୍ମଚାରୀଙ୍କୁ ଖବର ଦେବା ପରେ ଘଟଣା ସ୍ଥଳରେ ପହଞ୍ଚି ତଦନ୍ତ ଚାଲିଥିବା ଜଣାପଡିଛି।
