୭ଂରେ ଥରୁଛି ଦାରିଙ୍ଗବାଡ଼ି, ୧୫ଂ ତଳେ ୧୮ ସହର

Dec 7, 2019 - 05:32 Updated: Dec 7, 2019 - 05:32

4220

ଭୁବନେଶ୍ୱର : ଗୋଟିଏ ଦିନରେ ଭୁବନେଶ୍ୱରର ପାରଦ ଖସିଲା ୪ ଡିଗ୍ରି । ବିଳମ୍ବରେ ହେଲେ ମଧ୍ୟ ଗତ ଚାରି ଦିନ ହେଲା ରାଜ୍ୟର ବିଭିନ୍ନ ସ୍ଥାନରେ ପାରଦ ଲଗାତାର ଭାବେ ହ୍ରାସ ପାଇବାରେ ଲାଗିଛି । କେଉଁଠି ୩ ଡିଗ୍ରି ଖସୁଛି ତ ଆଉ କେଉଁଠି ୫ ଡିଗ୍ରି । ଉପକୂଳରୁ ଉପାନ୍ତ ପର୍ଯ୍ୟନ୍ତ, ସବୁଠି ପାରଦ ହ୍ରାସ ପାଇବାରେ ଲାଗିଛି । ତେବେ ଏଭଳି ସ୍ଥିତି ୧୨ ତାରିଖ ଯାଏ ଲାଗି ରହିବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଆକଳନ କରାଯାଇଛି । ଆଶ୍ଚର୍ଯ୍ୟଜନକ କଥା ହେଉଛି ଯେ ଗତ ୨୪ ଘଣ୍ଟା ମଧ୍ୟରେ ଉପକୂଳ ଓଡ଼ିଶାର ପ୍ରମୁଖ ସହର ଯଥା ଭୁବନେଶ୍ୱର, କଟକ, ବାଲେଶ୍ୱର, ଚାନ୍ଦବାଲି ଆଦି ସହରରେ ପାରଦ ଅସ୍ୱାଭାବିକ ଭାବେ ହ୍ରାସ ପାଇଛି । ଭୁବନେଶ୍ୱର ଓ କଟକ ତାପମାତ୍ରା ଗତକାଲି ୧୬ ଡିଗ୍ରି ଉପରେ ରହିଥିଲା । ତେବେ ତାପମାତ୍ରା ୧୨.୮ ଡିଗ୍ରିକୁ ହ୍ରାସ ପାଇବାରେ ଲାଗିଛି । ଓଡ଼ିଶାର କାଶ୍ମୀର ଭାବେ ପରିଚିତ ଦାରିଙ୍ଗବାଡ଼ିରେ ଶୁକ୍ରବାର ଚଳିତ ବର୍ଷ ରାଜ୍ୟର ସର୍ବନିମ୍ନ ତାପମାତ୍ରା ରେକର୍ଡ କରାଯାଇଛି । ଭୋର୍ ସମୟରେ ଏଠାରେ ପାରଦ ୭ ଡିଗ୍ରିକୁ ଖସି ଆସିଥିଲା । ୨୪ ଘଣ୍ଟା ମଧ୍ୟରେ ପାଖାପାଖି ଦୁଇ ଡିଗ୍ରି କମିଥିବାରୁ ଜନଜୀବନ କିଛି ମାତ୍ରାରେ ପ୍ରଭାବିତ ହୋଇଛି । ଫୁଲବାଣୀ ଓ ସୋନପୁର ତାପମାତ୍ରା ଇତିମଧ୍ୟରେ ୮ ଡିଗ୍ରିକୁ ଖସି ଆସିଛି । ଅନୁଗୁଳରେ ବି ଅନୁରୂପ ଅବସ୍ଥା । ଏଠାରେ ବି ପାରଦ ୮.୬କୁ ହ୍ରାସ ପାଇଛି । ଟିଟିଲାଗଡ଼ରେ ବି ରାତିର ତାପମାତ୍ରା ୯.୫ ଡିଗ୍ରିକୁ ଖସି ଆସିଛି । ଏସବୁ ସହର ସମେତ ରାଜ୍ୟର ମୋଟ ୧୮ଟି ସହରର ତାପମାତ୍ରା ୧୫ଡିଗ୍ରି ତଳେ ରହିଛି । ପାଣିପାଗ ବିଶେଷଜ୍ଞଙ୍କ କହିବାନୁଯାୟୀ, ଏବେ ପାଗରେ ଆଉ ବିଶେଷ ପରିବର୍ତନ ହେବନି । ୫ଦିନ ଯାଏ ସାରା ରାଜ୍ୟରେ ଏଭଳି ସ୍ଥିତି ଲାଗି ରହିବ । ଅଳ୍ପ କେତେକ ସ୍ଥାନରେ ଗୋଟିଏ ଦୁଇ ଡିଗ୍ରି ଏପାଖ ସେପାଖ ହୋଇପାରେ । ନ ହେଲେ ସ୍ଥିତିରେ ସେମିତି ପରିବର୍ତ୍ତନ ଆସିବାର ସମ୍ଭାବନା ନାହିଁ । ୮ ତାରିଖ ବେଳକୁ ଦକ୍ଷିଣ ଉପକୂଳ, ମାଲକାନଗିରି, କୋରାପୁଟରେ ହାଲୁକା ବର୍ଷା ହୋଇପାରେ । ନ ହେଲେ ରାଜ୍ୟର ଅନ୍ୟ ସ୍ଥାନଗୁଡିÿକରେ ପାଗ ଶୁଖିଲା ରହିବ ।