ସିଏଏକୁ ବିରୋଧରେ କଂଗ୍ରେସର ବଡ଼ ଯୋଜନା
ସିଏଏକୁ ବିରୋଧରେ କଂଗ୍ରେସର ବଡ଼ ଯୋଜନା
admin
6509
ନୂଆଦିଲ୍ଲୀ : ନାଗରିକତା ସଂଶୋଧନ ଆଇନ୍ (ସିଏଏ)କୁ ବିରୋଧ ପାଇଁ କଂଗ୍ରେସ ବଡ଼ ଯୋଜନା କରିଛି । ସମସ୍ତ କଂଗ୍ରେସ ଶାସିତ ରାଜ୍ୟରେ ସିଏଏ ବିରୋଧୀ ପ୍ରସ୍ତାବ ଆଗତ କରିବାକୁ କଂଗ୍ରେସ ଚିନ୍ତା କରୁଛି । କଂଗ୍ରେସ ଶାସିତ ରାଜ୍ୟ ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼ ବିଧାନସଭାରେ ସିଏଏ ବିରୋଧରେ ପ୍ରସ୍ତାବ ପାରିତ ହେବ ବୋଲି ବରିଷ୍ଠ କଂଗ୍ରେସ ନେତା ଅହମ୍ମଦ ପଟେଲ୍ କହିଛନ୍ତି । ପୂର୍ବରୁ ପଞ୍ଜାବ ବିଧାନସଭାରେ ମଧ୍ୟ ସିଏଏ ବିରୋଧରେ ପ୍ରସ୍ତାବ ପାରିତ ହୋଇସାରିଛି । ସମସ୍ତ କଂଗ୍ରେସ ଶାସିତ ରାଜ୍ୟରେ ସିଏଏ ବିରୋଧରେ ପ୍ରସ୍ତାବ ଆଗତ ହେବ ଏବଂ ଏ ବାବଦରେ କେନ୍ଦ୍ର ସରକାରଙ୍କ ଉପରେ ଅଧିକ ଚାପ ସୃଷ୍ଟି କରାଯିବ ବୋଲି ପଟେଲ୍ କହିଛନ୍ତି ।
ଅପରପକ୍ଷେ, ସିଏଏ କାହାର ନାଗରିକତାକୁ ଛିନ୍ନ କରିବ ନାହିଁ, ଏହା କେବଳ ନାଗରିକତା ଦେବ ବୋଲି କେନ୍ଦ୍ର ସରକାର ସ୍ପଷ୍ଟ କରିଦେଇଛନ୍ତି । ବିରୋଧୀ ଦଳଗୁଡ଼ିକର ମିଥ୍ୟା ପ୍ରଚାର ଓ ବିଭ୍ରାନ୍ତି ଯୋଗୁଁ ଏହା ବିରୋଧରେ ଆନ୍ଦୋଳନ ହେଉଥିବା ସରକାର କହିଛନ୍ତି । ଏହି ଆଇନରେ ୨୦୧୫ ପୂର୍ବରୁ ପାକିସ୍ତାନ, ଆଫଗାନିସ୍ତାନ ଓ ବାଂଲାଦେଶରୁ ଆସିଥିବା ସଂଖ୍ୟାଲଘୁ ଶରଣାର୍ଥୀମାନଙ୍କୁ ଭାରତର ନାଗରିକତା ପ୍ରଦାନ କରାଯିବା ନେଇ ଉଲ୍ଲେଖ ରହିଛି । ତେବେ ଏହି ଦେଶମାନଙ୍କରୁ ଆସୁଥିବା ମୁସ୍ଲିମ୍ ଶରଣାର୍ଥୀଙ୍କ ଭାରତୀୟ ନାଗରିକତା ନେଇ ଆଇନରେ ଉଲ୍ଲେଖ ନଥିବାରୁ ଏହାକୁ ନେଇ ବିବାଦ ଲାଗି ରହିଛି । ସିଏଏ ବିରୋଧରେ ଗତ ସପ୍ତାହରେ ପଞ୍ଜାବ ବିଧାନସଭାରେ ପ୍ରସ୍ତାବ ଆଗତ ହୋଇସାରିଛି । ସେହିଭଳି ଏହା ପୂର୍ବରୁ କେରଳର ସିପିଏମ୍ ନେତୃତ୍ୱାଧୀନ ବାମ ଗଣତାନ୍ତ୍ରିକ ସାମ୍ମୁଖ୍ୟ ସରକାର ମଧ୍ୟ ସିଏଏ ବିରୋଧରେ ପ୍ରସ୍ତାବ ଆଗତ କରିସାରିଛନ୍ତି । କେରଳ ସରକାର ଏହି ଆଇନକୁ ସୁପ୍ରିମ୍କୋର୍ଟରେ ଚ୍ୟାଲେଞ୍ଜ କରିଛନ୍ତି ।
